អតីតកីឡាករជម្រើសជាតិចិន Yang Hao បានចោទប្រកាន់ទៅកានក្លិប Shaanxi Chang’an Athletic សមាជិកលីគទី២ របស់ប្រទេសចិន ថាមិនបានបើកប្រាក់ដល់ខ្លួនអស់មួយរយៈមកហើយ ខណៈភាគីក្លិបបានឆ្លើយតបបដិសេធ។
សារព័ត៌មានចិន Xinhua បានលើកឡើងថា ក្លិប Shaanxi Chang’an Athletic រងការចោទប្រកាន ពីសំណាក់កីឡាករ Yang Hao ដែលក្លិបមិនបានទូទាត់ប្រាក់ខែឲ្យរូបគេអស់រយះពេលជាច្រើនខែមកហើយ។ ប៉ុន្តែប្រភពដដែលបានស្រង់សម្តីភាគីតំណាងក្លិប Shaanxi បានបញ្ជាក់ថា ក្លិបបានបើកប្រាក់ខែឲ្យកីឡាករវ័យ៣៩ឆ្នាំនេះរួចហើយ ព្រមទាំងមានឯកសារ ដែលរូបគេបានចុះហត្ថលេខា។
យ៉ាងណាមិញ អតីតកីឡាករជម្រើសជាតិចិន ខាងលើ រូបនេះបានបដិសេធថា រូបគេមិនបានចុះហត្ថលេខា លើឯកសារអ្វីទាំងអស់ ដែលថារូបគេបានទទួលប្រាក់ខែកន្លងមក។
យ៉ាងណាក្តីប្រភពព័ត៌មាន នៅមិនទាន់បញ្ជាក់អំពីបញ្ហា និងមូលហេតុទាក់ទង ដែលនាំឲ្យមានការចោទប្រកាននេះនៅឡើយទេ។
ក្លិប Shaanxi Chang’an Athletic មានមូលដ្ឋាននៅខេត្ត Shaanxi នៃរដ្ឋចិន ដែលបានបង្កើតឡើងដំបូងក្នុងឆ្នាំ២០១៦ ប្រើប្រាស់កីឡដ្ឋាន Weinan Sports Centre Stadium ជាទឹកដីប្រកួតរបស់ខ្លួន។ នៅឆ្នាំ២០១៦ ក្លិបនេះចូលប្រកួតក្នុងពានរង្វាន់លីគទី៤ របស់ប្រទេសចិន ខណៈឆ្នាំ២០១៧ និង២០១៨ ឡើងដល់លីគទី៣ និងចាប់ពីឆ្នាំ២០១៩ មកបន្តកៅអីចូលប្រកួតក្នុងពានរង្វាន់លីគទី២។
ចំណែកកីឡាករ Yang Hao វិញបានដុះចេញពីថ្នាលយុវជនក្រុម Beijing Guoan ចន្លោះឆ្នាំ១៩៩៨ដល់២០០១ មុនត្រូវក្លិបចុះកុងត្រាអាជីពចូលលេងក្នុងឈុតធំក្លិប Beijing Guoan ពីឆ្នាំ២០០២ ដល់២០១០។ ឆ្នាំ២០១១ រូបគេផ្ទេរទៅចូលរួមក្រុម Guangzhou Evergrande ស្របពេលពីរដូវកាល២០១២ ដល់២០១៤ គេបានផ្ទេរទៅចូលរួមក្រុម Guizhou Renhe ហើយបន្តទៅកាន់ក្រុម Jiangsu Sainty ពីឆ្នាំ២០១៤ ដល់២០១៦ មុនចូលរួមក្រុម Shaanxi Chang’an Athletic ពីឆ្នាំ២០១៧មក។
គេធ្លាប់ចូលរួមក្នុងក្រុមជម្រើសជាតិចិន ចន្លោះឆ្នាំ២០០៩ ដល់២០១៤ ក្នុងនាមជាខ្សែបម្រើ ដោយបង្ហាញខ្លួនបាន៣៧លើក រកបានគ្រាប់បាល់២គ្រាប់។ រូបគេក៏ជាផ្នែកមួយជួយអោយចិន ឈ្នះជើងឯកប្រចាំតំបន់អាស៊ីបូព៌ា នៅឆ្នាំ២០១០ ផងដែរ៕