សិល្បៈ​ជាតិ​៖​ ប្រធាន​បទ​ខោ​ដំរី​មួយ​នេះ​បាន​ក្លាយ​ជា​ប្រធាន​បទ​ក្ដៅ​នៅ​លើ​បណ្ដាញ​សង្គម​ ដែល​ហាក់​ដូច​ជា​ញុះញង់​ឱ្យ​មាន​ជម្លោះ​ និង​ការ​រើស​អើង​ពូជសាសន៍​ បន្ទាប់​ពី​មាន​ហ្វេសប៊ុក​មួយ​ឈ្មោះ​ @​Amazing​ Asia​ cultural​ hub ​បាន​បង្ហោះ​រូប​ភាព​រូប​ចម្លាក់​នៅ​លើ​ជញ្ជាំង​ប្រាសាទ​ស្លៀក​ខោ​រូប​ដំរី​ ព្រម​ទាំង​សរសេរ​ចំណង​ថា​ ៖​ «​Thank​ for​ support​ មាន​ន័យ​ថា​ អរគុណ​សម្រាប់​ការ​គាំទ្រ​ខោ​រូប​ដំរី​របស់​ខ្មែរ​ យើង​មាន​ភស្តុតាង​នៅ​លើ​ជញ្ជាំង​ប្រាសាទ​អង្គរ​វត្ត​»​ ។​

ក្រោយ​ការ​បង្ហោះ​នេះ​ គេ​ឃើញ​មាន​អ្នក​លេង​បណ្ដាញ​សង្គម​ហ្វេសប៊ុក​ជា​ជន​ជាតិ​ថៃ​ជា​ច្រើន​មាន​អារម្មណ៍​ខឹង​សម្បារ​ ក្ដៅ​ចិត្ត​ដូច​បាយ​កំពុង​ពុះ​ឡើង​ និង​មាន​ខ្លះ​ទៀត​បញ្ចេញ​មតិ​មិន​យល់​ស្រប​នឹង​ការ​បង្ហោះ​នោះ​ ។ រហូត​ដល់​មាន​សារព័ត៌មាន​ថៃ​ជា​ច្រើន​បាន​ចេញ​ផ្សាយ​ពី​អត្ថបទ​មិន​ល្អ​និយាយ​ពី​កម្ពុជា​យើង​ ដោយ​ពួក​គេ​បាន​ផ្សាយ​ថា​ «អ្នក​លេង​បណ្តេញ​សង្គម​នៅ​កម្ពុជា​មួយ​ចំនួន​បាន​ចូល​មក​បញ្ចេញ​មតិ​យល់​ស្រប​ចំពោះ​ការ​លើក​ឡើង​នេះ​ ហើយ​បញ្ជាក់​ថា​ ខោ​ដំរី​ជា​របស់​ប្រទេស​កម្ពុជា​ ព្រម​ទាំង​បង្ហាញ​ភស្តុតាង​នានា​ដើម្បី​បញ្ជាក់​ថា​ វា​ពិត​ជា​របស់​កម្ពុជា​ »​។​

បើ​យោង​តាម​សារព័ត៌មាន​របស់​ថៃ​ឈ្មោះ​ khaosod​ បាន​ឱ្យ​ដឹង​ថា​ អ្នក​លេង​បណ្ដាញ​សង្គម​ជា​ជន​ជាតិ​ថៃ​ជា​ច្រើន​នាក់​បាន​បញ្ចេញ​មតិ​ខុស​ៗ​គ្នា​ ដោយ​ពួក​គេ​លើក​ឡើង​ស្រដៀង​គ្នា​ថា​ ឱ្យ​ខ្មែរ​យក​ទៅ​ចុះ​ យក​អ្វី​ដែល​ជា​របស់​ថៃ​តាម​ត្រូវ​ការ​ ។ អ្នក​លេង​បណ្តាញ​សង្គម​ថៃ​អះអាង​ថា​ ខោ​រូប​ដំរី​ គឺ​ជា​របស់​ថៃ​ ហើយ​នៅ​ពេល​ភ្ញៀវ​ទេសចរ​បរទេស​មក​កម្សាន្ត​នៅ​ប្រទេស​ថៃ​ ពួក​គេ​និយម​ទិញ​ខោ​រូប​ដំរី​ស្លៀក​ដើរ​លេង​ ។ លើស​ពី​នេះ​ ភ្ញៀវ​ទេសចរ​បរទេស​ទាំង​នោះ​បាន​ទិញ​ខោ​រូប​ដំរី​របស់​ថៃ​សម្រាប់​ផ្ញើ​ទៅ​ក្រៅ​ប្រទេស​ទៀត​ផង​ ។​

