ក្នុងនាមជាម្ចាស់គ្រាប់បាល់ក្នុងប្រកួតទល់នឹងក្រុមឥណ្ឌូណេស៊ី ក្នុងប្រកួតបិទពូល A ប្រចាំព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ នៅរាត្រីថ្ងៃទី១០ ខែឧសភា ឆ្នាំ២០២៣ កីឡាករ ស៊ិន សុវណ្ណមករា ទទួលបានប្រាក់ឧបត្ថម្ភចំនួន១ម៉ឺនដុល្លារអាមេរិក ពីឯកឧត្តមឧបនាយករដ្ឋមន្រ្តី ហោ ណាំហុង។
ក្រោយទទួលបានប្រាក់រង្វាន់នេះកីឡាករ ស៊ិន សុវណ្ណមករា បានបញ្ជាក់នៅលើហ្វេសប៊ុករបស់ខ្លួនថា៖«ខ្ញុំបាទ ស៊ិន សុវណ្ណមករា សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមឧបនាយករដ្ឋមន្រ្តី ហោ ណាំហុង ដែលបានធ្វើការឧបត្ថម្ភទឹកប្រាក់ចំនួន 10000$ (មួយម៉ឺនដុល្លា សហរដ្ថអាមេរិក) ជូនចំពោះខ្ញុំបាទ ស៊ិន សុវណ្ណមករា ហើយខ្ញុំបាទសុំយកទឹកប្រាក់ឧបត្ថម្ភ ចំនួន 10000$ (មួយម៉ឺនដុល្លា សហរដ្ថអាមេរិក) នេះ មកធ្វើជាទឹកប្រាក់ឧបត្ថម្ភជូនទៅដល់ក្រុមជំរើសជាតិកម្ពុជា ទាំងមូល។ ជាចុងក្រោយខ្ញុំបាទ ស៊ិន សុវណ្ណមករា សូមលំអោនកាយគោរពជូនពរ ឯកឧត្តមឧបនាយករដ្ឋមន្រ្តី ហោ ណាំហុង អោយជួបប្រទះតែពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»។
ទន្ទឹមនឹងគ្នានេះដែរលោកជំទាវ កែវ សួនសុភី ប្រធានក្លិបបាល់ទាត់វិសាខា និងជាក្លិបដែលកីឡាករ ស៊ិន សុវណ្ណមករា កំពុងប្រកបអាជីព បាន Share ពី អ្វីដែល ស៊ិន សុវណ្ណមករា បង្ហោះនិងបញ្ជាក់ខ្លឹមសារថា៖«នេះជាការសម្រេចចិត្ត នៃការចែករំលែកដ៏ត្រឹមត្រូវព្រោះថាបាល់ទាត់យើងលេងជាក្រុម ហើយទទួលសមិទ្ធផលក៏ជាក្រុមដែរ»។
សូមបញ្ជាក់ថាក្រុមបាល់ទាត់យុវជនក្រោមអាយុ២២ឆ្នាំកម្ពុជា បានអស់សិទ្ធិត្រឹមវគ្គចែកពូលA ក្រោយប្រកួតឈ្នះទីម័រខាងកើត ៤-០ ហើយស្មើគ្នាជាមួយហ្វីលីពីន ១-១ និងបន្តចាញ់មីយ៉ាន់ម៉ា ២-០ និងចុងក្រោយចាញ់ឥណ្ឌូណេស៊ី ២-១។ ចំណែកក្រុមដែលឡើងតំណាងឱ្យពូល A មានឥណ្ឌូណេស៊ី និងមីយ៉ាន់ម៉ា ទៅកាន់វគ្គពាក់កណ្ដាលផ្ដាច់ព្រ័ត្រ៕