ផលិតកម្មចម្រៀងដែលគ្រប់គ្រងតារាចម្រៀង ល្បីល្បាញលំដាប់ពិភពលោក BTS បានសម្រេចទិញយកផលិតកម្មចម្រៀងអាមេរិកដែលជាក្រុមហ៊ុនក្ដោបក្ដាប់និងគ្រប់គ្រងលើតារាចម្រៀងល្បីៗដូចជា Justin Bieber , Ariana Grande និង Demi Lovato ក្នុងទំហំទឹកប្រាក់១ពាន់លានដុល្លារ។
អតីតផលិតកម្ម Big Hit Entertainment ដែលបច្ចុប្បន្នបានប្ដូរឈ្មោះមកជា Hybe បានប្រកាសកាលពីថ្ងៃសុក្រទី៣ខែមេសាឆ្នាំ២០២១ម្សិលមិញនេះថាផលិតកម្មបានទិញយកក្រុមហ៊ុន Ithaca របស់លោក Scooter Braun ហើយ។ នៅក្នុងកិច្ចសន្យាក៏បានបញ្ជាក់ដែរថាលោក Braun នឹងក្លាយជាសមាជិកក្រុមប្រឹក្សាភិបាលរបស់ផលិតកម្ម Hybe ហើយក្នុងកិច្ចសន្យានោះក៏បានបញ្ចូលផលិតកម្មបុត្រសម្ព័ន្ធ Big Machine របស់លោក Scott Borchetta ទៅក្រោមការគ្រប់គ្រងរបស់ Hybe ដូចគ្នាប៉ុន្តែទុកលោក Borchetta នៅតែស្ថិតក្នុងតំណែងជាអ្នកគ្រប់គ្រង។ប្រធានគ្រប់គ្រង Hybe លោក Bang Si Hyuk បានថ្លែងថា៖ «ការទិញយកផលិតកម្មបរទេសនេះគឺជាចំណុចចាប់កំណត់សម្គាល់នៃការចាប់ផ្ដើមថ្មីមួយដែលគ្មានអ្នកណាម្នាក់នឹកស្មានដល់»។
Big Boss រូបនេះបានបន្តទៀតថា៖ «ផលិតកម្មទាំងពីរនឹងរួមសហការគ្នាដើម្បីរំលំរបាំងវប្បធម៌ដោយប្រើប្រធានបទអ្វីទាំងអស់សុទ្ធតែអាចទៅរួចជានិច្ច»។ ខណៈលោក Braun ក៏បានថ្លែងដែរថា«នេះគឺជាឱកាសមួយសម្រាប់យើងគ្រប់គ្នាបង្កើតប្រវត្តិសាស្ត្រនិងការបង្កើតអ្វីដែលថ្មីៗនៅក្នុងឧស្សាហ៍កម្មតន្ត្រី»។ លោកបានបន្តទៀតថា៖ «ខ្ញុំពិតជាអរគុណណាស់ចំពោះមិត្តភាពរបស់លោក Bang ជាពិសេសឆន្ទៈគាត់ក្នុងការគាំទ្របង្កើតការវិថីមួយសម្រាប់អ្នកចម្រៀង»។បន្តិចទៀតប្រិយមិត្តទស្សនិកជនក៏ដូចជាអ្នកគាំទ្រប្រាកដជានឹងបានឃើញអ្វីដែលថ្មីៗបន្ថែមទៀតពីតារាចម្រៀងល្បីៗដូចជា BTS , Justine Bieber និង Ariana Grande ៕