ទីបំផុតទៅរាជរដ្ឋាភិបាលបានម័តអនុញ្ញាតឱ្យអនុវត្តគម្រោងជីកព្រែកដ៏មហិមារភ្ជាប់ពីទន្លេបាសាក់ទៅកាន់សមុទ្រដើម្បីបើកច្រកដឹកជញ្ជូនតាមផ្លូវទឹកជាប្រវត្តិសាស្រ្តហើយក្នុងកិច្ចប្រជុំគណៈរដ្ឋមន្រ្តីដឹកនាំដោយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា នាថ្ងៃទី១៩ ខែឧសភា ឆ្នាំ២០២៣នេះ។
ឯកឧត្តម ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី បានថ្លែងឱ្យដឹងថា គម្រោងនេះ ត្រូវបានដាក់ឈ្មោះថា «គម្រោងផ្លូវនាវាចរណ៍ និងប្រព័ន្ធភស្តុរភារកម្មទន្លេបាសាក់» ដែលមានតួនាទីផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ដើម្បីពង្រីកនូវវិសាលភាពប្រើប្រាស់សក្ដានុពលលើការដឹកជញ្ជូនតាមផ្លូវទឹក សំដៅចូលរួមលើកកម្ពស់សកម្មភាពសេដ្ឋកិច្ច-សង្គម ឱ្យកាន់តែមានការរីកចម្រើនឈានទៅមួយកម្រិតថែមទៀត។
បើតាមឯកឧត្តម ផៃ ស៊ីផាន គម្រោងនេះ នឹងបង្កើនអធិបតេយ្យភាពការដឹកជញ្ជូនតាមផ្លូវទឹករបស់កម្ពុជា កាត់បន្ថយពេលវេលា ចម្ងាយ និងថវិកា កាត់បន្ថយនីតិវិធីសម្រាប់នាវា និងទំនិញចូល-ចេញ ធ្វើឱ្យចំណេញ និងបង្កើនល្បឿននៃការអភិវឌ្ឍសេដ្ឋកិច្ចជាតិ ធ្វើសមាហរណកម្មដឹកជញ្ជូនតាមផ្លូវទឹក តាមរយៈការពង្រីកការតភ្ជាប់ពហុមធ្យោបាយដឹកជញ្ជូន កាត់បន្ថយការខូចខាតផ្លូវថ្នល់ និងការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍លើផ្លូវថ្នល់។
ប្រធានអង្គភាពអ្នកនាំពាក្យរាជរដ្ឋាភិបាលរូបនេះបានបន្ថែមថា គម្រោងនេះជាគម្រោងប្រវត្តិសាស្រ្តលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដើម្បីតភ្ជាប់ប្រព័ន្ធទន្លេមេគង្គ និងផ្លូវសមុទ្រ និងបានបែងចែកជាពីរដំណាក់កាល ប្រើប្រាស់រយៈពេលសរុប២៦ខែ ក្នុងនោះដំណាក់កាលទី១គឺដំណាក់កាលសិក្សាបឋមប្រើរយៈពេល១៤ខែ និងដំណាក់កាលទី២ ដំណាក់កាលសិក្សាសមិទ្ធិលទ្ធភាពប្រើរយៈពេល១២ខែ។
សូមបញ្ជាក់ថាកាលពីខែមេសា ឆ្នាំ២០២៣ ក្រសួងសាធារណការ និងដឹកជញ្ជូន បានបញ្ចេញរូបគំរូនៃគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ក្នុងកិច្ចប្រជុំមួយដឹកនាំដោយ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ដោយមានការចូលរួមពីសមាជិកគណៈកម្មការអន្តរក្រសួង និងក្រុមហ៊ុន CRBC ក្រុមហ៊ុន CCCC Water Transport Consultant ដែលជាក្រុមហ៊ុនអនុវត្តការសិក្សា និងមន្រ្តីជំនាញបច្ចេកទេសរបស់អន្តរក្រសួងជាច្រើនរូប។
សូមជម្រាបថា គម្រោងផ្លូវនាវាចរណ៍ និងប្រព័ន្ធភស្តុភារកម្មនេះ មានប្រវែងសរុបប្រមាណ ១៨០គីឡូម៉ែត្រ តភ្ជាប់ពីទន្លេបាសាក់ ទៅកាន់កំពង់ផែសមុទ្រ នៃខេត្តកំពត៕