សហព័ន្ធកីឡាបាល់ទាត់កម្ពុជា បានចេញបញ្ជីឈ្មោះកីឡាករយុវជនក្រោមអាយុ២២ឆ្នាំ ចំនួន២៣នាក់ ដែលជាឈុតត្រៀមធ្វើម្ចាស់ផ្ទះកីឡាស៊ីហ្គេម នៅខែឧសភា ខាងមុខ ស្របពេលដែលក្រុមទាំងមូលត្រូវធ្វើដំណើរទៅហ្វឹកហាត់ដំណាក់កាលទី៣ នៅរាជធានីបាងកក ប្រទេសថៃ រយៈពេល១០ថ្ងៃ។
យោងតាមការបញ្ជាក់របស់សហព័ន្ធកីឡាបាល់ទាត់កម្ពុជា ថាក្រុម U22 កម្ពុជា បានចេញដំណើរទៅកាន់ប្រទេសថៃ នៅព្រឹកថ្ងៃសៅរ៍ សប្ដាហ៍នេះពោលគឺចាប់ពីថ្ងៃទី៨ ដល់១៨ ខែមេសាឆ្នាំ២០២៣។
បើតាមការចាប់ឆ្នោតជ្រើសរើសពូលកាលពីពេលថ្មីៗ នេះឈុតស៊ីហ្គេម វិញ្ញាសាបាល់ទាត់បុរសឃើញថា ពូល A មានកម្ពុជា (ម្ចាស់ផ្ទះ) ឥណ្ឌូណេស៊ី មីយ៉ាន់ម៉ា ហ្វីលីពីន ទីម័រខាងកើត ហើយពូល B មាន វៀតណាម ថៃ ម៉ាឡេស៊ី សិង្ហបុរី និងឡាវ។
សម្រាប់កាលវិភាគប្រកួតវិញ មាន៖
២៩ មេសា ម៉ោង៧យប់ កម្ពុជា Vs ទីម័រខាងកើត លើទីលានពហុកីឡដ្ឋានជាតិ
២ ឧសភា ម៉ោង៧យប់ ហ្វីលីពីន Vs កម្ពុជា លើទីលានពហុកីឡដ្ឋានជាតិ
៧ ឧសភា ម៉ោង៧យប់ មីយ៉ាន់ម៉ា Vs កម្ពុជា លើទីលានពហុកីឡដ្ឋានជាតិ
១០ ឧសភា ម៉ោង៧យប់ កម្ពុជា Vs ឥណ្ឌូណេស៊ី លើទីលានពហុកីឡដ្ឋានជាតិ