តារាកំប្លែងពោរពេញទៅដោយសមត្ថភាព អ្នកនាង «ស្រីខ្ញុង» កាលពីរាត្រីម្សិលមិញនេះ (ថ្ងៃទី១៨ ខែកក្កដា ឆ្នាំ២០២១) បានចេញមកបញ្ចេញកំហឹងយ៉ាងពុះកញ្ជ្រោលតាមរយៈការ Live លើបណ្ដាញសង្គមហ្វេសប៊ុក ដោយសារតែមានអ្នកចូលមកជេរប្រមាថ និង មើលងាយរឿងអ្នកនាងបានប្រកាសលាឈប់ពីសិល្បៈនាពេលកន្លងមក។
មហាជនប្រហែលជាបានជ្រាបហើយថាអ្នកនាងខ្ញុង ធ្លាប់បានប្រកាសថាអ្នកនាងនឹងលាលែងចេញពីសិល្បៈតាមរយៈការ Live វីដេអូមួយកាលពីថ្ងៃទី១១ ខែកក្កដា ឆ្នាំ២០២១ ដោយក្នុងវីដេអូនោះមានចំណុចខ្លះអ្នកនាងរំជួលចិត្តខ្លាំងរហូតដល់បង្ហូរទឹកភ្នែកខណៈពេលរៀបរាប់ផងដែរ។
សូមចុចអាន អ្នកគាំទ្រហែគ្នាលើកទឹកចិត្ត ក្រោយអ្នកនាងខ្ញុង ប្រកាសចាកចេញពីសិល្បៈទាំងទឹកភ្នែក!
នៅក្នុងវីដេអូឡាយថ្មីមួយនេះ អ្នកនាងស្រីខ្ញុង ខឹងឆេះដុំខ្លាំងព្រោះតែមានអ្នកចូលមក ខមមិន មួយចំនួនបានប្រើពាក្យពេចន៍ជេរប្រមាថទៅលើអ្នកនាងថា «ជាក្រពើវង្វេងបឹង ជាមនុស្សអត់កំណើត ជាមនុស្សបាតសង្គម ជាមនុស្សភ្លេចកំណើត ជាដើម។ល។» អ្នកនាងបានសង្កត់ធ្ងន់ថាវីដេអូដែលអ្នកនាងកំពុងតែ Live នេះគឺផ្ញើទៅកាន់អ្នកដែលបានចូលមកជេរប្រមាថអ្នកនាងទាំងមិនបានដឹងរឿងច្បាស់ ពីរឿងរ៉ាវពិត ថែមទាំងអ្នកនាងបានតបតទៅកាន់អ្នកដែលចូលមកខមមិនវិញថាជាមនុស្សខ្វះការអប់រំ ឬមានការអប់រំទាប អ្នកនាងក៏បានបញ្ជាក់ដែរថាអ្នកនាងទទួលស្គាល់ថាខ្លួនជាមនុស្សរបស់មហាជន តែបើមហាជនណាមិនគោរព មិនស្រលាញ់ និង ឱ្យតម្លៃអ្នកនាងទេ អ្នកនាងក៏មិនគោរពស្រលាញ់និងឱ្យតម្លៃដូចគ្នាដែរ។
«ខ្ញុំរៀនបានត្រឹមថ្នាក់ទីមួយទីប្រាំពីរ ខ្ញុំរៀនមិនពូកែទេ ខ្ញុំកើតក្នុងត្រកូលអ្នកក្រ ឪពុកខ្ញុំធ្វើសំណង់ ម្ដាយខ្ញុំស្លាប់ចោលខ្ញុំតាំងពីខ្ញុំអាយុបានប្រាំឆ្នាំ ខ្ញុំតស៊ូចិញ្ចឹមបងប្អូនខ្ញុំបីបួននាក់ រហូតដល់ខ្ញុំមានប្ដីមានគ្រួសារ បែកបាក់គ្នា បន្សល់ទុកកូនមួយគ្រាប់ រហូតខ្ញុំមានគ្រួសារក្រោយនិងមានកូនម្នាក់ទៀត តែខ្ញុំនៅតែតស៊ូរកស៊ីដោយសុចរិត ដូច្នេះកុំជេរប្រមាថលើខ្ញុំឱ្យសោះព្រោះអ្នកមិនបានដឹងពីរឿងរ៉ាវក្នុងចិត្តខ្ញុំទេ។ ខ្ញុំមិនដែលពោលម្ដងណាឡើយថាខ្ញុំមិនមានបាន មានគេស្គាល់ដោយសារតែសិល្បៈ ខ្ញុំមិនដែលនិយាយចេញពីមាត់ខ្ញុំទេ មួយទៀត»
នៅក្នុងវីដេអូនៃការរៀបរាប់របស់អ្នកនាងមានខ្ញុង ក្រៅពីរឿងជះកំហឹងដែលត្រូវគេជេរប្រមាថ ក៏នៅមានចំណុចមួយចំនួនដែលធ្វើឱ្យមានការចាប់អារម្មរណ៍ខ្លាំងដែរ ព្រោះអ្នកនាងបានបង្ហើបឱ្យដឹងថាអ្នកនាងមានវិបត្តិទោះមិនបានបញ្ជាក់ថាជាក្ដីទុក្ខសោករឿងអ្វី ថែមទាំងបង្ហើបថែមទៀតថាអ្នកនាងមានជំងឺបាក់ទឹកចិត្តថែមទៀតផង។
« ចង្កៀងផ្ទះខ្ញុំអ្នកក៏មិនបានដឹង វិបត្តិក្នុងចិត្តខ្ញុំ ជំងឺបាក់ទឹកចិត្ត រហូតដល់ធ្វើឱ្យខ្ញុំភ័យខ្លាចមិនហ៊ានធ្វើការងារក៏មិនមានអ្នកណាបានដឹងដែរ»
នៅក្នុងវីដេអូនោះដែរ ក៏នៅមានអ្នកលេងបណ្ដាញសង្គមមួយចំនួនបានចូលមកខមមិនភាសាមិនសមរម្យជាច្រើនដែលធ្វើឱ្យមានការឆ្លងឆ្លើយក្ដៅគគុករវាងអ្នកនាងនិលេងបណ្ដាញសង្គម ពាក់ព័ន្ធនឹងបញ្ហាចម្រូងចម្រាស់រឿងអ្នកនាងចាកចេញពីសិល្បៈនិងរឿងដែលអ្នកនាងលាឈប់ពីស្ថានីយទូរទស្សន៍ CTN។
អ្នកនាងខ្ញុងក៏បានពន្យល់ចុងបញ្ចប់ដែរថា ការដែលអ្នកនាងលើកឡើងថា «បើសិនខ្ញុំឈប់ពីសិល្បៈនៅគាំទ្រខ្ញុំទៀតឬអត់នោះ» ការពិតគឺអ្នកនាងមានបំណងចង់លាឈប់ពីស្ថាប័ន CTN ជាបុគ្គលិកពេញសិទ្ធិ ហើយមកធ្វើការជាបុគ្គលិកទទួលកម្រៃតាម Show វិញ ព្រោះអ្នកនាងមានអារម្មណ៍រអៀសខ្លួនដោយខ្លួនឯងដែលមិនអាចបំពេញការងារបានល្អ បើសិនជានៅជាបុគ្គលិកបំរើការងារពេញម៉ោង។
ចុងក្រោយអ្នកនាងខ្ញុង បានផ្ដាំថាតទៅនៅពេលដែលអ្នកនាងឡាយលក់ផលិតផលសូមកុំចូលមកសាកសួរអ្នកនាងពីរឿងរ៉ាវទាំងអស់នេះទៀត បើមានអ្វីមិនយល់ឬឆ្ងល់សូម Inbox ទៅអ្នកនាង អ្នកនាងពន្យល់ឱ្យបានយល់ច្បាស់ ចំណែកវីដេអូមួយដែលអ្នក Live នេះគឺផ្ញើទៅកាន់អ្នកតែស្ករ៕