តារាសម្ដែងមានដើមកំណើតនៅខេត្ត កោះកុង លោក យក់ ឆេងហាក់ បានដាក់ក្ដីរំពឹងខ្ពស់ខ្លាំងលើភាពយន្តភាគ «នារីមុខឈើ» ដែលនឹងបញ្ចាំងនៅលើស្ថានីយទូរទស្សន៍ហង្សមាសនាពេលឆាប់ៗខាងមុខនេះ ព្រោះតួអង្គដែលលោកសម្ដែងមានលក្ខណៈខុសប្លែក ពីរឿងមុនៗដែលលោកធ្លាប់សម្ដែង ពិសេសលោកមានជំនឿចិត្តថាតួអង្គរូបនេះនឹងធ្វើឱ្យទស្សនិកជនផ្លាស់ប្ដូរការគិតថ្មីមកលើថែមទៀតផង។
បុរសខ្ពស់សង្ហា ពេញដោយសមត្ថភាព យក់ ឆេងហាក់ ដែលបានស្ងប់ស្ងាត់មួយរយៈធំពីបណ្ដាញសង្គម ដោយសារតែលោកចង់រស់នៅក្នុងជីវភាពមួយស្ងប់ស្ងាត់ បានត្រលប់មកមានសកម្មភាពនៅលើបណ្ដាញសង្គមឡើងវិញ ខណៈដែលភាពយន្តភាគដែលលោកសម្ដែងត្រៀមនឹងចាក់បញ្ចាំងលើកញ្ចក់ទូរទស្សន៍ធំល្បីនិងឈានមុខរបស់ព្រះរាជាណាចក្រកម្ពុជា។
មានឱកាសបានជួបសម្ភាសន៍ លោក យក់ ឆេងហាក់ តាមប្រព័ន្ធអនឡាញ ពាក់ព័ន្ធនឹងរឿងថ្មីដែលលោកសម្ដែង បន្ទាប់ពីលោកត្រលប់មក Active លើ Social Media វិញ លោកបានឆ្លើយតបថា៖
«ចំពោះរឿងកញ្ញាមុខឈើនេះ ទស្សនិកជនច្បាស់ជាបានមើលឃើញអ្វីប្លែកពីខ្ញុំ ហើយទស្សនិកជននឹងឈប់ជេរ ព្រោះតួអង្គថ្មីនេះខុសពីតួអង្គដែលលោកធ្លាប់សម្ដែង កន្លងមកតួដែលខ្ញុំធ្លាប់សម្ដែងច្រើនតែជាកូនអ្នកមាន ចរិតឈ្លើយ ជាព្រាននារី មានចិត្តសាវ៉ា តួអង្គកុហក ប៉ុន្តែសម្រាប់រឿងថ្មីនេះខ្ញុំដើរតួជាបងរបស់គេដែលមើលថែរក្សាប្អូនៗ ខ្ញុំស្ដីថាឱ្យប្អូនៗ ដើម្បីចង់ពួកគាត់ល្អ ម្យ៉ាងវិញទៀតសម្រាប់រឿងនេះ ការថតតួរបស់ខ្ញុំមានការលំបាកច្រើន ព្រោះត្រូវទៅថតដល់ខេត្តមណ្ឌលគិរី ថតក្នុងព្រៃស្រល់ ថតទាំងកណ្ដាលអធា្រត្រ អាកាសធាត់ត្រជាក់ខ្លាំង ថែមក្នុងរឿងនេះឈុតគ្រោះថ្នាក់ដូចជា ឈុតវាយតប់ ឈុតធ្លាក់ពីលើដើមឈើ ឈុតសត្វដេញជាដើម»។
លោក យក់ ឆេងហាក់ ក៏បានបង្ហាញទស្សនៈសុទិដ្ឋិនិយមចំពោះតួអង្គថ្មីដែលលោកសម្ដែងដែរថា ប្រសិនបើរឿងនេះចាក់បញ្ចាំងលើកញ្ចក់ទូរទស្សន៍លោកជឿថា៖
«ខ្ញុំជឿថាតួអង្គថ្មីនឹងធ្វើឱ្យទស្សនិកជនទាំងងស់ប្ដូរការគិតមកលើលោក ហើយនឹងឈប់យល់ថាលោកជាមនុស្សកុហក មនុស្សបោកប្រាស់ ឬអាចនិយាយម្យ៉ាងទៀតបានថា គ្រប់គ្នានឹងលែងគិតថាលោកស័ក្តិសមនឹងសម្ដែងតែតួអង្គអាក្រក់បោកប្រាស់គេជាក់ជាមិនខាន»។
គួរដឹងដែរថារឿង «កញ្ញាមុខឈើ» ក្រៅពីលោក យក់ ឆេងហាក់ ក៏មានតារាសម្ដែងប្រុសស្រីវ័យក្មេងពីររូបទៀតដែរ ក្នុងនោះក៏មានបុរសសង្ហា លោក ទ្រី ដារ៉ាវុធ និង ស្រីស្អាត កញ្ញា ស៊ឹម ស្រីនិច ចូលរួមសម្ដែងជាតួឯកប្រុសស្រីផងដែរ៕