រឿងរ៉ាវប្លែកៗ៖ វីដេអូបទចម្រៀងរបស់តារាចម្រៀងល្បីឈ្មោះ Lee Seung Hwan ត្រូវបានបញ្ជាឱ្យលុបចោលព្រោះតែអ្នកទស្សនានាំគ្នាខ្លាចនិងព្រឺព្រួចព្រោះតែគេជឿថាបទចម្រៀងដែលថតនៅស្ថានីយរថភ្លើងនោះមានថតជាប់ខ្មោចស្រី។
រឿងរ៉ាវនេះគឺជារឿងខ្មោចដែលធ្លាប់ក្លាយជាព័ត៌មានដ៏ធំមួយនៅក្នុងប្រទេសកូរ៉េខាងត្បូង ដោយសារតែតារាចម្រៀងល្បីឈ្មោះបានទៅថតវីដេអូ MV នៅក្នុងស្ថានីយរថភ្លើង ប៉ុន្តែបែរជាថតជាប់នារីអាថ៌កំបាំងម្នាក់ដែលឈរនៅត្រង់កន្លែងមួយដែលពេលថតមិនមានអ្នកណានៅឈរនោះឡើយ។ ហើយអ្វីដែលធ្វើឱ្យមហាជនកាន់តែភ័យខ្លាចទៀតនោះព្រោះទីតាំងថតធ្លាប់កើតមានហេតុការណ៍ឃាតកម្ម ដ៏រន្ធត់មួយ។
កាលពីឆ្នាំ១៩៩៧ តារាចម្រៀង Lee Seung Hwan និងក្រុមការងារកំពុងដុតដៃដុតជើងគ្នាដើម្បីផលិតអាល់ប៊ុមចម្រៀងទី៥របស់ខ្លួន ហើយបានជ្រើសរើសស្ថានីយរថភ្លើងក្រោមដីនៅទីក្រុងសេអ៊ូលជាទីតាំងថតវីដេអូបទចម្រៀងមនោសញ្ចេតនារបស់ខ្លួន។
នៅក្នុងបទចម្រៀងនេះក្រៅពីក្រុមការងាផលិតហើយនឹងតារាចម្រៀងល្បីហើយនោះនៅមានបុគ្គលអាថ៌កំបាំងម្នាក់បានបង្ហាញវត្តមាននៅក្នុង MV រំជួលព្រលឹងនេះផងដែរ។ ក្រោយបទចម្រៀងនេះថតចប់មិនមានក្រុមការងារណាចាប់អារម្មណ៍ភាពមិនប្រក្រតីនោះឡើយ រហូតដល់បទនេះត្រូវបានចាក់ផ្សាយតាមបណ្ដាស្ថានីយទូរទស្សន៍ផ្សេងៗស្រាប់តែមានអ្នកសង្កេតមានមនុស្សស្រីម្នាក់ឈរក្បែរអ្នកបើករថយន្តភ្លើង ដូច្នេះមហាជនក៏ចាប់ផ្ដើមសង្ស័យថាតើនារីម្នាក់នេះជាអ្នកណា? ហេតុដូច្នេះហើយទើបក្រុមផលិតចាប់ផ្ដើមត្រួតពិនិត្យឡើងវិញ ព្រោះគិតថានារីម្នាក់នោះអាចជាក្រុមការងារផលិតរបស់ខ្លួន ប៉ុន្តែលទ្ធផលក្រុមការងារជានារីដែលទៅថតមិនមានអ្នកណាម្នាក់មើលទៅមានទ្រង់ទ្រាយដូចជានារីម្នាក់ដែលថតជាប់ក្នុង MV នោះឡើយ។
ចំណែកអ្នកបញ្ជាចង្កូតរថភ្លើងក៏បានចេញមកអះអាងដែរថាមិនមាននារីណាម្នាក់ឈរនៅក្បែរលោកនោះឡើយ។នៅពេលដែលការស្រាវជ្រាវចេញមកបែបនេះ ធ្វើឱ្យអ្នកដែលទស្សនាវីដេអូចម្រៀងនោះនាំគ្នាភ័យខ្លាច ព្រោះបានន័យថា MV នេះថតជាប់ខ្មោចពិតមែន។ ទីបំផុត MV ត្រូវបានហាមឃាត់ចាក់ផ្សាយ ហើយក្រុមការងារក៏ផលិតវីដេអូថ្មីដែលមិនមានខ្មោចវិញ។
