ទីបំផុតក្រុមជម្រើសជាតិអង់គ្លេស ដណ្តើមបានកៅអីឡើងទៅលេងវគ្គផ្ដាច់ព្រ័ត្រពានរង្វាន់បាល់ទាត់ជើងឯកទ្វីបអឺរ៉ុប UEFA EURO 2021 ក្រោយយកឈ្នះលើក្រុមដាណឺម៉ាក នៅវគ្គពាក់កណ្ដាលផ្ដាច់ព្រ័ត្រដោយលទ្ធផល ២ទល់១ (ម៉ោងបន្ថែម) នៅយប់ព្រឹកថ្ងៃព្រហស្បតិ៍ នេះ។
«សារព័ត៌មានត្រយង» សូមលើកពីចំណុច៥ជុំវិញក្រុមជម្រើសជាតិអង់គ្លេស ឡើងទៅវគ្គផ្ដាច់ព្រ័ត្រនៅឆ្នាំនេះ៖
១) ឡើងវគ្គផ្ដាច់ព្រ័ត្រ ជាលើកដំបូងតាំងពីពានបង្កើតជាង៦០ឆ្នាំមក
ពានរង្វាន់ UEFA EURO បង្កើតឡើងដំបូងនៅឆ្នាំ១៩៦០ ដោយរៀបចំរាល់៤ឆ្នាំម្ដង ខណៈនេះជាលើកដំបូងហើយដែលក្រុមជម្រើសជាតិអង់គ្លេស ទទួលបានកៅអីវគ្គផ្ដាច់ព្រ័ត្រ ខណៈក្រុមនេះធ្លាប់ឡើងដល់វគ្គពាក់កណ្ដាលផ្ដាច់ព្រ័ត្រម្ដងក្នុងឆ្នាំ១៩៩៦ ក្នុងនាមជាម្ចាស់ផ្ទះ តែត្រូវចាញ់ក្រុមអាល្លឺម៉ង់ ដោយបាល់ប៉េណាំងទីកាត់សេចក្តី៦ទល់៥ ក្រោយប្រកួតស្មើគ្នា១ទល់១ នៅពេញម៉ោង។
២) ប្រកួតផ្ដាច់ព្រ័ត្រធ្វើនៅទឹកដីរបស់ខ្លួន
វគ្គផ្ដាច់ព្រ័ត្រពានរង្វាន់ UEFA EURO 2021នឹងធ្វើឡើងនៅទីលានកីឡដ្ឋាន Wembley Stadium ក្នុងទីក្រុងឡុងដុង របស់ប្រទេសអង់គ្លេស ផ្ទាល់តាមការកំណត់របស់ UEFAតាំងពីដើមទីមក។ ដូច្នេះក្រុមអ៊ីតាលី ជួបអង់គ្លេស នៅវេលាម៉ោង២រំលងអាធ្រាត្រ ថ្ងៃអាទិត្យ ទី១២ ខែកក្កដា ឆ្នាំ២០២១ នឹងធ្វើឡើងនៅទីក្រុងឡុងដុង។
៣) Harry Kane មានឱកាសដណ្តើមស្បែកជើងមាស
គិតត្រឹមពេលនេះកីឡាករ Harry Kane ជាកីឡាករម្នាក់រកបានគ្រាប់បាល់៤គ្រាប់ម្នាក់ឯង បើធៀបនឹងកីឡាករផ្សេងៗក្នុងចំណោមក្រុមទាំង២ដែលនៅសេសសល់ ដល់វគ្គផ្ដាច់ព្រ័ត្រនេះ។ អ្នកដែលរកគ្រាប់បាល់បានច្រើននាពេលបច្ចុប្បន្នគឺកីឡាករ Patrik Schick របស់សាធារណរដ្ឋឆែក និងកីឡាករ Cristiano Ronaldo របស់ព័រទុយហ្គាល់ ដែលបច្ចុប្បន្នរកបានម្នាក់៥គ្រាប់។
៤) ប្រាក់រង្វាន់
ក្រៅពីទទួលបានពានរង្វាន់ តាមការកំណត់ក្រុមដែលទទួលបានជើងឯកពានរង្វាន់ UEFA EURO 2020 នឹងទទួលបានប្រាក់រង្វាន់ចំនួន ១០លានអឺរ៉ូ ឬប្រមាណជាង១១លានដុល្លារអាមេរិក។ ចំណែកក្រុមជើងឯករងនឹងទទួលបានប្រាក់រង្វាន់៧លានអឺរ៉ុ ឬ ជាង៨លានដុល្លារអាមេរិក។
៥) ជំនួបគ្នា២៧លើករវាងអ៊ីតាលី និងអង់គ្លេស
ក្រុមអ៊ីតាលី និងអង់គ្លេស ធ្លាប់បានជួបគ្នារហូតដល់២៧លើកហើយទាំងក្នុងប្រកួតមិត្តភាពអន្តរជាតិនិងប្រកួតក្នុងពានរង្វាន់នានា ខណៈក្នុងចំណោមនោះក្រុមអង់គ្លេស ធ្លាប់ឈ្នះរហូតដល់ទៅ១១ដង ហើយអ៊ីតាលី ធ្លាប់ឈ្នះ៨ដង និងស្មើគ្នា៨ដង។