បទចម្រៀងថ្មីច្រៀងលាយភាសាថៃរបស់ ខេមរៈ សិរីមន្ត តារាចម្រៀងឈានមុខគេរបស់ផលិតកម្មហង្សមាស និង រស្មីហង្សមាស កំពុងតែទទួលបានការចាប់អារម្មណ៍ខ្លាំងពីសំណាក់ហ្វេន ជាពិសេសទៀតនោះ បទចម្រៀងនេះក៏ត្រូវបាន YouTuber ថៃជាច្រើនរូបបានយកទៅធ្វើ Reaction ព្រមទាំងសរសើរយ៉ាងខ្លាំងចំពោះតារាចម្រៀងកម្ពុជាយើងផងដែរ។
«នឹងបងខ្លះទេ-คิดถึงฉันไหม?» គឺជាបទចម្រៀងថ្មីចង្វាក់ប៉ុបរ៉ក់របស់លោក ខេមរៈ សិរីមន្តដែលទើបតែចេញបានរយៈពេល ៤ថ្ងៃប៉ុណ្ណោះ ប៉ុន្តែសន្ទុះនៃការគាំទ្រពិតជាខ្លាំងមិនធម្មតាទាំងនៅលើឆាណែល យូធូប ក៏ដូចជានៅលើផេករបស់ផលិតកម្មហង្សមាស ថែមទាំងហ្វេនសុទ្ធតែលើកសរសើរដូចៗគ្នា ថាបទចម្រៀងនេះពិតជាពីរោះ ស្ដាប់មិនចេះជិនណាយ ចំណែក តួស្រីក្នុងបទចម្រៀងនេះវិញក៏ទទួលបានការសរសើរថាស្អាតនិងគួរឱ្យស្រលាញ់ខ្លាំងមិនចាញ់ចម្រៀងប៉ុន្មាននោះទេ។
Youtuber ថៃដូចជា Channel Ayumi May Lunar , Channel Praphat និង Channel Anu chidaដែលធ្វើការ Reaction បទចម្រៀងនេះ ភាគច្រើនលើកសរសើរចំពោះសមត្ថភាពនិងទេពកោសល្យរបស់តារាចម្រៀងកម្ពុជា ខេមរៈ សិរីមន្ត ថាលោកមានបច្ចេកទេសខ្ពស់អាចច្រៀងបានគ្រប់ទំរង់ ព្រោះកន្លងមក YouTuber ទាំងអស់នោះធ្លាប់ស្គាល់និងដឹងពីសមត្ថភាពសំឡេងច្រៀងរបស់លោក រួចស្រេចហើយតាមរយៈបទចម្រៀងល្បីឆ្លងប្រទេស ចង្វាក់ញាក់កន្ត្រាក់អារម្មណ៍ «ពឺតៗ» ដែលជាបទមួយផ្ទុះខ្លាំងលើ Tiktok និងមាន YouTuber ទាំងខ្មែរ និងបរទេស យកទៅ Reaction យ៉ាងច្រើនសន្ធឹកសន្ធាប់ ៕