ក្រុមបាល់ទាត់ជម្រើសជាតិអ៊ីតាលី បានឡើងទៅវគ្គផ្ដាច់ព្រ័ត្រពានរង្វាន់ UEFA EURO ជាលើកទី៤ក្នុងប្រវត្តិសាស្រ្តរបស់ខ្លួន ក្រោយបានយកឈ្នះលើក្រុមជម្រើសជាតិអេស្ប៉ាញ ក្នុងវគ្គពាក់កណ្ដាលផ្ដាច់ព្រ័ត្រនៅរំលងអាធ្រាត្រថ្ងៃពុធ នេះលើទីលានកីឡដ្ឋាន Wembley Stadium ក្នុងប្រទេសអង់គ្លេស ក្រោមក្រសែភ្នែកទស្សនិកជនជាង៥ម៉ឺននាក់។
ក្រុមអ៊ីតាលី បានយកឈ្នះលើក្រុមអេស្ប៉ាញ ដោយបាល់ប៉េណាំងទីកាត់សេចក្តី ៤ទល់២ ក្រោយប្រកួតគ្នាពេញម៉ោងបញ្ចប់ទៅដោយលទ្ធផល ១ទល់១។ ប្រកួតនេះកាត់សេចក្តីដោយលោកអាជ្ញាកណ្ដាល Felix Brych ជនជាតិអាល្លឺម៉ង់។
កន្លងមកអ៊ីតាល ធ្លាប់ឡើងដល់វគ្គផ្ដាច់ព្រ័ត្រចំនួន៣លើកមកហើយ តែឈ្នះជើងឯកបាន១លើក គឺនៅឆ្នាំ១៩៦៨ បន្ទាប់ពីឈ្នះក្រុមយូហ្គោស្លាវី។ ចំណែក២លើកទៀតបានបរាជ័យ ពោលគឺចាញ់បារាំង វគ្គផ្ដាច់ព្រ័ត្រ ២ទល់១ នៅឆ្នាំ២០០០ និងចាញ់អេស្ប៉ាញ ៤ទល់០ នៅឆ្នាំ២០១២។
សម្រាប់វគ្គផ្ដាច់ព្រ័ត្រឆ្នាំនេះវិញ នៅរង់ចាំលទ្ធផលអ្នកឈ្នះរវាងជម្រើសជាតិអង់គ្លេស ជាមួយដាណឺម៉ាក នៅវេលាម៉ោង២រំលងអាធ្រាត្រចូលថ្ងៃព្រហស្បតិ៍ លើទីលានកីឡដ្ឋាន Wembley Stadium ដូចគ្នា។
គិតត្រឹមពេលនេះបញ្ជីអ្នកទាត់បាល់បញ្ជូលទីបានច្រើនគ្រាប់ជាងគេគឺកីឡាករ Cristiano Ronaldo របស់ព័រទុយហ្គាល់ និងកីឡាករ Patrik Schick របស់សាធារណរដ្ឋឆែក រកបានម្នាក់៥គ្រាប់ បើទោះជាក្រុមបានអស់ឱកាសឡើងមកវគ្គបន្តហើយក្ដី។
ពានរង្វាន់នេះបង្កើតឡើងតាំងពីឆ្នាំ១៩៦០ ស្របពេលក្រុមអេស្ប៉ាញ និងអេស្ប៉ាញ ឈ្នះជើងឯកបានច្រើនជាងគេគឺរហូត៣ដងម្នាក់ ខណៈក្រុមព័រទុយហ្គាល់ ជាក្រុមជើងឯកឆ្នាំចាស់៕