អ្នកចាំទី ញ៉ែម ស្លៃម៉ាន របស់ក្រុមម្ចាស់ជើងឯកឆ្នាំចាស់ក្នុងវគ្គជើងឯកថ្នាក់ខេត្តនៃពានរង្វាន់សម្តេចតេជោ ហ៊ុន សែន (Hun Sen Cup) គឺភ្នំពេញហ្គាឡាក់ស៊ី បានក្លាយជាកីឡាកររក្សាសំណាញ់ទីមិនអោយចូលគ្រាប់បាល់ (Clean Sheets)បាន២លើកមុនកីឡាករដទៃ ស្របពេលដែលក្រុមរបស់ខ្លួនមិនទាន់ស្គាល់បរាជ័យនៅឡើយ។
២ប្រកួតកន្លងមករបស់ក្រុមភ្នំពេញហ្គាឡាក់ស៊ី បានយកឈ្នះលើក្រុមខេត្តកែប ដោយលទ្ធផល ៦-០ ប្រចាំសប្ដាហ៍ទី២ លើទីលានវិទ្យាល័យ ច្បារអំពៅ នៃពូល A ខណៈនៅសប្ដាហ៍ទី៣ ក្រុមនៅរាជធានីភ្នំពេញ នេះបន្តយកឈ្នះលើក្រុមម្ចាស់ផ្ទះខេត្តកំពត ដោយលទ្ធផល ១-០ លើទីលានវិទ្យាល័យព្រះរាជសម្ភារ។ កាលពីប្រកួតសប្ដាហ៍ទី១ ក្រុមដឹកនាំដោយលោកគ្រូ ណុប ញ៉ក់ សម្រាកសិន។
អត្ថបទពាក់ព័ន្ធ៖Hun Sen Cup៖ កញ្ញា ប្លុង ពេជ្រអក្ខរ៉ា ចាយកាតច្រើនជាងគេ គិតត្រឹមសប្តាហ៍ទី៤
ដូច្នេះការបង្ហាញខ្លួន២ប្រកួតកន្លងមករបស់អ្នកចាំទី ញ៉ែម ស្លៃម៉ាន បានរក្សា Clean Sheets ទាំង២លើក។ កីឡាកររូបនេះមានវ័យ៣៤ឆ្នាំទៅហើយ ដោយគេធ្លាប់ជាសមាជិករបស់ក្រុមខេត្តត្បូងឃ្មុំ មុនផ្ទេរមកចូលរួមក្រុមភ្នំពេញហ្គាឡាក់ស៊ី។ ក្រោយពេលធ្វើដំណើរមកដល់រាជធានី ញ៉ែម ស្លៃម៉ាន ដណ្តើមបានឱកាសជាប់ជម្រើស១១នាក់ដំបូង ប្រចាំក្រុមតែម្តង ស្របពេលដែលម្ចាស់ស្រោមដៃមាសឆ្នាំចាស់ ស៊ុប អះម៉ាត់ ស្ថិតនៅកៅអីបម្រុងវិញ។ ចំណែកអ្នកចាំទីដៃទី៣របស់ក្រុមគឺកីឡាករ ម៉ាន សាន់។
ឆ្លងកាត់២០ប្រកួតក្នុងពានរង្វាន់សម្តេចតេជោ ហ៊ុន សែន ថ្នាក់ខេត្តត្រឹមវគ្គជម្រុះតាមពូលនេះឃើញថា មានកីឡាករ៥នាក់ហើយអាចរក្សា Clean Sheets បានដោយក្នុងនោះមាន៖
១) អ្នកចាំទី ញ៉ែម ស្លៃម៉ាន ភ្នំពេញហ្គាឡាក់ស៊ី ចំនួន២លើក
២) អ្នកចាំទី សំអាត រ៉ាវី របស់ត្បូងឃ្មុំ ចំនួន១លើក
៣) អ្នកចាំទី ហ៊ាង រតនៈបណ្ឌិត របស់ឧត្តរមានជ័យ ចំនួន១លើក
៤) អ្នកចាំទី ស៊ុន ខៃ របស់ខេត្តកំពង់ឆ្នាំង ចំនួន១លើក
៥) អ្នកចាំទី ទឿន វ៉ាឃីម របស់ក្រុមឈើតុំ (ពោធិ៍សាត់) ចំនួន១លើក
អត្ថបទពាក់ព័ន្ធ៖អ្នកគាំទ្រជាង១ម៉ឺននាក់ចូលទស្សនាផ្ទាល់ក្នុងពាន Hun Sen Cup ថ្នាក់ខេត្ត
ប្រកួតបន្តរបស់ក្រុមភ្នំពេញហ្គាឡាក់ស៊ី ត្រូវបើកទ្វាទីលានវិទ្យាល័យ ច្បារអំពៅ ទទួលក្រុមខេត្តព្រះសីហនុ នៅវេលាម៉ោង ៣:៣០នាទីរសៀលថ្ងៃទី៦ ខែមិថុនា ឆ្នាំ២០២៣។
តើភ្នំពេញហ្គាឡាក់ស៊ី បន្តជ័យជម្នះបានទៀតដែរឬទេ? ចុះញ៉ែម ស្លៃម៉ាន នឹងបន្តធ្វើបានល្អក្នុងប្រកួតទី៣ឬយ៉ាងណា?
ព័ត៌មានជាច្រើនពីពានរង្វាន់បាល់ទាត់សម្តេចតេជោ ហ៊ុន សែន សូមចុចអាននៅទីនេះ…
រូបថត៖Hun Sen Cup
