សិល្បៈជាតិ៖ លោក ឯម រាម គឺជាអ្នកច្នៃម៉ូដហ្វេសសិនប្លែកៗម្នាក់ ដែលគ្រប់គ្នាបានស្គាល់លោក និង​ទទួល​បាន​រហស្សនាម «បណ្ឌិត​ច្នៃ​ម៉ូដ» ព្រោះការច្នៃម៉ូដរបស់លោកគឺបានគិតគូអំពីការផ្សព្វផ្សាយវប្បធម៌ តាមរយៈគំនូរ ចម្លាក់ និងជាពិសេសទៅលើការថែទាំបរិស្ថាន។ លោកត្រូវបានទទួលស្គាល់ពីស្នាដៃដ៏មានទេពកោសល្យប៉ិនប្រសប់ក្នុងការស្លៀកពាក់ និង​តែងខ្លួន​ប្លែកៗ ចូលរួម​កម្មវិធី​ផ្សេងៗ។

ទន្ទឹមនឹងមានការទទួលស្គាល់ពីស្នាដៃកន្លងមករបស់លោក ក្នុងនោះមហាជនមួយចំនួនក៏មានមតិរិះគន់យ៉ាងមិនសំចៃមាត់ផងដែរ។ ជាក់ស្ដែងគេនៅចាំបានថា កាលឆ្នាំ ២០១៨ លោកត្រូវបានរិះគន់ពីស្នាដៃរចនាម៉ូដ អប្សរា ដែលបំពាក់លើបុរស ដោយលោកសំអាងថា ជាស្នាដៃតំឡើងថ្មីដោយ ឯម រាម។

យ៉ាងណាមិញ មហាជនដែលអ្នកវប្បធម៌និយម និងអភរិរក្សនិយមតែងតែមិនពេញចិត្តចំពោះស្នាដៃរបស់លោក ដោយពួកគេចោតថា នេះជាការច្នៃម៉ូដបែបឡប់លែលីលា ប្រាស់ចាកពីក្បួនខ្នាតទម្រង់ដើម ដែលការបំផ្លាញវប្បធម៌។

ដោយឡែក នាពេលថ្មីៗនេះ លោក ឯម រាម ក៏បានរងការរិះគន់យ៉ាងចាស់ដៃម្ដងទៀតដែរ អំពីការច្នៃម៉ូដឈុតដែលលោកស្លៀកនៅក្នុងកម្មវធី PMA 2023។ មែនទែនទៅ មួយម៉ូដនេះមិនសូវជាបានបង្ហាញអំពីទម្រង់បុរាណខ្មែរខ្លាំងដូចលើកមុននោះទេ ប៉ុន្តែភាគច្រើនមហាជនមិនពេញចិត្តចំពោះការស្លៀកពាក់បែបសិចស៊ីស្រីមិនចំស្រី ប្រុសមិនចំប្រុសជាដើម។

លោក ឯម រាម ធ្លាប់បានលើកឡើងថា មានមនុស្សមិនតិចទេដែលគិតថា លោកឆ្កួត ពាក់ស្បែកកែងចោទស្រី ហើយស្លៀកពាក់បែបប្លែកៗចូលរួមក្នុងកម្មវិធីផ្សេង។ រហូតមានអ្នកសួរម្ដាយលោកថា តើគាត់គិតបែបណាចំពោះកូនប្រុសដែលមិនប្រក្រតីបែបនេះ។ ម្ដាយលោក ឯម រាម បើមិនឱ្យកូនប្រុសគាត់ស្លៀកពាក់បែបឆ្កួតៗអីចឹង ក៏គ្មានអ្នកណាហៅឱ្យទៅយកលុយពីកម្មវិធីដែរ។ ជាការពិតណាស់ កម្លាំងចិត្តដែលធ្វើឱ្យលោក ឯម រាម អាចបន្តរំលេចស្នាដៃជាច្រើនកន្លងមកនេះ នោះក៏ព្រោះតែមានក្រុមគ្រួសារចាំផ្ដល់កម្លាំងចិត្តឱ្យលោក។

លោក ឯម រាម មិន​ត្រឹម​តែ​មាន​ភាព​ប៉ិនប្រសព្វ​ប៉ុណ្ណោះ​ទេ ប៉ុន្តែ​រាល់​ការ​ច្នៃ​ម៉ូដ លោក​តែងតែ​គិតគូរ​ដល់​វត្ថុធាតុដើម និង​ផល​ប៉ះពាល់​ដល់​បរិស្ថាន។ នៅ ២០១៥ លោកបាន​យក​សំលៀកបំពាក់​ធ្វើ​ពី​ស្រទាប់​ចេក​ទៅ​ដាក់​បង្ហាញ​ក្នុង​កម្មវិធី​ពិព័រណ៍​នៅ​ឯ​ប្រទេស អ៊ីតាលី ហើយ​ត្រូវ​បាន​ជ្រើសរើស​ដាក់​តាំង​បង្ហាញ​នា​ទីនោះ​តែម្ដង។ នៅ​ឆ្នាំ ២០១៧ លោក​ទទួល​បាន​ពានរង្វាន់​ផ្នែក​ហត្ថកម្ម​ចម្លាក់​ធ្វើ​អំពី​ផ្ដៅ អ​រូបិយ ធ្វើ​ដោយ​ដៃ ក្នុង​កម្មវិធី «Asian actress» នា​ប្រទេស​ថៃ​ទៀត​ផង។

លោក ឯម រាម ​ធ្លាប់បានលើកឡើងថា អ្នកវប្បធម៌និយមពួកគេនៅមិនទាន់បើកចិត្តទទួលយកស្នាដៃថ្មីរបស់លោក ដែលនេះហើយគឺជាឧបសគ្គនៃសិល្បៈច្នៃម៉ូដរបស់លោក។ លោកថា គ្រប់គ្នាគឺអាចបង្កើតសិល្បៈដែលថ្មី និងមានសេរីភាពក្នុងជំនាញរៀងៗខ្លួន។

សូមជម្រាបថា បណ្ឌិតច្នៃ ឯម រាម មានអាយុ ៥៣ ឆ្នាំ ដោយបាន​ប្រឡូក​ក្នុង​វិស័យ​ម៉ូដនេះ​តាំងពី​ឆ្នាំ ១៩៩៧ ដោយ​លោក​នៅតែ​មានចិត្ត​ស្រឡាញ់​វិស័យ​នេះ។ លោកធ្លាប់ជាបុរសឯកច្រើនឆ្នាំជាប់គ្នា ដែលបានថតរូបនៅលើក្របពាណិជ្ជកម្មរបស់ក្រុមហ៊ុនទូរស័ព្ទចល័តធំបង្អស់នៅកម្ពុជា។ លោកបញ្ចប់ការសិក្សារនៅប្រទេសបារាំងច្នៃ​ម៉ូដ​គ្រឿង​សង្ហារិម និងក្រណាត់បែបស្រមើស្រមៃ។ សព្វថ្ងៃលោកត្រូវបានតារាសិល្បៈជាច្រើនទាក់ទងលោកឱ្យរចនាម៉ូងសម្លៀកបំពាក់ឱ្យពួកគេផងដែរ៕

Share.