យ៉ាង​ណា​មិញ​ បើ​តាម​ការ​សង្កេត​ គេ​ពិត​ជា​មើល​ឃើញ​ថា​ ខោ​រូប​ដំរី​ដែល​មាន​ច្រើន​ស្ទាយ​នេះ ​គឺ​មាន​ដាក់​តាំង​លក់​នៅ​តំបន់​ប្រាសាទ​អង្គរ​វត្ត​ដូច​គ្នា​ ដែល​ភាគ​ច្រើន​ភ្ញៀវទេសចរ​មក​លេង​តំបន់​នេះ​និយម​ទិញ​ស្លៀក​។​ ប៉ុន្តែ​មែន​ទែន​ទៅ​ គ្មាន​ជនជាតិ​ខ្មែរ​ណា​ម្នាក់​ដែល​ចេញ​មុខ​អះអាង​ថា​ ខោ​ដំរី​ជា​របស់​ខ្មែរ​ និង​ទាមទារ​ឱ្យ​ចូល​ជា​សម្បត្តិ​ផ្ទាល់​ខ្លួន​ណា​មួយ​នោះ​ទេ​ ក្រៅ​តែ​ពី​ការ​ឆោឡោ​ពី​ភាគី​ជិត​ខាង​តែ​ប៉ុណ្ណោះ​។​

បើ​តាម​ការ​លើក​ឡើង​ដោយ​ក្រុម​ព្រះសុរិយា​ បាន​បញ្ចេញ​ទស្សនៈ​ខ្លួន​នៅ​លើ​បណ្ដាញ​សង្គម​ថា​ ៖ «ពេល​ខ្លះ​ត្រូវ​ចេះ​ពិចារណា​ផង​ ទាំង​អ្នក​លក់​ទាំង​អ្នក​ទិញ​ កុំ​ដើម្បី​តែ​ពាក្យ​ថា​ស្រលាញ់​ ហួង​ហែង​ ម្ចាស់​ដើម​ផ្តាច់​មុខ​ធ្វើ​ព្រលឹង​មហាបុរស​ខ្មែរ​ទាំង​អស់​ ត្រូវ​រង​ភាព​អាម៉ាស់​ដោយ​ទង្វើ​របស់​ខ្លួន​ ប្រព្រឹត្ត​ដោយ​មិន​ដឹង​ខ្លួន​ ។ ត្រូវ​ខិត​ខំ​រៀន​សូត្រ​ស្វែង​យល់​ពី​អ្វី​ដែល​ជា​របស់​ខ្លួន​ពិត​ប្រាកដ​ កុំ​ខឹង​គេ​បើ​គេ​រិះគន់​អោយ​ខ្លួន​ឯង​ភ្ញាក់​ខ្លួន​ពី​ដំណេក​នេះ​»​។​ សារ​នេះ​បាន​ធ្វើ​អ្នក​លេង​បណ្ដាញ​សង្គម​ជា​ច្រើន​នាក់​ចូល​រួម​ជា​មតិ​ស្រដៀង​គ្នា​ថា​ ផេក​ថៃ​ទាំង​នោះ​​តែ​មាន​ចរិត​ញុះញង់​ និង​ចង់​ឱ្យ​ខ្មែរ​មាន​វិវាទ​ជា​ថៃ​ណាស់​មើល​ទៅ​។​

សូម​ជម្រាប​ថា​ ជុំ​វិញ​ការ​ផ្សព្វផ្សាយ​របស់​ថៃ​បែប​នេះ​ គេ​មិន​ទាន់​ដឹង​ថា​ តើ​មាន​ចេតនា​អ្វី ​ឬ​គោល​បំណង​អ្វី​ឱ្យ​ពិត​ប្រាកដ​នោះ​ទេ​? ​គេ​រំពឹង​ថា​នឹង​មាន​ចំណាត់​ការ​ណា​មួយ​ចេញ​ពី​ផ្នែក​ពាក់ព័ន្ធ​ចំពោះ​បញ្ហា​នេះ​៕​

Share.