តារាចម្រៀងសំនៀងផ្អែមស្រទន់រណ្ដំដួងចិត្ត ប្រចាំផលិតកម្ម សាន់ដេ កញ្ញា អ៊ីវ៉ា កាលពី ២ម៉ោងមុននេះបានចេញមកផុសសំណេររៀបរាប់ពីទុក្ខសោកក្នុងទ្រូងព្រមទាំងរូបភាពយំរបស់ខ្លួនដែលធ្វើឱ្យមហាជនមានការចាប់អារម្មណ៍និងបារម្ភខ្លាំងមិនដឹងថាតារារូបនេះកំពុងមានវិបត្តិអ្វី?
នៅថ្ងៃពុធទី ២១ ខែកក្កដា ឆ្នាំ២០២១ នេះតាមរយៈហ្វេសប៊ុកដែលមានឈ្មោះថា Khin Sreyneath ដែលជាឈ្មោះដើមកំណើតរបស់ស្រីស្រស់អ៊ីវ៉ា បានចេញមកថ្លែងត្អូញត្អែររៀបរាប់រឿងទុក្ខសោកដែលកប់ក្នុងទ្រូងមួយចំនួន រួមជាមួយនឹងរូបថតមួយសន្លឹករបស់កញ្ញាដែលជារូបសម្រក់ទឹកភ្នែក។
នៅក្នុងសំណេរនោះ ម្ចាស់បទ «កូនប្រសារធ្វើស្រែម៉ែមិនពេញចិត្ត» បានរៀបរាប់យ៉ាងក្បោះក្បាយហាក់ទម្លាយរឿងណែនទ្រូងយ៉ាងដូច្នេះថា៖
«ជីវិតដែលមានកម្មទោះប្រឹងធ្វើល្អដល់ស្លាប់ លះបង់អស់ពីខ្លួនក៏នៅតែមិនអាចល្អ ពេលខ្លះនឿយហត់ណាស់ រ៉ាប់រងម្នាក់ឯងច្រើនពេកហើយ ខ្ញុំមិនមែនមនុស្សយន្តទេ ខ្ញុំចេះហត់ ខ្ញុំចេះឈឺ ខ្ញុំចេះខឹង ខ្ញុំចេះពិបាកចិត្ត ខ្ញុំចេះយំ .. ខ្ញុំខំណាស់ ខ្ញុំប្រឹងណាស់ មិនបានជួយរំលែកខ្ញុំ កុំដាក់សំពាធលើខ្ញុំច្រើនពេក ព្រោះខ្ញុំរងមកយូរហើយ មិនចង់បានអ្វីទេ សុំត្រឹមការលើកទឹកចិត្តគ្រប់គ្រាន់ហើយ»។
ក្រោយតារាចម្រៀងសំណព្វចិត្តផុសសំណេររៀបរាប់ខាងលើ អ្នកគាំទ្រជាច្រើនបានចូលមកលើកទឹកចិត្តឱ្យកញ្ញាមានការតស៊ូជាបន្តទៀត អ្នកខ្លះក៏ចូលមកសួរទៀតថា តើមានរឿងអ្វីកើតឡើង? តែក្នុងនោះក៏មានអ្នកចូលមកខមមិនថាបានស្ដាប់ហើយបទថ្មីនេះ កម្សត់ណាស់ហើយក៏ពីរោះដែរ ចំណែកអ្នកមួយចំនួនទៀតក៏បានលើកដែរថាមួយបទនេះសេដពេកហើយអាយដលអើយ។
គួរដែរដឹងថាការពិតផុសរបស់កញ្ញា អ៊ីវ៉ា គឺជាការដកស្រង់យក រូបភាព និង ខ្លឹមសារនៃបទចម្រៀងថ្មីរបស់ខ្លួនដែលបានចេញនៅក្នុងផលិតកម្មចម្រៀង សាន់ដេ (Sunday Production) ដែលមានចំណងជើងថា «ពេលគ្មានខ្ញុំ» ប៉ុន្តែពាក្យមួយម៉ាត់របស់អ្នកនាងនៅតែបង្កប់ជាមន្ទិលសង្ស័យសម្រាប់អ្នកគាំទ្រដដែលព្រោះអ្នកនាងបានសរសេរថា «ក្នុងចម្រៀងក៏យំ ពេលនេះក៏យំ»។ មិនថាតារាចម្រៀងរូបនេះមានបញ្ហាអ្វីឱ្យពិតប្រាកដនោះទេ អ្នកគាំទ្រនៅតែស្រុះគ្នាលើកទឹកចិត្តនិងផ្ដល់កម្លាំងចិត្តឱ្យកញ្ញាឆ្លងផុតពេលវេលាដ៏លំបាកជានិច្ច៕