រឿងរ៉ាវល្បីផ្អើលទីក្រុង ជនជាតិចិនយកសត្វតោមកចិញ្ចឹមក្នុងផ្ទះដោយខុសច្បាប់ដែលបង្កឱ្យមានការខ្លាចរអា រហូតឈានដល់ការចុះដកហូតសត្វតោយកទៅដាក់នៅសួនសត្វភ្នំ តាម៉ៅ បានក្លាយជារឿងដែលមហាជនផ្ដោតការយកចិត្តទុកដាក់ និងជជែកវែកញែកគ្នាច្រើនលើបណ្ដាញសង្គម ដោយមានមតិខ្លះបានយល់ស្របចំពោះការយកសត្វតោ ដែលជាប្រភេទសត្វព្រៃឱ្យទៅរស់នៅក្នុងព្រៃតាមធម្មជាតិរបស់វា ខណៈដែលសំឡេងមួយភាគីទៀត បែរជាបង្ហាញនូវការអាណិតអាសូរចំពោះសត្វតោ ដែលធ្លាប់បានចិញ្ចឹមបីបាច់យ៉ាងល្អ និង ផ្ដល់ភាពកក់ក្ដៅ ជំរក (មានបន្ទប់មានពូក) ចំណីអាហារ (ចម្អិនឆ្អិន) មិនឱ្យខ្វះ ម្យ៉ាងវិញទៀតនៅពេលយកវាទៅព្រលែងឱ្យទៅរស់នៅក្នុងសួនសត្វនោះ សត្វតោបានបង្ហាញសញ្ញាក្រៀមក្រំ ព្រមទាំងមិនព្រមទទួលទានចំណីដែលបានដាក់ឱ្យបរិភោគនោះឡើយ។
សូមចុចអាន អាជ្ញាធរ ចុះដកហូតសត្វតោឈ្មោលមួយក្បាល ពីជនជាតិចិន
យ៉ាងណាមិញកាលពីល្ងាចម្សិលមិញ នៅពេលរូបភាពដែលម្ចាស់ជាជនជាតិចិនបានទៅលេងសត្វតោនោះភ្នំ តាម៉ៅ សត្វតោនិងម្ចាស់ឱបក្រសោបគ្នាហាក់បង្ហាញពីការនឹករលឹកត្រូវបានបង្ហោះ និង ចែករំលែកយ៉ាងគគ្រឹកគគ្រេងលើបណ្ដាញសង្គមហ្វេសប៊ុកទៀតនោះ កាន់តែធ្វើឱ្យអ្នកដែលបានឃើញហើយ បានបញ្ចេញនូវទស្សនៈអាណិតអាសូរ និង ចង់ឱ្យសត្វតោនោះបានវិលត្រលប់ទៅផ្ទះ និងជួបជុំជាមួយនឹងម្ចាស់ ក៏ដូចជាសត្វឆ្កែ ដែលជាមិត្តសម្លាញ់របស់គេវិញ។
សូមចុចអាន ម្ចាស់តោបញ្ជាក់ច្បាស់ៗថា «ខ្ញុំទទួលយកការពិន័យរបស់រដ្ឋតែខ្ញុំស្នើយកតោត្រឡប់មកវិញ»
ក្នុងចំណោមអ្នកបញ្ចេញមតិ យល់ស្របចំពោះការលើកឡើងចង់ឱ្យសត្វតោបានត្រលប់មកផ្ទះវិញនោះ ឃើញថាតារាចម្រៀងល្បីកញ្ញា សុខ ពិសី តារាចម្រៀងប្រចាំផលិតកម្ម សាន់ដេ ដែលជាអ្នកស្រលាញ់សត្វចិញ្ចឹម និងមានចិញ្ចឹមឆ្កែផងដែរនោះ ក៏ជាអ្នកគាំទ្រមួយរូបនូវ្ការលើកឡើងនេះដែរ ព្រោះកញ្ញា បានបង្ហោះសំណេរស្នើសុំឱ្យសត្វតោនោះបានត្រលប់មកជួបជុំម្ចាស់វិញនៅព្រឹកថ្ងៃទី៣០ ខែមិថុនា ឆ្នាំ២០២១នេះ តាមរយៈការស៊ែរបន្ត (Share) នូវសំណេរដើម របស់លោក Qi Xiao ដែលជាម្ចាស់តោបានបង្ហោះនៅលើគណនីហ្វេសប៊ុកផ្ទាល់ខ្លួនរបស់លោក។
«សូមមេត្តាអនុញ្ញាតអោយតោបានវិលត្រលប់មកផ្ទះវិញផង ព្រោះគេបានកាច់ចង្កូម និង ក្រចកអស់ហើយ បើខុសឆ្គង សូមអនុគ្រោះ» នេះគឺជាការបង្ហោះរបស់កញ្ញា សុខ ពិសី
សំណេរកញ្ញា សុខ ពិសី ត្រូវបានចែករំលែកជាបន្តទៀតយ៉ាងច្រើន ក្នុងនោះមានការគាំទ្រច្រើនចំពោះការលើកឡើងរបស់កញ្ញា ប៉ុន្តែក៏មានមតិមួយចំនួនមិនបានយល់ស្របចំពោះការលើកឡើងរបស់កញ្ញានោះទេ ដោយមានអ្នកខ្លះទៀតបានលើកឡើងថា «ច្បាប់មិនអនុញ្ញាតនោះទេ» ខណៈអ្នកខ្លះទៀត បានលើកឡើងថា «ប្រសិនបើបងប្អូនបារម្ភពីទឹកដីពីប្រទេសជាតិ ដូចទៅនឹងការបារម្ភសត្វតោមួយក្បាលនេះ មិនដឹងជាល្អប៉ុណ្ណានោះទេ»។
