ព្រឹត្តិការណ៍ការប្រកួតកីឡាបាល់ទាត់ ដ៏ធំនៅលើពិភពលោក FIFA World Cup ដែលតែងតែមានវត្តមានរាល់ ៤ឆ្នាំម្តង ទើបតែបញ្ចប់ការប្រកួតកន្លងទៅកាលពីចុងឆ្នាំ២០២២ នៅប្រទេសកាតារ ហើយម្ចាស់ជើងឯកបានទៅលើក្រុមជម្រើសជាតិអាហ្សង់ទីន ខណៈជើងឯករងបានលើក្រុមជម្រើសជាតិបារាំង។
ក្រោយចប់ព្រឹត្តិការណ៍ FIFA World Cup ឆ្នាំ២០២២ មិនទាន់បាន១ឆ្នាំផង ពេលនេះមានប្រទេសជាច្រើនចង់ថ្លៃធ្វើជាម្ចាស់ផ្ទះសម្រាប់ឆ្នាំ២០៣០ ខណៈឆ្នាំ២០២៦ គឺមានប្រទេសចំនួន៣ នឹងរួមគ្នាធ្វើជាសហម្ចាស់ផ្ទះ ក្នុងនោះមានដូចជាប្រទេសកាណាដា ម៉ិកស៊ិក និងសហរដ្ឋអាមេរិក។
ដោយឡែកសម្រាប់ឆ្នាំ២០៣០ ខាងមុនឃើញថា កន្លងមកមានតែប្រទេសចំនួន ២ប៉ុណ្ណោះ ដែលបានចេញមុខ ចង់ចូលរួមដេញថ្លៃធ្វើជាម្ចាស់ផ្ទះសម្រាប់ព្រឹត្តិការណ៍ FIFA World Cup 2030 នោះគឺប្រទេសអេស្ប៉ាញ និងព័រទុយហ្គាល់ តែពេលនេះម៉ារ៉ុក ក៏នឹងចូលរួមជាមួយផងដែល។
ព្រះមហាក្សត្រនៃប្រទេសម៉ារ៉ុក គឺព្រះអង្គម្ចាស់ Mohammed VI បានប្រកាសកាលពីថ្ងៃអង្គារ ខែមីនា ឆ្នាំ២០២៣ នេះថា៖ ព្រះអង្គបានសម្រេចចិត្តក្នុងការ ចូលរួមដេញថ្លៃរួមគ្នាជាមួយប្រទេសអេស្ប៉ាញ និងព័រទុយហ្គាល់ដើម្បីធ្វើជាម្ចាស់ផ្ទះព្រឹត្តិការណ៍ FIFA World Cup ឆ្នាំ 2030 ខាងមុននេះដែរ។
សាររបស់ព្រះអង្គម្ចាស់ Mohammed VI បានថ្លែងនៅក្នុងឱកាសនៃការធ្វើបទបង្ហាញនៃពានរង្វាន់សមិទ្ធផលឆ្នើមប្រចាំឆ្នាំ២០២២ CAF ដល់ព្រះមហាក្សត្រ នៅទីក្រុង Kigali ប្រទេសរវ៉ាន់ដា។
គួរឲ្យដឹថថា សម្រាប់ព្រឹត្តិការណ៍ពានរង្វាន់ពិភពលោក FIFA World Cup 2026 នឹងមានក្រុមចំនួន ៤៨ប្រទេស មកពីជុំវិញទ្វីប បែងចែកជា ១៥ពូល ខណៈការប្រកួតកើនឡើងដល់ ១០៨ប្រកួត នៅ៣ប្រទេស ជាសហម្ចាស់ផ្ទះគឺ ប្រទេសកាណាដា ម៉ិកស៊ិក និងសហរដ្ឋអាមេរិក ដែលនឹងចាប់ផ្តើមនៅថ្ងៃទី១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦៕
