សិល្បៈជាតិ៖ ថ្មីៗនេះភាគីថៃបានស្នើសុំយ៉ាងទទូចឱ្យកម្ពុជាបើកច្រកទ្វារព្រំដែនអន្តរជាតិព្រះវិហារឡើងវិញបន្ទាប់ពីបានបិទអស់រយៈពេល ១៥ឆ្នាំ។ ករណីនេះត្រូវបានពលរដ្ឋកម្ពុជាគ្រប់រូបផ្ដោតការចាប់អារម្មណ៍ ជាពិសេសក្នុងនោះសិល្បករសម្ដែងរូបសង្ហាបែបខ្មែរអង្គរ អ៊ុន សិទ្ធា ក៏បានបញ្ចេញមតិមិនគាំទ្រឱ្យបើកច្រកទ្វារព្រំដែនវិញ ព្រោះលោកយល់ថាផលចំណេញបានទៅថៃមិនចំណេញដល់កម្ពុជាយើងនោះឡើយ។
សូមអាន៖ អ្នកគាំទ្រនិងមហាជនបារម្ភពីសុវត្ថិភាពលោក អ៊ុន សិទ្ធា ក្រោយឃើញលោកបង្ហោះសំណេរបែបនេះ!
លើកឡើងក្នុងនាមជាពលរដ្ឋខ្មែរ និងស្នេហាជាតិ លោក អ៊ុន សិទ្ធា បានស្នើសុំទៅប្រមុខរាជរដ្ឋាភិបាលកម្ពុជាសម្ដេចអគ្គមហាសេនាបតីតេជោ ហ៊ុន សែន
«កូនសូមគោរពជំរាបសួរសម្ដេចពុក ជាទីគោរព ថ្ងៃនេះកូនសូមចូលរួមជាមតិយោបល់ដែលពាក់ព័ន្ធទៅនឹងប្រទេសថៃ ដែលស្នើសុំឱ្យរាជរដ្ឋាភិបាលកម្ពុជាបើកច្រកព្រំដែនព្រះវិហារ។ ក្នុងនាមកូនជាប្រជាពលរដ្ឋខ្មែរមួយរូប កូនសូមមិនគាំទ្រឱ្យបើកច្រកព្រំដែនព្រះវិហារទេ។ ព្រោះប្រទេសថៃមួយនេះពិសពុលសាហាវណាស់ ភាសាផ្អែមរលួយតែស៊ីរូងដល់ក្នុង។ បើកឱ្យថៃក៏មិនចំណេញដល់ខ្មែរដែរ ខ្មែរគឺមានតែខាតប្រយោជន៍។ ប្រជាជនខ្មែរនៅតំបន់នោះអាចរស់ស៊ាំទៅហើយ តាំងពីបិទក្នុងឆ្នាំ ២០០៨ មកម្ល៉េះ។ សេចក្ដីគួរពុំគួរ សូមសម្ដេចពុក មេត្តាដល់កូនផង វីរបុរសរបស់ខ្ញុំ»
សារសំណូមពររបស់លោក អ៊ុន សិទ្ធា ជូនចំពោះសម្ដេចតេជោនេះ ត្រូវបានអ្នកលេងបណ្ដាញសង្គមគាំទ្រ និងយល់ស្របចំពោះអ្វីដែលជាការមើលឃើញរបស់លោក។ ក្នុងនោះមានការលើកឡើងថាដូច្នេះ៖ «ពិតមែនហើយបងប្រុស កម្ពុជាមិនចាំបាច់អីត្រូវបើកនោះទេ សូមបិទជារៀងរហូតកុំបើកអី ព្រោះប្រទេសនោះមិនដែលមានគំនិតល្អមកលើកម្ពុជាឡើយ»
«អ្នកសិល្បៈគ្រប់រូបមួយចំនួនធំផ្សេងទៀតគួរតែយកគំរូតាមលោក អ៊ុន សិទ្ធា ដោយហ៊ាននិយាយគាំទ្រជាតិនិយម និងគិតប្រយោជន៍បងប្អូនប្រជាពលរដ្ឋជាធំ។ ព្រោះអ្នកសិល្បៈគឺជាស្នូលដ៏ធំដែលផ្សព្វផ្សាយពត៌មានបានរហ័សនិងមានអ្នកតាមដានច្រើន។»
«ខ្ញុំ សូមគាំទ្រ អោយបិទរហូតទៅដេីម្បីភាពសុខសាន្តរបស់ប្រទេស និង រាស្ត្រការពារដល់កូនចៅជំនាន់ក្រោយ កុំអោយពិបាក ដោយសារជម្លោះរវាងប្រទេសជិតខាងបង្ករអោយមានសង្រ្គាមថ្ងៃក្រោយ ព្រោះជនជាតិថៃប្រៀបដូចសត្វក្រពេីចឹង មិនដឹងពេលណាវាខាំយេីងទេ…»
