យ៉ាងហោចណាស់មានគម្រោងផលិតថាមពលអគ្គិសនីចំនួន៦កន្លែងទៀតកំពុងត្រៀមលេចវត្តមាននៅកម្ពុជា។ នៅថ្ងៃទី៣១ ខែមីនា ឆ្នាំ២០២៣នេះ ឯកសារស្ដីពីគម្រោងទាំង៦ ត្រូវបានដាក់ជារបៀបវារៈឆ្លងការសម្រេចក្នុងកិច្ចប្រជុំគណៈរដ្ឋមន្រ្តី ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្រ្តី។

បើតាមរបៀបវារៈនៃកិច្ចប្រជុំ គម្រោងផលិតថាមពលអគ្គិសនីនោះ មានពីរគម្រោង ជាគម្រោងវារីអគ្គិសនី គឺ គម្រោងអភិវឌ្ឍវារីអគ្គិសនីស្ទឹងឫស្សីជុំកណ្តាលអានុភាព៧០មេហ្គាវ៉ាត់ ស្ថិតនៅស្រុកមណ្ឌលសីមា និងគម្រោងវារីអគ្គិសនីស្ទឹងវាលថ្មកំបុតអានុភាព ១០០មេហ្គាវ៉ាត់ នៅស្រុកថ្មបាំង ខេត្តកោះកុង។

ចំណែកគម្រោង៤ទៀត គឺគម្រោងផលិតថាមពលពីព្រះអាទិត្យ គឺគម្រោងវិនិយោគស្ថានីយ៍ផលិតអគ្គិសនីដើរដោយថាមពលពន្លឺព្រះអាទិត្យអានុភាព១៥០មេហ្គាវ៉ាត់ ខេត្តពោធិ៍សាត់, អានុភាព ៦០មេហ្គាវ៉ាត់ ខេត្តកំពង់ឆ្នាំង, អានុភាព ៦០មេហ្គាវ៉ាត់ ខេត្តស្វាយរៀង និងអានុភាព ៨០មេហ្គាវ៉ាត់ ខេត្តព្រៃវែង។

សូមបញ្ជាក់ថា​ការផ្គត់ផ្គង់​អគ្គិសនី​របស់​បណ្ដាញ​ជាតិ​បាន​កើនឡើង​ពី ៨៦,៨៥% នៃ​ចំនួន​ភូមិ​ទូទាំង​ប្រទេស​នៅ​ឆ្នាំ ​២០១៨ ដល់ ៩៨,២៧% ​នៃ​ចំនួន​ភូមិ​ទូទាំង​ប្រទេស​នៅ​ឆ្នាំ​ ២០២២​។ នេះ​បើតាម​ក្រសួង​រ៉ែ និង​ថាមពល​។ រាជរដ្ឋាភិបាលបានដាក់គោលដៅ៤ជាទិភាព ក្នុងនោះក៏មានអគ្គិសនីដែរ គឺមនុស្ស ផ្លូវ ភ្លើង និងទឹក៕

Share.