Tiffany Young សមាជិកក្រុមចម្រៀងស្រីដ៏មានឥទ្ធិពល SNSD នឹងបង្ហាញវត្តមានសម្ដែងរឿងភាគជាលើកដំបូងក្នុងរឿង «The Youngest Son of a Conglomerate» ដែលតួឯកប្រុសគឺ Song Joong Ki។
រឿងភាគ «The Youngest Son of A Conglomerate» គឺជារឿងដែលថតយកតាមលំនាំប្រលោមលោកអនឡាញដ៏ល្បីល្បាញដែលមានឈ្មោះដូចគ្នា ដោយរឿងនេះមានចំនួនអានរហូតជាង២៤.៤លានដង។
រឿងរ៉ាវនេះចាប់ផ្ដើមឡើងដោយបុរសម្នាក់ត្រូវបានគេសម្លាប់ដោយសារតែការចោទប្រកាន់ខុស ចោទប្រកាន់ឡើងគ្រួសារមួយដែលគេបាននៅបំរើអស់ជាង១០ឆ្នាំ។ ប៉ុន្តែនៅពេលដែលគេដឹងខ្លួនម្ដងទៀត វិញ្ញាណរបស់គេបានចូលទៅក្នុងខ្លួនរបស់កូនពៅរបស់គ្រួសារនោះ បន្តមកទៀតគឺជាផែនការសងសឹកដែលគេសងចំពោះគ្រួសារមួយនោះវិញ។
រឿងភាគនេះគឺជារឿងទីមួយដែល Tiffany នឹងចូលរួមសម្ដែង ដោយតួអង្គដែលតារាចម្រៀងកើតនៅទីក្រុង San Fransisco រូបនេះសម្ដែងគឺជាតួអង្គដែលជាជនជាតិកូរ៉េ-អាមេរិកដូចគ្នា។
បច្ចុប្បន្ន Tiffany កំពុងសម្ដែងជាតួអង្គ Roxie Hart នៅក្នុងល្ខោននិយាយបែបតន្ត្រីរឿង Chicago ដោយក្នុងរឿងនោះដែរ Tiffany ទទួលបានការកោតសរសើរយ៉ាងខ្លាំងចំពោះការសម្ដែងលើកដំបូងរបស់នាង។
ក្នុងពេលជាមួយគ្នានេះដែរ តារាសម្ដែង Song Joong Ki , Shin Hyun Bin, និង Lee Sung Min ត្រូវបានក្រុមផលិតទាក់ទងឱ្យសម្ដែងក្នុងរឿង «The youngest Son of a Conglomerate» ដោយតារាទាំងបីកំពុងតែស្ថិតក្នុងការត្រួតពិនិត្យលើសេណារីយ៉ូរឿងនិងសិក្សាលើចរិតតួអង្គ៕
