ម៉ាឡេស៊ី រៀបចំព្រឹត្តិការណ៍កីឡាវាយសី Malaysia Masters របស់ខ្លួនគិតចាប់តាំងពីឆ្នាំ២០០៩ មក ខណៈដែលលទ្ធផលនៃការប្រកួតបញ្ចប់នៅថ្ងៃអាទិត្យ ទី២៨ ខែឧសភា ឆ្នាំ២០២៣ ថ្មីៗនេះម្ចាស់ផ្ទះបន្តរបូតពានគ្រប់វិញ្ញាសា ហើយការរបូតនេះគឺបន្តច្រំដែលគិតចាប់តាំងពីឆ្នាំ២០១៧ មក។
ព្រឹត្តិការណ៍វាយសីអន្តរជាតិនេះបើកឱ្យប្រកួតចំនួន៥វិញ្ញាសា ស្របពេលដែលឆ្នាំ២០២៣ នេះវិញ្ញាសា៖
-ឯកត្តជននារី៖ Prannoy H. S (ឥណ្ឌា)
-ឯកត្តជនបុរស៖ Akane Yamaguchi (ជប៉ុន)
-វាយគូបុរស៖ Kang Min-hyuk និង Seo Seung-jae (កូរ៉េខាងត្បូង)
-វាយគូនារី៖ Baek Ha-na និង Lee So-hee (កូរ៉េខាងត្បូង)
-វាយគូចម្រុះ៖ Dechapol Puavaranukroh និង Sapsiree Taerattanachai (ថៃ)
តាមពិតទៅសមាជិករបស់ក្រុមម៉ាឡេស៊ី បានឡើងដល់វគ្គផ្ដាច់ព្រ័ត្រ២វិញ្ញាសា ប៉ុន្តែត្រូវបរាជ័យទាំងអស់គឺក្នុងវិញ្ញាសាវាយគូនារី Pearly Tan និង Thinaah Muralitharan ចាញ់ក្រុមរបស់កូរ៉េខាងត្បូង ២សិតទល់១សិត ហើយវាយគូបុរស Man Wei Chong និង Tee Kai Wun ចាញ់ក្រុមកូរ៉េខាងត្បូង ដែរដោយលទ្ធផល២សិតទល់១សិតដូចគ្នា។
ក្នុងចំណោម៥វិញ្ញាសា ខាងលើនេះកីឡាករ Tan Kian Meng និងកីឡាការិនី Lai Pei Jingជាសមាជិករបស់ម៉ាឡេស៊ី ចុងក្រោយគេដែលឈ្នះជើងឯកក្នុងនាមជាម្ចាស់ផ្ទះលើវិញ្ញាសាវាយគូចម្រុះ ក្នុងឆ្នាំ២០១៧ ខណៈគិតពីពេលនោះមកក្រុមភ្ញៀវប្រមូលត្រឡប់ទៅផ្ទះវិញទាំងអស់។
ព្រឹត្តិការណ៍វាយសីនេះ រៀបចំឡើងពីថ្ងៃទី២៣ ដល់២៨ ខែឧសភា ឆ្នាំ២០២៣ ដែលគេចាត់ទុកថាជាកម្រិត BWF World Tour Super 500 មានប្រាក់រង្វាន់សរុបប្រមាណ៤២០០០០ ដុល្លារអាមេរិក ធ្វើឡើងនៅទីលាន Axiata Arena ក្នុងទីក្រុងកូឡាឡាំពួរ ប្រទេសម៉ាឡេស៊ី។
ម្ចាស់ជើងឯកផ្នែកវិញ្ញាសាឯកត្តជន ទទួលបានប្រាក់រង្វាន់៣១,៥០០ដុល្លារអាមេរិក ហើយជើងឯករងបាន១៥,៩៦០ដុល្លារអាមេរិក ស្របពេលវិញ្ញាសាវាយគូម្ចាស់ជើងឯកបានចំនួន៣៣,១៨០ដុល្លារអាមេរិក ហើយជើងឯករងទទួលបាន១៥,៩៦០ដុល្លារអាមេរិក។
សូមបញ្ជាក់ថាក្នុងព្រឹត្តិការណ៍កីឡាស៊ីហ្គេមឆ្នាំ២០២៣ កន្លងទៅលើទឹកដីនៅប្រទេសកម្ពុជា ក្រុមម៉ាឡេស៊ី របូតមេដាយមាសដែរ ដោយកាលនោះឥណ្ឌូណេស៊ី ដណ្តើមបាន៥គ្រឿង ថៃ២គ្រឿង និងម្ចាស់ផ្ទះកម្ពុជា ១គ្រឿង៕