ក្រុមបាល់ទាត់ជម្រើសជាតិនារី វៀតណាម និងក្រុមជម្រើសជាតិបុរស អាយុក្រោម ២២ឆ្នាំ វៀតណាម ទទួលបានប្រាក់លើកទឹកចិត្តពីរាជរដ្ឋភិបាលវៀតណាម ក្រោយបញ្ចប់ភារកិច្ច ដណ្ដើមមេដាយនៅក្នុងព្រឹត្តិការណ៍ស៊ីហ្គេម លើកទី៣២ នៅកម្ពុជា កាលពីពេលថ្មីៗនេះ។
តាមរយ:សហព័ន្ធកីឡាបាល់ទាត់វៀតណាម បានបង្ហោះកាលពីថ្ងៃទី២៣ ខែឧសភា ឆ្នាំ២០២៣ ក្រុមជម្រើសជាតិនារី វៀតណាម ទទួលបានប្រាក់លើកទឹកចិត្តចំនួន ៣ ៦០០លានដុង (១៥ ៣១៩១ដុល្លារអាមេរិក) បន្ទាប់ពីឈ្នះមេដាយមាស នៅស៊ីហ្គេម លើកទី៣២។
ខណ:ក្រុមជម្រើសជាតិបុរស អាយុក្រោម ២២ឆ្នាំ វៀតណាម ទទួលបានប្រាក់លើកទឹកចិត្ត ចំនួន ២ ៤០០លានដុង (១០ ២១២៧ដុល្លារអាមេរិក) បន្ទាប់ពីឈ្នះសំរឹទ្ធ នៅស៊ីហ្គេម លើកទី៣២។
គួរបញ្ជាក់ថា ក្រុមបាល់ទាត់ជម្រើសជាតិនារី វៀតណាម ដណ្ដើមបានមេដាយមាស បន្ទាប់ពីយកឈ្នះក្រុមជម្រើសជាតិនារី មីយ៉ាន់ម៉ា នៅវគ្គផ្ដាច់ព្រ័ត្រ ក្នុងលទ្ធផល ២ទល់និង០។ ដោយឡែកសម្រាប់ក្រុមជម្រើសជាតិបុរស អាយុក្រោម២២ឆ្នាំ វៀតណាម ទទួលបានត្រឹមមេដាយសំរឹទ្ធ បន្ទាប់ពីឈ្នះមីយ៉ាន់ម៉ា ក្នុងលទ្ធផល ៣ទល់និង១ នៃព្រឹត្តិការស៊ីហ្គេម លើកទី៣២ នៅកម្ពុជា៕