ជាមួយគ្នានោះដែរ ក្រោយពេលដែលស្ថានីយទូរទស្សន៍ SBS បានយកវីដេអូនេះមកវិភាគក្នុងកម្មវិធីព័ត៌មានរបស់ខ្លួន ក្រោយមកស្រាប់តែមានអ៊ុំស្រីម្នាក់បានខលទាក់ទងមកកម្មវិធីហើយប្រាប់ថានារីម្នាក់នោះគឺបងស្រីគាត់ដែលត្រូវគេសម្លាប់។ មុនទីតាំងនេះត្រូវបានកសាងជាស្ថានីយរថភ្លើង កាលពីឆ្នាំ១៩៦១ បរិវេណក្បែរទីតាំងនេះមានកើតហេតុឃាតកម្ម ដោយមាននារីម្នាក់ត្រូវបុរសម្នាក់ជាបងប្អូនជីដូនមួយច្របាច់កសម្លាប់ ព្រោះតែនាងមិនព្រមស្រលាញ់ខ្លួន ហើយមូលហេតុនោះព្រោះនាងគិតថាជាសាច់ញាតិនឹងគ្នា។ សម្លាប់រួចគេបានបោះសាកសពចោលក្នុងទន្លេហាន់។ កម្មករដែលមកធ្វើការសាងសង់នៅទីនេះនាំគ្នាអះអាងថាត្រង់នោះលងសាហាវណាស់ មានមនុស្សជាច្រើននាក់ត្រូវខ្មោចលង។
ករណីឃាតកម្មរបស់នាងត្រូវបានសើរើឡើងវិញដោយបណ្ដាញសារព័ត៌មាននានាក្នុងប្រទេស។ ខណៈនោះដែរមានគ្រូបញ្ជាន់រូបជាច្រើនចេញមកដាស់តឿនថា កុំចេញព័ត៌មាននេះទៀត ព្រោះវិញ្ញាណអាចនឹងមិនពេញចិត្ត ប៉ុន្តែមិនមានព័ត៌មានណាស្ដាប់តាមឡើយ។ ទីបំផុតស្រាប់តែកើតមានភ្លើងឆេះក្នុងស្ថានីយរថភ្លើង ដែលចៃដន្យដូចនឹងអ្វីដែលគេបានដាស់តឿនទើបគ្រប់គ្នាភ័យខ្លាច។
រឿងនេះក៏មានអ្នកគៀបសង្កត់ឱ្យតារាចម្រៀងនិងអាជ្ញាធរដែលគ្រប់គ្រងស្ថានីយចេញមកអធិប្បាយចំពោះរឿងនេះដោយ Lee Seung Hwan បានអះអាងថាភាពពិតជាក់ស្ដែងមិនមានការរៀបចំរឿងនេះទេ ចំណែកអ្នកជំនាញផ្នែកកាត់តបានចេញមកវិភាគថា MV នេះមិនមានការកាត់តនោះទេ គ្រប់យ៉ាងគឺជាការពិត រហូតធ្វើឱ្យ MV នេះក្លាយជា MV ក្នុងប្រវត្តិសាស្ត្រដែលគ្រប់គ្នាជឿថាថតជាប់វិញ្ញាណ។
ប៉ុន្តែក្រោយ២០មក ពោលកាលពីឆ្នាំ២០២១ គេហទំព័រ Kbizoom បានចុះផ្សាយថាអ្នកបើកបររថភ្លើងដែលស្ថិតក្នុងបទចម្រៀងនោះបានចេញមកសារភាពថានារីដែលនៅបទចម្រៀងនោះគឺជាមនុស្សដែលខ្លួនស្គាល់។ នារីនោះចូលចិត្តរថភ្លើងហើយឆ្ងល់ពីក្បាលរថភ្លើងទើបនាងទទូចអង្វករលោកសុំឡើងទៅមើល ដូច្នេះទើបលោកអនុញ្ញាតឱ្យនាងឡើងមើល ប៉ុន្តែអកុសលបែរជាត្រូវគេថតជាប់ក្នុងបទចម្រៀង។ ការដែលអ្នកបើកលាក់បាំង ព្រោះករណីនេះខុសច្បាប់បើខ្លួនសារភាពការពិតច្បាស់ជាអស់ការងារ ដូច្នេះទើបរួមគំនិតគ្នាលាក់បាំងការពិតរហូតដល់អ្នកបើកបរចូលនិវត្តន៍ទើបចេញមកប្រាប់សារភាពការពិត។ ថ្វីត្បិតពេលនេះគ្រប់គ្នាដឹងការពិត ប៉ុន្តែអនាគត Lee Seung Hwan ត្រូវបាត់បង់មិនអាចស្រោចស្រង់បាន ចាប់តាំងពីកើតមានហេតុការណ៍នោះមក។
ទីបំផុតចម្ងល់ដែលស្ថិតនៅជាអាថ៌កំបាំងអស់រយៈពេល២៦ឆ្នាំត្រូវបានទម្លាយ ហើយការពិតនោះគឺក្នុងបទចម្រៀងខាងលើមិនបានថតជាប់ខ្មោចស្រីដូចការសន្និដ្ឋានតាំងពីដំបូងនោះឡើយ៕