ភ្នំពេញ៖ នារីម្នាក់បើករថយន្តស៊េរីទំនើបម៉ាកMGមួយ គ្រឿងបុករថយន្តJeepពីចំហៀងពេញទំហឹងបណ្ដាលឲ្យរងការខូចខាតរៀងខ្លួនយ៉ាងដំណំ។
ហេតុការណ៍នេះកើតឡើងកាលពីវេលាម៉ោង ៣ និង ៣០ នាទីទៀបភ្លឺឈានចូលថ្ងៃទី ២៥ ខែកុម្ភៈ ឆ្នាំ ២០២៣ នៅត្រង់ចំណុចស្តុប បេកាសេ តាមបណ្តោយផ្លូវព្រះមុនីវង្ស កែងនិងផ្លូវសហព័ន្ធរុស្ស៊ី ស្ថិតនៅក្នុងសង្កាត់មនោរម្យ ខណ្ឌ 7 មករារាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសជនជាតិចិនមួយក្រុម មានគ្នា ៥ទៅ ៦ នាក់ បើករថយន្តស៊េរីទំនើបម៉ាក់Jeep មួយគ្រឿងពណ៌ប្រផេះពាក់ស្លាកលេខភ្នំពេញ2BT-3733ធ្វើដំណើរតាមបណ្ដោយផ្លូវសហព័ន្ធរុស្ស៊ីទិសដៅពីលិចទៅកើត លុះមកដល់ចំណុចកើតហេតុត្រង់ស្តុបផ្លូវបំបែកជាបួន ក៏មានរថយន្តស៊េរីទំនើបមួយគ្រឿងម៉ាកMGពណ៌សពាក់ស្លាកលេខកម្ពុជា- SOVANARYបើកបរដោយនារីម្នាក់ធ្វើដំណើរតាមបណ្តោយផ្លូវ ព្រះមុន្នីវង្ស ទិសដៅពីជើងទៅត្បូង ជ្រុលបុករថយន្តJeepពីចំហៀងផ្នែកខាងឆ្វេងពេញទំហឹងបណ្ដាលឲ្យរងការខូចខាតទាំងសងខាងយ៉ាងដំណំ។បន្ទាប់មកគេឃើញនារីជាអ្នកបើករថយន្តMG មានការភិតភ័យ ចង់គាំងបេះដូង ត្រូវបានសាច់ញាតិបញ្ជូនទៅមន្ទីរពេទ្យ មួយសន្ធុះក្រោយមកក៏ឃើញនារីរូបនោះបានត្រឡប់មកកន្លែងកើតហេតុវិញ បានស្រែកទ្រហ៊ោយំសង្ស័យភ័យពេក។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកដល់កន្លែងកើតហេតុបានឲ្យភាគីទាំងពីរធ្វើការសម្រុះសម្រួលគ្នា ក្រោយមកភាគីទាំងពីរបានធ្វើការសម្របសម្រួលគ្នាមិនត្រូវទើបសមត្ថកិច្ចជំនាញធ្វើការវាល់វែងយករថយន្តទាំងពីរគ្រឿងទៅរក្សាទុករងចាំធ្វើការដោះស្រាយគ្នាបន្តទៀតនៅពេលក្រោយ៕
អត្ថបទ៖វិច្ឆិកា