សិល្បៈជាតិ៖ បវរកញ្ញា សួន ពិសី បានតំណាងឱ្យកម្ពុជាទៅចូលរួមប្រកួតនៅក្នុងកម្មវិធី Miss Asian Global 2023 នៅទីក្រុង គូឡាឡាំពួរ ប្រទេសម៉ាឡេស៊ី កាលពីថ្ងៃទី ២១ ខែកុម្ភៈ ឆ្នាំ ២០២៣ កន្លងទៅនេះ។ ជាលទ្ធផល នៅថ្ងៃផ្ដាច់ព្រ័ត្រនៃកម្មវិធី ថ្ងៃទី ២៦ ម្សិលមិញនេះ កញ្ញា សួន ពិសី ឈ្នះបានមកុដលំដាប់រងទី ១ ពីកម្មវិធី។
គេនៅចាំបានថា បវរកញ្ញា សួន ពិសី ធ្លាប់ទទួលបានតំណែងលំដាប់រងទី ៤ ពីការប្រកួតក្នុងកម្មវិធី Miss Universe Cambodia កាលពីឆ្នាំ ២០២០ ដែលជាឆ្នាំជំនាន់កញ្ញា រ៉េត សារីតា ជាអ្នកគ្រងមកុដ MUC2020។ យ៉ាងណាមិញ កញ្ញា សួន ពិសី ក៏ត្រូវបានក្រុមហ៊ុន CIM ប្រគល់តំណែងតំណាងឱ្យប្រទេសកម្ពុជាតែម្ដង ក្នុងការទៅចូលរួមប្រកួតនៅក្នុងកម្មវិធី Miss & Mrs Global Asian ដែលធ្វើឡើងនៅប្រទេសម៉ាឡេស៊ី។
សូមជម្រាបថា នៅព្រឹកថ្ងៃទី ២៧ ខែកុម្ភៈ នេះ បវរកញ្ញា សួន ពិសី បានធ្វើដំណើរត្រឡប់មកមាតុប្រទេសវិញហើយ និងទទួលបានការស្វាគមន៍យ៉ាងកក់ក្ដៅពីអ្នកគាំទ្រដែលបានទៅរង់ចាំទទួលកញ្ញាពីច្រកចេញនៅអាកាសយានដ្ឋានអន្តរជាតិភ្នំពេញ។
សម្រាប់កញ្ញា សួន ពិសី គឺជាបវរកញ្ញាដែលមកពីខេត្ត ព្រៃវែង មានកំពស់ ១៦៨ សង់ទីម៉ែត្រ និងមានអាយុ ២៣ ឆ្នាំ។ នៅក្នុងពិភពសិល្បៈ កញ្ញាធ្លាប់ជាតារាសម្ដែង និងបង្ហាញម៉ូដ ប៉ុន្តែក្រោយមកកញ្ញាក៏បានចាប់អារម្មណ៍ក្នុងវិស័យបវរកញ្ញាហើយធ្លាប់បានចូលរួមប្រកួតនៅកម្មវិធី Miss Grand Cambodia , Miss Universe Cambodia និងកម្មវិធី Miss Tourism ជាដើម៕