តារាចម្រៀង ខាយ បានធ្វើឱ្យបទចម្រៀងបែប Acoustic កាន់តែមានការចាប់អារម្មណ៍ខ្លាំងថែមទៀតបន្ទាប់ពីលោកបានលើកយកបទចម្រៀងមរតកដើមមកច្នៃច្រៀងបានយ៉ាងពីរោះរណ្ដំ។
«អនអើយស្រីអន» សំនៀងដើមរបស់អធិរាជសំឡេងមាស ស៊ិន ស៊ីសាមុត ដែលត្រូវបានតារាចម្រៀងជំនាន់ថ្មីជាច្រើនរូបយកមកច្រៀងឡើងវិញ គឺជាបទមួយដ៏ល្បីល្បាញដកចេញពីសាច់រឿងនៃភាពយន្ត «អនអើយស្រីអន» សម្ដែងដោយតារាសម្ដែងល្បី គង់ សំអឿន និងតារាសម្ដែង ទិត្យ វិជ្ជរ៉ាដានី។
យ៉ាងណាមិញ លោក ខាយ តារាចម្រៀង Original និង ជាតារាសម្ដែងផងនោះបានធ្វើឱ្យបទចម្រៀងមរតកដើមដែលមានចំណងជើងថា «អនអើយស្រីអន» ដែលលោកលើកយកបកស្រាយបង្ហោះនៅលើ App Tiktok កាន់តែពីរោះនិងមានរសជាតិប្លែកថ្មីមួយបែបទៀត ដោយការយកបទចម្រៀងនេះមកច្រៀងជាលក្ខណៈ Acoustic ជាមួយនឹងហ្គីតា រហូតទទួលបានការសរសើរយ៉ាងច្រើនពីអ្នកគាំទ្រនិងមហាជន ចំពោះគំនិតច្នៃប្រឌិតរបស់លោក។
តារាចម្រៀងរូបសង្ហា ខាយ ដែលមានឈ្មោះដើមកំណើតថា ទៀន អេងលាំង គឺជាតារាចម្រៀងដែលមានការគាំទ្រខ្លាំងពីសំណាក់អ្នកគាំទ្រជាពិសេសបទចម្រៀង Original «ខ្យល់» ដែលជាបទចម្រៀងក្នុងរឿង «ធីតាព្កុលមាស» ជារឿងដែលលោកបានចូលរួមសម្ដែងដែរនោះ គឺជាស្នាដៃនិពន្ធទំនុកច្រៀង មេឡូឌីនិងច្រៀងដោយលោកផ្ទាល់ មានចំនួនរហូតដល់ជាង១លានដងហើយគិតត្រឹមព្រឹកថ្ងៃទី២១ ខែកក្កដា ឆ្នាំ២០២១នេះ៕
ស្ដាប់បទចម្រៀង «អនអើយស្រីអន» បែប Acoustic ច្រៀងដោយ ខាយ សូមចុចត្រង់នេះ