យោងតាមការចុះផ្សាយរបស់ The Malaysian Reserve បានឲ្យដឹងថាក្លិបមហាសេដ្ឋីម៉ាឡេស៊ី Johor Darul Ta’zim FC សមាជិកលីគកំពូលម៉ាឡេស៊ី ចាប់អារម្មណ៍ចង់នាំយកខ្សែប្រយុទ្ធ Radamel Falcao ទៅចូលរួមពានរង្វាន់ Malaysia Super League 2023 ជាពិសេស AFC Champions League 2023/24។
លោក Esteban Solari គ្រូបង្វឹក Johor Darul Ta’zim FC បានថ្លែងថា៖«បច្ចុប្បន្នក្លិប JDT កំពុងធ្វើការលើកិច្ចព្រមព្រៀងជាមួយ Radamel Falcao»។
ខ្សែប្រយុទ្ធ Radamel Falcao បច្ចុប្បន្នវ័យ៣៧ឆ្នាំ ជនជាតិកូឡុំប៊ី កំពុងប្រកបអាជីពនៅក្រុម Rayo Vallecano សមាជិកលីគកំពូលអេស្ប៉ាញ ដោយបង្ហាញខ្លួនបាន៤១ប្រកួត ស៊ុតបាន៨គ្រាប់។
អាជីពជោគជ័យបំផុតរបស់ Falcao៖
-River Plate ចន្លោះឆ្នាំ ២០០៤-០៩ បង្ហាញខ្លួនបាន៩០ប្រកួត ស៊ុតបាន៣៤គ្រាប់
-Porto ចន្លោះឆ្នាំ ២០០៩-១១ បង្ហាញខ្លួន៥១ប្រកួត ស៊ុតបាន៤១គ្រាប់
-Atlético Madrid ចន្លោះឆ្នាំ ២០១១-១៣ បង្ហាញខ្លួន៦៨ប្រកួត ស៊ុតបាន៥២គ្រាប់
-Monaco ចន្លោះឆ្នាំ ២០១៣-១៩ បង្ហាញខ្លួនបាន១០៨ប្រកួត ស៊ុតបាន៦៥គ្រាប់។
គួរដឹងថាក្លិបបាល់ទាត់ Jorhor Darul Ta’zim របស់ព្រះអង្គម្ចាស់ Tunku Ismail Sultan Ibrahim បានគ្រងតំណែងជើងឯកពានរង្វាន់លីគកំពូលរបស់ប្រទេសម៉ាឡេស៊ី Malaysia Super League ចំនួន៩ឆ្នាំជាប់ៗគ្នាហើយ គឺគិតចាប់តាំងពីឆ្នាំ ២០១៤ មកម៉្លេះ។
ក្លិបដែលមានកីឡដ្ឋានជាប់ឈ្មោះជាកីឡដ្ឋានស្អាតជាងគេបំផុតនៅលើលោកក្នុងឆ្នាំ២០២០ មួយនេះបានឡើងមកលេងពានរង្វាន់លីគកំពូលម៉ាឡេស៊ី នៅរដូវកាល ២០០៥-២០០៦ ហើយឈ្នះជើងឯកជាប់ៗគ្នាគឺនៅឆ្នាំ ២០១៤,២០១៥,២០១៦,២០១៧,២០១៨,២០១៩,២០២០,២០២១ និង២០២២៕