សិល្បៈជាតិ៖ សម្រាប់អ្នកគាំទ្ររបស់ ងួន ចាន់ដេវីត សុទ្ធតែដឹងគ្រប់ៗគ្នាថាតារារូបនេះគឺជាបងប្រុសម្នាក់ដែលស្រលាញ់ប្អូនស្រីជាទីបំផុត ព្រោះលោកគឺជាអ្នកដែលផ្ចុងផ្ដើមប្អូនស្រីលើការសិក្សាទាំងស្រុង។ ទីបំផុតការខិតខំរបស់លោកមិនចោលជាអាសាបង់នោះឡើយ ព្រោះប្អូនស្រីលោកបានបញ្ចប់ការសិក្សាយកបរិញ្ញាបត្រជូនគ្រួសារ ជំនួសលោក ដែលត្រូវបោះបង់ចោលទាំងកណ្ដាលទីដោយសារបញ្ហាជីវភាព។
សូមអាន៖ G-Devith ប៉ាវឱ្យមហាជនទៅទស្សនាភាពយន្ត «ទេពហត្ថា» ឥតគិតថ្លៃមួយ Hall ពេញនៅថ្ងៃនេះ!
ថ្មីៗនេះ ប្អូនស្រីរបស់ ជី ដេវីត គឺកញ្ញា ងួន ចាន់ដារីយ៉ា បានបង្ហោះចែករំលែកដំណឹងល្អរបស់ខ្លួន ដោយកញ្ញា បានឱ្យដឹងថាកញ្ញាទទួលសញ្ញាបត្របញ្ចប់ថ្នាក់បរិញ្ញាបត្រពីសកលវិទ្យាល័យភូមិន្ទវិចិត្រសិល្បៈ។
មិនត្រឹមតែសាមីខ្លួននោះទេដែលរីករាយចំពោះលទ្ធផលសម្រេចបានរបស់ខ្លួន ប៉ុន្តែបងប្រុសដែលជាអ្នកនៅពីក្រោយសមិទ្ធិផលដ៏ជោគជ័យមួយក្នុងជីវិតប្អូនស្រីក៏បានបង្ហាញពីទំហំទឹកចិត្តរបស់ខ្លួនក្នុងនាមជាបងប្រុសម្នាក់ដែរថា៖ «ក្នុងថ្ងៃនេះ ប្អូនស្រីរបស់ខ្ញុំបានទទួលសញ្ញាបត្របញ្ចប់ថ្នាក់បរិញ្ញាបត្រនៅមហាវិទ្យាល័យបុរាណវិទ្យា ឯកទេស បុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ។ ក្ដីស្រមៃរបស់ខ្ញុំកាលពី១២ ឆ្នាំមុន ត្រូវបានសម្រេចជាច្រើននៅក្នុងឆ្នាំនេះ។ ខ្ញុំត្រូវកំណត់គោលដៅថ្មីទៀតសម្រាប់ជំនាន់ក្រោយ។ ក្នុងនាមខ្ញុំ ជាបងប្រុស ជាឪពុកម្ដាយផង I’m so Proud of you my Dariya»។
តាមរយៈសំណេររៀបរាប់ខាងលើធ្វើឱ្យមនុស្សដែលធ្លាប់មានអគតិលើតារាចម្រៀងរូបនេះចាប់ផ្ដើមបែរមកគិតថាបុរសដែលមើលទៅប្រៀបដូចជា Playboy ប៉ុន្តែតាមពិតលោកគឺជាបុរសម្នាក់ដែលមានបេះដូងទន់ភ្លន់ និងគួរឱ្យគោរពស្រលាញ់ជាទីបំផុត ព្រោះតាមរយៈការរៀបរាប់នាពេលកន្លងមក ពីមនុស្សនៅជុំវិញខ្លួនលោក ដូចជាហ្វេនរបស់លោកបានឱ្យដឹងថា ជី ដេវីត បានលះបង់ច្រើនយ៉ាងណាស់ដើម្បីគ្រួសារ និងប្អូនស្រីរបស់ខ្លួន ហើយលោកក៏មិនដែលរួញរាក្នុងការជួយដល់អ្នកដែលត្រូវការឱ្យលោកបោះដៃទៅជួយនោះដែរ។
ម្ចាស់បទ «មហានគរ» ដែលកំពុងតែ Viral ខ្លាំងនៅលើ Youtube ពិតជាទទួលបានជោគជ័យច្រើនយ៉ាងណាស់នៅក្នុងឆ្នាំ២០២៣នេះ គ្រួសារប្រពន្ធកូន មានសុភមង្គល ចំណែកបទចម្រៀងក៏មានការពេញនិយមខ្លាំង អាចចាត់ទុកថាជោគជ័យផ្ទួនៗសម្រាប់តារារូបនេះ៕
