លោក បែ មករា អគ្គលេខាធិការក្លិបបាល់ទាត់បឹងកេត បានអំពាវនាវដល់អ្នកស្នេហាវិស័យកីឡាបាល់ទាត់ទាំងអស់ ចូលរួមគាំទ្រការប្រកួតដូចជា៖ លីគកំពូលកម្ពុជា និង Cambodian League Cup ឲ្យដូចក្រុមជម្រើសជាតិកម្ពុជា។
លោក មករា បានថ្លែងដូច្នេះថា៖«ក្លិបជាកន្លែងដែលបង្ហាត់កីឡាករជាប្រចាំ បណ្តុះបណ្តាលធនធានកីឡាករជាប្រចាំ ផ្តល់ប្រាក់ខែជូនកីឡាកជាប្រចាំ។ លីគ គឺជាកន្លែងរៀបចំការប្រកួតសម្រាប់កីឡាករជាប្រចាំរៀងរាល់សប្តាហ៍ ។ គឺជាកន្លែងផលិតកីឡាករសម្រាប់ជម្រើសជាតិ គឺជាកន្លែងដែលកីឡាករបានបញ្ចេញសមត្ថភាពឱ្យគ្រូជម្រើសជាតិបានឃើញ ដើម្បីធ្វើការជ្រើសរើស»។
«សង្ឃឹមថារដូវកាល ២០២៣-២៤ ការប្រកួតលីគ និងខាប់នឹងទទួលបានការចូលទស្សនាផ្ទាល់ច្រើនពីសំណាក់អ្នកស្នេហាកីឡាបាល់ទាត់យើង ដើម្បីឱ្យលីគកាន់តែរីកចម្រើនក្លិបកាន់តែរឹងមាំ មានក្រុមហ៊ុនឧបត្ថម្ភច្រើនជាងមុន ដើម្បីអភិវឌ្ឍបាល់ទាត់កម្ពុជាឱ្យប្រសើរឡើងជាងបច្ចុប្បន្នថែមទៀត»។
ក្រោយពេលព្រឹត្តិការណ៍ប្រកួតកីឡាស៊ីហ្គេម បានបញ្ជប់ ការប្រកួតពានរង្វាន់ Cambodian League Cup ឆ្នាំ២០២៣ នឹងចាប់ផ្ដើមប្រកួតគលងវិញនៅចុងខែឧសភានេះ ដែលជាជំនួនជើងទី២។
ការប្រកួតជើងទី១ កន្លងមកក្លិបភ្នំពេញក្រោនបានយកឈ្នះក្រុមម្ចាស់ផ្ទះគិរីវង់សុខសែនជ័យ ដោយលទ្ធផល ៣ទល់០ ខណ: ក្លិបបាល់ទាត់វិសាខា បានបរាជ័យលើកដំបូងក្រោមថ្វីជើងម្ចាស់ផ្ទះណាហ្គាវើលដ៍ដោយលទ្ធផល ១ទល់០។
ការប្រកួតវគ្គពាក់កណ្តាលផ្តាច់ព្រ័ត្រ ជើងទី២ នឹងត្រូវធ្វើឡើងនៅថ្ងៃទី២៧ មេសា ២០២៣ វិសាខា ប៉ះ ណាហ្គាវើលដ៍ នៅកីឡដ្ឋានព្រីនស៍។ ខណ:ថ្ងៃទី២៨ មេសា ២០២៣ ភ្នំពេញក្រោន ប៉ះ គិរីវង់សុខសែនជ័យ នៅកីឡដ្ឋាន Smart RSN៕
*វិសាខា, ណាហ្គាវើលដ៍, ភ្នំពេញក្រោន, គិរីវង់សុខសែនជ័យ ប្រិយមិត្ត ទាយមើកថា តើក្រុមណានឹងឡើងទៅប៉ះគ្នានៅវគ្គផ្ដាច់ព្រ័ត្រ?
