ខណៈដែលតារាឯកប្រុសកូរ៉េដ៏ល្បី Park Seo Joon បានចូលរួមជាសមាិជិកសម្ដែងក្នុង Captain Marvel 2 ដែលមានចំណងជើងថា The Mavels ធ្វើឱ្យអ្នកគាំទ្រតារាប្រុសជជាតិកូរ៉េចង់ឃើញតារាប្រុសល្បីៗ ដែលមានរូបសម្បត្តិស្រស់សង្ហា សមត្ថភាព សម្ដែងល្អ ចំណែកកេរ្តិ៍ឈ្មោះក៏ល្បីល្បាញមិនចាញ់ Park Seo Joon បង្ហាញស្នាដៃសម្ដែងក្នុងរឿងហូលីវូដដូចគ្នា។
សូមចុចអាន តារាកូរ៉េ ៥រូប ដែលពាក់ព័ន្ធនឹង សារធាតុញៀន ប៊ិះនឹងអស់អនាគត!
ខាងក្រោមនេះគឺជាបញ្ជីឈ្មោះតារាសម្ដែងបុរស ៥រូបរបស់កូរ៉េខាងត្បូង ដែលហ្វេនចង់ឃើញបង្ហាញស្នាដៃក្នុងភាពយន្តហូលីវូដ៖
១. Gong Yoo
តារាសម្ដែងដំបូងដែលនៅលើគេនោះគឺ Mr. Goblin (Gong Yoo)។ ជាមួយនឹងសមត្ថភាពសម្ដែងដ៏ល្អរកកន្លែងរិះគន់គ្មានក្នុងភាពយន្តខ្នាតធំដ៏ជោគជ័យរឿង Train To Busan ធ្វើឱ្យមានក្រសែភ្នែកជាច្រើនបានផ្ដោតមកលើតារារូបនេះ ពិសេសតារារូបនេះក៏បានទទួលការស្រលាញ់ចូលចិត្តពីអ្នកគាំទ្រនៅទូទាំងពិភពលោកកាន់តែទូលំទូលាយ ដូច្នេះប្រសិនបើតារានេះបានសម្ដែងក្នុងភាពយន្តហូលីវូដ អាចជាភាពយន្តបែបឧក្រិដ្ឋកម្ម ឬមានលាយជាមួយនឹងមនោសញ្ចេតនាបែបកម្សត់។
២. Hyun Bin
បុរសសង្ហា Hyun Bin ឬ មេបញ្ជការ Ri Jeong Hyeok ពីភាពយន្តភាគជាស៊េរី Crash Landing On You កសាងបានភាពល្បីល្បាញជាសកល ដូច្នេះមិនប្លែកនោះទេដែល អ្នកគាំទ្រចង់ឃើញតារារូបនេះបង្ហាញវត្តមាននៅក្នុងភាពយន្ត ហូលីវូដ។ អ្នកគាំទ្រកំពុងគិតថាភាពយន្តស៊ើបអង្កេត ឬភាពយន្តស្នេហា ស័ក្តិសមនឹងតារារូបនេះសម្ដែងសម្រាប់ភាពយន្តហូលីវូដរបស់លោក។ ផ្ទុយមកវិញគូស្នេហ៍ទាំងក្នុងនិងក្រៅការសម្ដែងរបស់លោក កញ្ញា Son Ye Jin នឹងបង្ហាញស្នាដៃសម្ដែងភាពយន្តហូលីវូដដំបូងរបស់ខ្លួនសម្ដែងជាមួយនឹង Sam Worthington តាមរយៈស្នាដៃដឹកនាំរបស់ Andrew Niccol។
៣. Lee Min Ho
ខណៈដែលតារាសម្ដែងកូរ៉េសំបូរស្នេហ៍ Lee Min Ho កំពុងតែអបអរសាទរខួបអាយុ៣៤ឆ្នាំ កាលពីថ្ងៃទី២២ ខែមិថុនា កន្លងមកនោះ អ្នកគាំទ្រជាច្រើនចង់ឃើញតួឯកប្រុសពីភាពយន្ត The King: Eternal Monarch ដែលអ្នកគាំទ្រដាក់រហស្សនាមឱ្យថា Avatar King លើកញ្ចក់ទូរទស្សន៍ បានបង្ហាញស្នាដៃសម្ដែងក្នុងភាពយន្តហូលីវូដ។ រំលឹកឡើងវិញកាលពីឆ្នាំ២០១៥ Lee Min Ho ធ្លាប់បដិសេធសំណើសម្ដែងរួមជាមួយនឹង Brad Pitt ម្ដងរួចមកហើយក្នុងភាពយន្តហូលីវូដ Raid ។
៤. Song Joong Ki
Big Boss រូបសង្ហាពីភាពយន្ត «Descendants of the Sun» និងកំលោះម៉ាហ្វៀពីភាពយន្តភាគ «Vincenzo» តារាសម្ដែងញញឹមស្រស់ Song Joong Ki បានធ្វើឱ្យអ្នកគាំទ្រលង់នឹងតួអង្គដែលលោកសម្ដែងមិនថាក្នុងសម្លៀកបំពាក់ឈុតឯកសណ្ឋានឬក៏ក្នុងរូបភាពម៉ាហ្វៀអ៊ីតាលីនោះទេ។ បុរសសង្ហារូបនេះប្រាកដជានឹងធ្វើឱ្យពិភពលោក ចងចាំរូបគេជាក់ជាមិនខានប្រសិនបើគេមានឱកាសបង្ហាញវត្តមានក្នុងភាពយន្តហូលីវូដណាមួយ។
៥. Kim Soo Hyun
ស្ថិតក្នុងបញ្ជីចុងក្រោយនេះ Kim Soo Hyun តារាសម្ដែងពីភាពយន្តភាគល្បី «It’s Okay to Not Be Okay» គឺជាតារាសម្ដែងមួយរូបទៀតដែលហ្វេនយល់ឃើញថាលោកពិតជាស័ក្តិសមនឹងបង្ហាញវត្តមានសម្ដែងក្នុងភាពយន្តហូលីវូដ ពិសេសមានអ្នកគាំទ្រច្រើនចង់ឃើញបុរសសង្ហារូបនេះបង្ហាញស្នាដៃសម្ដែងក្នុងភាពយន្តហូលីវូដ មិនថាស្នេហា ឬ វាយតប់បែបផ្សងព្រេង។