កីឡាការិនីជម្រើសជាតិតេក្វាន់ដូកម្ពុជា ឈឿង លីណា បានចាត់ ទុកការចូលរួមការប្រកួតព្រឹត្តិការណ៍ស៊ីហ្គេមនៅកម្ពុជា ឆ្នាំ២០២៣ ជាការប្រកួតតំណាងឲ្យជាតិ លើកចុងក្រោយរបស់ខ្លួន បន្ទាប់ពីប្រឡូកក្នុងវិស័យនេះ អស់រយៈពេលជាច្រើនឆ្នាំ។
កីឡាការិនី ឈឿង លីណា បានចូលរួមការប្រកួតព្រឹត្តិការណ៍ស៊ីហ្គេមចំនួន២លើក រួចមកហើយ គឺឆ្នាំ២០១៣ ស៊ីហ្គេម មីយ៉ាន់ម៉ា ធ្លាប់ទទួលបានមេដាយសំរឹទ្ធ ១គ្រឿង និងស៊ីហ្គេម ឆ្នាំ២០១៧ នៅម៉ាឡេស៊ី មិនទទួលបានមេដាយឡើយ។ បន្ថែមលើសពីការប្រកួតស៊ីហ្គេម កីឡាការិនីជម្រើសជាតិដដែល ធ្លាប់ចូលរួមការប្រកួតកម្រិតពិភពលោក នៅប្រទេសកូរ៉េ ផងដែរ។
សម្រាប់ស៊ីហ្គេម នៅឆ្នាំ២០២៣វិញ កីឡាការិនីខាងលើ បានចាប់ផ្ដើមហ្វឹកហាត់កាលពីខែកក្កដា ឆ្នាំ២០២២ មកទល់នឹងពេលនេះ ដោយការហ្វឹកហាត់នៅពហុកីឡដ្ឋានជាតិអូឡាំពិក។ ក្នុងការហ្វឹកហាត់រាល់ថ្ងៃ កីឡាការិនីដ៏ស្រស់សោភាខាងលើ បានផ្ដោតលើការហ្វឹកហាត់ជារួម ក្រោមហេតុផលថា ខ្លួនមិនទាន់កំណត់ច្បាស់ថា នឹងត្រូវលេង២ ឬ ១វិញ្ញាសាឡើយ។
កីឡាការិនីស្រស់សោភារូបនេះ ដែលទើបបញ្ចប់ការសិក្សាពីប្រទេសវៀតណាម បាននិយាយបែបនេះថា «សម្រាប់មេដាយស៊ីហ្គេមឆ្នាំនេះ ខ្ញុំបានគិតហើយថា នឹងទទួលបាន គ្រាន់តែមិនដឹងថា មេដាយកម្រិតណា។ ស៊ីហ្គេមឆ្នាំនេះ អាចជាការប្រកួតលើកចុងក្រោយរបស់ខ្ញុំតំណាងឲ្យកម្ពុជា ព្រោះថា ខ្ញុំមានវ័យរាងជ្រេដែរហើយ គឺ២៧ឆ្នាំហើយ។ ក្រោយចប់ការប្រកួតតំណាងឲ្យជាតិនេះទៅ ខ្ញុំគិតថា ចង់ផ្ដោតលើជំនាញរបស់ខ្ញុំវិញ [គឺការងារ]ផ្នែកឱសថ ដែលទើបបញ្ចប់ការសិក្សាពីប្រទេសវៀតណាម»។
កីឡាការិនីខាងលើបានបន្ថែមថា សម្រាប់ស៊ីហ្គេមនៅកម្ពុជាលើកដំបូងនេះ ខ្លួនបានតាំងចិត្តហ្វឹកហាត់អស់ពីកម្លាំងកាយចិត្ត ដើម្បីស្វែងរកមេដាយមាស ដែលខ្លួនបានស្រមៃ ហើយអ្វីដែលពិសេសនោះ គឺជាការប្រកួតនៅលើទឹកដីរបស់ខ្លួនឯងផងដែរ៕
ប្រភព៖ Cambodia 2023
