សិល្បៈជាតិ៖ មហាជនអ្នកគាំទ្រការប្រកួត Miss Universe Cambodia មានការភ្ញាក់ផ្អើលជាខ្លាំង ខណៈទទួលបានដំណឹងថា ស្ថាប័ន Miss Universe មិនអនុញ្ញាតឱ្យក្រុមហ៊ុន CIM បន្តអាជ្ញាប័ណ្ណថ្មីក្នុងការរៀបចំកម្មវិធីនៅក្នុងប្រទេសកម្ពុជាទៀត។
ក្នុងនោះដែរ ក្រុមហ៊ុន CIM ដែលជាស្ថាប័នរៀបចំកម្មវិធីប្រកួត Miss Universe Cambodia បានចេញសេចក្ដីប្រកាសជាសាធារណៈថា ៖ «ពាក្យស្នើសុំសិទ្ធិផ្តាច់មុខរៀបចំកម្មវិធី Miss Universe Cambodia តាមរយៈក្រុមហ៊ុន Cambodia International Models (CIM) មិនត្រូវបានអនុម័ត ឬ យល់ព្រមដោយស្ថាប័ន Miss Universe ទៀតឡើយ ពោលគឺក្រុមហ៊ុន CIM ពុំទទួលបានសិទ្ធិនៃការរៀបចំបន្តទៀតនោះទេ។ ឆ្លៀតក្នុងឱកាសនេះ ក្រុមហ៊ុនសូមថ្លែងអំណរគុណចំពោះដៃគូសហការ ដៃគូឧបត្ថម្ភ អ្នកគាំទ្រ និង បេក្ខជនទាំងអស់ ដែលបានផ្តល់ជាកម្លាំងចិត្តក្នុងការដំណើរការកម្មវិធីប្រកួតរយៈពេល ៦ ឆ្នាំកន្លងមកនេះ។ ដោយឡែក ក្រុមហ៊ុន CIM នឹងបន្តធ្វើការលើកម្មវិធីប្រកួត និង ផ្តល់ឱ្យស្ត្រីកម្ពុជានូវវេទិកាដែលពួកគេអាចបង្ហាញការតស៊ូមតិ បញ្ចេញហេតុផលពាក់ព័ន្ធ និង បង្ហាញពីវប្បធម៌ ធម្មជាតិ និង អត្តសញ្ញាណរបស់ប្រទេសជាតិ។ សូមរង់ចាំសម្រាប់ការផ្លាស់ប្តូរគម្រោងក្រុមហ៊ុនរបស់យើង ដោយធានាថាក្រុមហ៊ុននឹងបន្តការបង្ហាញកម្មវិធីប្រកបគុណភាព»។
ក្រោយមានសេចក្ដីប្រកាសថ្មីបែបនេះ អ្នកលេងបណ្ដាញសង្គមជាច្រើនទៀតនៅតែមន្ទិលចំពោះការប្រកួត Miss Universe នៅឆ្នាំថ្មីនេះ តើកម្ពុជាអាចនឹងបាត់មុខពីវេទិកា Miss Universe ដែរទេ? ប្រសិនបើក្រុមហ៊ុន CIM មិនអាចបន្តអាជ្ញាប័ណ្ណថ្មី ឬក៏មានអ្នកកាន់អាជ្ញាប័ណ្ណថ្មីហើយតែមិនទាន់ប្រកាសជាផ្លូវការ?
ទោះជាយ៉ាងណាក៏ដោយ អ្នកលេងបណ្ដាញសង្គមបានបញ្ចេញមតិថា៖
«ពិតជាមិនគួរឱ្យជឿមែនថា ម្ចាស់កម្មវិធី Miss Universe ដែលជាជនជាតិថៃបានផ្លាស់ប្ដូរអ្វីៗគ្រប់យ៉ាងដែលអ្នកគ្រប់គ្នាមិនធ្លាប់គិតពីមុនមក។ ដោយស្ថាប័ន Miss Universe មិនអនុញ្ញាតឱ្យក្រុមហ៊ុន CIM បន្ត License Miss Universe Cambodia បន្តទៀតនោះទេ។ មិចបានទៅជាចឹងអស់ សូម្បីតែវៀតណាមជះលុយប៉ុនហ្នឹងហើយក៏នៅតែដូរម្ចាស់កម្មវិធីថ្មីដែរ លូវមកដល់ខ្មែរម្ដង»។
ខ្លះទៀតនិយាយថា «បើគេមិនឱ្យអីចឹងច្បាស់ណាស់ថានិងមានអ្នកថ្មីមកជំនួស ហើយគេក៏ប្រហែលជារកបានហើយដែរមើលទៅគ្រាន់តែគេមិនទាន់ប្រកាសជាផ្លូវការ មើលតែវៀតណាម ម៉ាឡេស៊ី ទៅដឹងហើយ មិនស្រួលNDថ្មីអាចមិនមែនជាជនជាតិខ្មែរយើងក៏ថាបាន»។
ហើយខ្លះទៀតថា «បានន័យថាUniverse Organizations មិនឱ្យCIMរៀបចំការប្រកួត Miss Universe Cambodia ទៀតនោះទេត្រូវការអ្នកគ្រប់គ្រងថ្មីហើយប្រសិនបើគ្មានអ្នកទិញសិទ្ធបន្តពីCIMនោះទេCambodia ប្រហែលជាបាត់មុខពី Universe stage ហើយ»៕