ដោយឡែក ទោះជាមានអ្នកគាំទ្រច្រើនលើសលប់ក្ដី ប៉ុន្តែនៅមានមតិមួយចំនួនបានសម្ដែងក្ដីព្រួយបារម្ភពីបងប្អូនខ្មែរដែលកំពុងរស់នៅជាប់ច្រកព្រំដែនព្រះវិហារ ដោយមានអ្នកខ្លះបានលើកជាយោបល់ដែរថា «រឿងនេះគួរទុកឱ្យបងប្អូនអ្នកព្រះវិហារមានមតិ ព្រោះយើងនៅឆ្ងាយមិនបានដឹងពីសុខទុក្ខរបស់ពលរដ្ឋខ្មែរនៅខាងនោះឡើយ»។
«បងត្រូវគិតថាប្រជាជនយេីងទៅនៅធ្វេីការងារប្រទេសគេផង បេីកច្រកក៏មានបងប្អូនប្រកបរបរ មានផលប្រយោជន៍ដល់បងប្អូនខ្មែរយេីង មានចំនុចល្អ ច្រេីនជាង ក្រែងរាល់ថ្ងៃ បានផលិតផលគេតេីបង ចំនុចល្អច្រេីនដល់បងប្អូនខ្មែរ ខ្លាចគេយកប្រាសាទព្រះវិហារមែន? ប្រែជាមានចំណូលទៅវិញទេ គាំទ្រអោយបេីកច្រកអោយ កុំបេីកជិតជេីងប្រាសាទអីចៀសវាងមានបញ្ហា សូមបេីកឆ្ងាយពីនឹងបានល្អ អាណិតប្រជាជនក្រីក្រផងនៅតំបន់នោះខ្លះ គាត់រកមុខរបរខុសច្បាប់ ដូចជាការកាប់បំផ្លាញព្រៃឈើជាដេីម បញ្ហាធំច្រកនឹងពិបាកដឹកជញ្ជូនខ្លាំងណាស់ ភ្នំខ្ពស់ពេក»
តបចំពោះមតិដែលចង់ឱ្យច្រកព្រំដែនព្រះវិហារត្រលប់មកបើកដូចប្រក្រតីវិញលោក អ៊ុន សិទ្ធា បានឆ្លើយថា «អរគុណចំពោះទស្សនៈដែលបានលើកឡើងមកនេះ តែអ្វីដែលសំខាន់នោះ ថៃមិនមែនគិតតែត្រឹមហ្នឹងទេ យើងបានតែមួយពីថៃ តែយើងបាត់ទាំងមូលពីខ្មែរ។ ត្រូវចាំថាថៃពូកែបំភ្លៃការពិតណាស់»
តារាសម្ដែងរូបនេះ បានបន្តឆ្លើយតបចំពោះអ្នកដែលចង់ឱ្យបើកច្រកព្រំដែនទៀតថា៖ «ខ្ញុំដឹងហើយក៏យល់ដែរ ខ្ញុំមានមិត្តភក្ដិរស់នៅទីនោះដែរ គាត់ថាពិបាកតាំងពីបិទច្រកព្រំដែនមក តែគាត់ថាទ្រាំបាន១៥ឆ្នាំហើយ ដូច្នេះគាត់ថាស៊ាំហើយ អ្វីដែលគួរឱ្យខ្លាចគឺថៃចង់បាននូវអ្វីដែលវាមានបំណងយូរហើយ។ ថ្វីត្បិតតែខ្ញុំសួរមិត្តភក្ដិខ្ញុំតែមួយជ្រុង តែខ្ញុំក៏យល់ពីទុក្ខលំបាករបស់បងប្អូនដែរ យើងបានតែមួយពីថៃ តែយើងត្រូវបាត់បង់ទាំងមូលពីខ្មែរ។ ខ្ញុំមានយោបល់ ព្រោះខ្ញុំក៏ជាឈាមខ្មែរ ប្រជាពលរដ្ឋខ្មែរដែរ។»
ទាំងនេះគឺជាការលើកឡើងនិងការយល់ឃើញមួយជ្រុងពីសិល្បករ និង ប្រជាពលរដ្ឋកម្ពុជាប៉ុណ្ណោះ ចំពោះការសម្រេចចិត្តណាមួយនោះ ប្រមុខរាជរដ្ឋាភិបាលកម្ពុជាគឺជាអ្នកសម្រេចហើយរាល់ការសម្រេចថានឹងបើកឡើងវិញ ឬបន្តបិទច្រកព្រំដែនព្រះវិហារ ច្បាស់ណាស់គឺមានការពិភាក្សានិងប្រឹក្សាយោបល់យ៉ាងល្អិតល្អន់ ដើម្បីជាប្រយោជន៍រួមរបស់ជនរួមជាតិ និងប្រជាជាតិខ្មែរទាំងមូល៕
