២៥ឧសភា១៩៣៤-២៥ឧសភា២០២៣ នៅថ្ងៃនេះ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា មានជន្មាយុ៩០ឆ្នាំហើយ។ ឥស្សរជនដែលត្រូវបានមហាជនស្គាល់រហស្សនាមថា«បុរសប្រជាជន»រូបនេះកើតនៅភូមិអន្លង់ក្រេះ ឃុំកក់ ស្រុកពញាក្រែក ខេត្តកំពង់ចាម។
យោងតាមឯកសារស្រាវជ្រាវរបស់លោក គាំម កុសល និងសាស្ត្រាចារ្យ ដៀប សុផល សម្ដេចអគ្គមហាពញាចក្រី ហេង សំរិន បានសិក្សានៅសាលាពុទ្ធិកបឋមសិក្សាខេត្តកំពង់ចាម នាអំឡុងឆ្នាំ១៩៥៤ និងធ្លាប់រៀនវគ្គនយោបាយរយៈពេលខ្លីនៅក្នុងប្រទេសវៀតណាម។
សម្ដេច ហេង សំរិន ជាថ្នាក់ដឹកនាំម្នាក់ក្នុងចំណោមថ្នាក់ដឹកនាំចលនារណសិរ្សសាមគ្គីសង្គ្រោះជាតិកម្ពុជាចំនួន ១៤រូប ដែលក្នុងនោះក៏មានសម្ដេចធម្មពោធិសាល ជា ស៊ីម អតីតប្រធានព្រឹទ្ធសភា និងជាអតីតប្រធានគណបក្សប្រជាជនកម្ពុជា និងសម្ដេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា។
នៅឆ្នាំ១៩៦៩ សម្ដេច មានតួនាទីជាប្រធានកងអនុសេនាតូច ចលនាប្រដាប់អាវុធ (ផ្នែក៦) តំបន់២០ ភូមិភាគ បូព៌ា (២០៣) ហើយជាបន្តបន្ទាប់លោកបានក្លាយជាប្រធានរណសិរ្សសាមគ្គីសង្គ្រោះជាតិកម្ពុជានាថ្ងៃទី២ ខែធ្នូ ឆ្នាំ១៩៧៨ និងជាប្រធានក្រុមប្រឹក្សាប្រជាជនបដិវត្តន៍កម្ពុជា ក្នុងឆ្នាំ១៩៧៩។
នៅឆ្នាំ១៩៨១ ឥស្សរជនកូនកសិកររូបនេះ មានតួនាទីជាអគ្គលេខាធិការមជ្ឈិមបក្សប្រជាជនកម្ពុជានិងជាប្រធានក្រុមប្រឹក្សារដ្ឋនៃសាធារណរដ្ឋប្រជាមានិតកម្ពុជា (ក្រោយមកជារដ្ឋកម្ពុជា) ហើយចាប់ពីឆ្នាំ១៩៩១ បានបន្តធ្វើជាជាប្រធានកិត្តិយសគណបក្សប្រជាជនកម្ពុជា។
សម្ដេចបានឈរឈ្មោះជាអ្នកតំណាងរាស្រ្តតាំងតែពីការបោះឆ្នោតដំបូលឆ្នាំ១៩៩៣ ហើយនៅឆ្នាំ២០០៦ សម្ដេចបានឡើងកាន់តំណែងជាប្រធានរដ្ឋសភា ហើយក៏បន្តទទួលបានងារជា សម្ដេចអគ្គមហាពញាចក្រី និងមានតួនាទីកិត្តិយជានាយឧត្តមសេនីយ៍ផុតលេខផ្កាយមាស៥។
សម្ដេចមានភរិយាឈ្មោះ សៅ ទី ហើយនៅថ្ងៃទី២៣ ខែមករា ឆ្នាំ២០២០ លោកជំទាវក៏ត្រូវបានព្រះមហាក្សត្រត្រាស់បង្គាប់ផ្ដល់គោរមងារជាសម្ដេចធម្មវិសុទ្ធវង្សា សៅ ទី ហេងសំរិន ដោយយើងលើស្នាដៃគាំទ្រ តស៊ូកក្នុងការរំដោះជាតិ ជាអ្នកស្នេហាជាតិ ការពារជាតិនិងសាសនា។
ព្រះរាជក្រឹត្យព្រះមហាក្សត្រ ក៏បានលើកឡើងនូវស្នាដៃសម្ដេច សៅ ទី ក្នុងការគាំពារយ៉ាងខ្ជាប់ខ្ជួនតាមមាគ៌ានយោបាយបង្រួបបង្រួមជាតិផ្សះផ្សារជាតិរបស់ព្រះបរមរតនកោដ្ឋ បរិច្ចាគកម្លាំងកាយចិត្ត និងទ្រព្យធន ជូនសង្គមជាតិ និងបានជួយកសាងសមិទ្ធផលនានា។
កន្លងមក សម្ដេចធ្លាប់បានថ្លែងប្រាប់សារព័ត៌មានក្នុងស្រុកថាសម្ដេច មានបំណងចង់នាំភរិយាដើរលេងកំសាន្តតាមផ្សារនានាក្នុងរាជធានីភ្នំពេញដូចមហាជនទូទៅដែរ។ នៅផ្ទះសម្ដេច មានសួនបន្លែប្រៀបបានផ្ទះអ្នកស្រែអ្នកចម្កា ហើយទំនេរពីការងារសម្ដេចតែងលេងប៊ូល និងទៅស្រុកកំណើត។
បច្ចុប្បន្ន សម្ដេច ហេង សំរិន មានកូនប្រសារកាន់មុខតំណែង ដូចជាជារដ្ឋមន្រ្តីក្រសួងសង្គមកិច្ច និងតីតយុទ្ធជន , អភិបាលខេត្តឧត្តរមានជ័យ, សមាជិករដ្ឋសភា និងជានាយកខុទ្ទកាល័យសម្ដេចផ្ទាល់ និងអគ្គស្នងការរងនៃអគ្គស្នងការដ្ឋាននគរបាលជាតិ ទួលបន្ទុកជាប្រធានយកដ្ឋានបុគ្គលិក៕