សិល្បៈជាតិ៖ រហូតមកទល់ពេលនេះ នៅលើបណ្ដាញសង្គមហ្វេសប៊ុកនៅតែបន្តមានការវែកញែកពីរឿងស្លៀកពាក់របស់លោកបណ្ឌិតច្នៃម៉ូដ ឯម រាម នៅក្នុងព្រឹត្តិការណ៍ PMA 2023។ ទាំងមហាជន តារាសិល្បៈ សុទ្ធបង្ហាញមតិផ្សេងៗគ្នាចំពោះរឿងនេះ។
ដោយឡែក តារាសម្ដែងស្រី នី មុនីនាថ ក៏បានចេញមកបង្ហោះសារបញ្ចេញមតិរបស់ខ្លួន ដោយកញ្ញាលើកឡើងថា ការស្លៀកពាក់របស់លោកបណ្ឌិតច្នៃម៉ូត ឯម រាម គឺជាការបង្ហាញអំពីជំនាញរបស់លោកនៅកម្ពុជា។ សូមឱ្យមហាជនឈ្វេងយល់ឱ្យអំពីអំពីសិល្បៈវប្បធម៌ និងការច្នៃម៉ូតបែបស្រមើស្រមៃ។
ក្នុងនោះ កញ្ញា នី មុន្នីនាថ បានសរសេររៀបរាប់ថា ៖ «ខ្ញុំឃើញគាត់ស្លៀកពាក់បែបនេះ ខ្ញុំឃើញបងប្អូនយើងមួយចំនួននាំគ្នាស្តីជេរគាត់ តែធាតុពិតគាត់ធ្វើបែបនេះគឺជាការបង្ហាញជំនាញរបស់គាត់ ដែលនៅកម្ពុជាយើង។ សូមឈ្វេងយល់ឲ្យច្បាស់អំពីសិល្បៈវប្បធម៌ និងការច្នៃម៉ូដបែបស្រមើស្រមៃ ។ ខ្ញុំសូមអធ្យាស្រ័យ មិនការពារគាត់ទេ គ្រាន់តែសុំឲ្យបងប្អូនសិក្សាឈ្វេងយល់និងបែងចែកឲ្យច្បាស់សិនណា បើមានការខ្វែងគំនិតគ្នា សុំកុំប្រើវប្បធម៌ជេរប្រទេចគ្នា។ សូមបញ្ចេញមតិកែតម្រូវ ឬរិះគន់ស្ថាបនាដោយសុជីវធម៌ »។
សូមជម្រាបថា លោក ឯម រាម ជាអ្នករចនាម៉ូតបែបសហសម័យ ដែលមានស្នាដៃលេចធ្លោទាំងនៅក្នុងប្រទេស និងក្រៅប្រទេស។ លោក បានបញ្ចប់សញ្ញាបត្របណ្ឌិតផ្នែករចនាម៉ូតពីប្រទេសបារាំង កាលពីឆ្នាំ២០០៧ ដែលនៅគ្រានោះ លោកអាចធ្វើការងារនៅប្រទេសបារាំងដោយងាយស្រួល ប៉ុន្តែលោកសុខចិត្តបោះបង់ និងសម្រេចចិត្តត្រឡប់មកប្រទេសខ្មែរវិញ ព្រោះ ចង់លើកស្ទួយសិល្បៈច្នៃម៉ូតក្នុងប្រទេសកំណើតឱ្យរីកចម្រើន និងកាន់តែសម្បូរបែប។ សព្វថ្ងៃនេះ លោក ជាគ្រូបង្រៀនផ្នែកគំនូរ អ្នកច្នៃម៉ូដគ្រឿងអលង្ការ មកុដក្បាច់ខ្មែរបុរាណ និងរចនាម៉ូតសម្លៀកបំពាក់ផងដែរ។
