លោកឧត្តមសេនីយ៍ GEN OSOTH BHAVILAI ប្រធានសហព័ន្ធកីឡាជនពិការអាស៊ីអាគ្នេយ៍ (APSF) បានបង្ហាញអារម្មណ៍សប្បាយរីករាយ ក្នុងព្រះរាជពិធីសុំព្រះអគ្គិជ័យកីឡាសម្រាប់កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ កាលពីថ្ងៃទី២១ ខែមីនា ឆ្នាំ២០២៣ ប្រាសាទអង្គរវត្ត ខេត្តសៀមរាប ប្រទេសកម្ពុជាថា៖ «វាពិតជាមានកិត្តិយសណាស់ដែលបានចូលរួមក្នុងព្រឹត្តិការណ៍ដ៏អស្ចារ្យដែលជាសញ្ញាចាប់ផ្តើមកីឡាស៊ីហ្គេម លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា»។
ថ្ងៃនេះជាប្រវត្តិសាស្ត្រដែលបានប្រារព្ធព្រះរាជពិធីសុំព្រះអគ្គិជ័យកីឡាជាផ្លូវការនៅប្រាសាទអង្គរវត្តដ៏ល្បីល្បាញទូទាំងពិភពលោកដែលនឹងស្ថិតជាប់ក្នុងបេះដូងរបស់យើងទាំងអស់គ្នា ស្របពេលប្រទេសកម្ពុជារៀបចំព្រឹត្តិការណ៍ពហុកីឡាជាលើកដំបូងក្នុងប្រវត្តិសាស្ត្រ។
ប្រធានសហព័ន្ធកីឡាជនពិការអាស៊ីអាគ្នេយ៍ (APSF) និងសហគប៉ារ៉ាឡាំពិកអាស៊ាន បានថ្លែងអំណរព្រះរាជគុណដ៏ថ្លៃថ្លាបំផុតចំពោះព្រះបាទ នរោត្តម សីហមុនី ដែលស្តេចយាងជាព្រះរាជាធិបតីភាពក្នុងព្រះរាជពិធីព្រឹកនេះ។ ដូចប្រជាជន និងពលរដ្ឋកម្ពុជាទាំងអស់ដែរ ជាសហគមជនមានពិការភាពអាស៊ានពិតជារំភើបរីករាយ និងទន្ទឹងឆ្ពោះទៅរកកីឡាអាស៊ានប៉ារ៉ាហ្គេម ដែលជាការរៀបចំដំបូងនៅកម្ពុជា។
មិនត្រឹមព្រះរាជពិធីសុំព្រះអគ្គិជ័យកីឡាថ្ងៃនេះទេដែលជាព្រឹត្តិការណ៍ដ៏អាស្ចារ្យ និងជាកេរ្តិ៍មរតកបញ្ជាក់ពីការប្តេជ្ញាចិត្តរបស់ម្ចាស់ផ្ទះ ប៉ុន្តែក៏បង្ហាញឲ្យឃើញ និងបំផុសស្មារតីជាថ្មីនៃចំណងមិត្តភាពដែលបានចាប់ផ្តើមបដិន្ធិជាយូរណាស់មកហើយក្នុងចំណោមប្រជាជនអាស៊ាន។ វាបង្ហាញនូវឱកាសដែលប្រជាជនអាស៊ានទាំងមូលរៀបចំ និងអបអររួមគ្នាជាផ្នែកមួយនៃហ្គេម។
សហគមកីឡាប៉ារ៉ាឡាំពិកអាស៊ាន និងអ្នកគាំទ្រកីឡាជាទូទៅ សម្លឹងឆ្ពោះទៅរកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលនៅសល់តែ៧៤ថ្ងៃទៀតនឹងមកដល់ពោលគឺបើកនៅថ្ងៃទី៣ ខែមិថុនា។ វត្តមានរបស់កីឡាជនពិការអាស៊ីអាគ្នេយ៍ ជាសក្ខីភាពនៃកិច្ចសហប្រតិបត្តិការជិតស្និទ្ធរវាង APSF និង CAMAPGOC ដើម្បីឆ្ពោះទៅរកការរៀបចំកីឡាអាស៊ានប៉ារ៉ាហ្គេម លើកទី១២ដោយរលូន និងជោគជ័យ៕