រឿងរ៉ាវរវាងសត្វតោនិងម្ចាស់ជនជាតិចិន នៅតែស្ថិតក្នុងតាមដានយ៉ាងយកចិត្តទុកដាក់ពីក្រុមអ្នកលេងបណ្ដាញសង្គម មិនតែប៉ុណ្ណោះក៏មានការចូលរួមអំពាវនាវពីសំណាក់តារាល្បីចង់ឃើញសត្វតោមួយក្បាលនោះវិលទៅជួបជុំជាមួយនឹងម្ចាស់របស់ខ្លួនវិញ។ បន្ទាប់ពីតារាចម្រៀងផលិតកម្ម សាន់ដេ កញ្ញា សុខ ពិសី ដែលចេញមុខផុសសុំឱ្យអាជ្ញាធរប្រគល់ សត្វតោមួយក្បាលនោះទៅឱ្យម្ចាស់ដើមកាលពីព្រឹកមិញ លោក ខេម តារាចម្រៀងប្រចាំផលិតកម្ម Galaxy Navatra ក៏បានចេញមកសុំឱ្យប្រគល់សត្វតោនោះទៅម្ចាស់វិញដូចគ្នាដែរនា១២ នាទីមុននេះ (៣០ មិថុនា ឆ្នាំ២០២១) នៅហ្វេសប៊ុកផ្លូវការរបស់លោក។
លោក ខេម បានផុសសំណេរលើហ្វេសប៊ុករបស់លោកថា៖ «អង្វរករគួរតែជូនសត្វតោមួយក្បាលនេះជូនគាត់វិញទៅអាណិតណាស់ នៅលើពិភពលោកក៏គេអនុញ្ញាត្តអោយចិញ្ចឹមដែរ»
យ៉ាងណាមិញការលើកឡើងរបស់លោកខាងលើក៏មានមតិគាំទ្រ ចំពោះការយល់ឃើញរបស់តារារូបនេះច្រើនគួរសម៖
«យល់ស្របដូចបងណាស់» «ត្រូវបង» «ពិតមែនហើយឱ្យគាត់វិញទៅ»
តែក៏មានមតិមួយចំនួនទៀត មិនបានបង្ហាញទស្សនៈនិងការយល់ឃើញប្រឆាំងទៅនឹងការលើកឡើងរបស់ខេមដូចគ្នាដែរ៖
«យើងមិនអាចប្រៀបធៀបទៅប្រទេសផ្សេងៗដែលគេអនុញ្ញាតឲ្យប្រជាជនគេចិញ្ចឹមបានទេបង ព្រោះច្បាប់ប្រទេសផ្សេងគ្នា។ ខ្ញុំយល់មនោសញ្ចេតនា រវាងម្ចាស់និងសត្វតោបង ប៉ុន្ដែច្បាប់ធំជាងមនោសញ្ចេតនា»
គួរដឹងដែរថាម្ចាស់តោសុខចិត្តទទួលពិន័យទៅតាមច្បាប់របស់រដ្ឋ ប៉ុន្តែលោកនៅតែចិញ្ចឹមចិត្តចង់បានសត្វតោរបស់លោកមកចិញ្ចឹមវិញ ដោយលោកបានលើកឡើងថា ៖ «ខ្ញុំទទួលយកការពិន័យដែលរដ្ធដាក់ពិន័យលើខ្ញុំ ហើយ នឹងធ្វើច្បាប់ចិញ្ចឹមដោយស្របច្បាប់ដែលពាក់ព័ន្ធដោយគ្រាន់តែសង្ឃឹមថារដ្ឋាភិបាលអាចបើកចិត្តហើយឱ្យខ្ញុំទទួលយកតោខ្ញុំត្រលប់មកវិញ»៕