ព្រឹត្តិការណ៍កីឡាអូឡាំពិក 2020 Summer Olympics នៅទីក្រុងតូក្យូ ប្រទេសជប៉ុន នឹងរៀបចំពិធីបើកនៅរសៀលថ្ងៃសុក្រ ទី២៣ ខែកក្កដា ឆ្នាំ២០២១ នេះហើយ ក្រោមព្រះរាជាធិបតីភាពព្រះមហាក្សត្រ Naruhito ខណៈប្រតិភូទៅពីគ្រប់ប្រទេសនឹងធ្វើដំណើរបង្ហាញខ្លួនក្នុងបរិវេណពហុកីឡដ្ឋាន Olympic Stadium នៅក្នុងពិធីនេះដែរ។
ចំពោះកម្ពុជា ដឹកនាំដោយឯកឧត្តម វ៉ាត់ ចំរើន ជានាយបេសកកម្ម ខណៈកីឡាការិនី ឃឿន ប៊ុនពេជ្រមរកត និងកីឡាករ ប៉ែន សុគង់ ត្រូវបានចុចឈ្មោះឱ្យកាន់ទង់ជាតិរបស់កម្ពុជា នៅក្នុងពិធីបើកព្រឹត្តិការណ៍នេះ។ កន្លងមកគណៈកម្មការកំណត់យកអត្តពលិកតែ១រូបប៉ុណ្ណោះ ដើម្បីកាន់ទង់ជាតិ ដង្ហែ ប៉ុន្តែក្នុងសម័យកូវីដ-១៩ នេះមានការចុចឈ្មោះអត្តពលិកដល់ទៅ២នាក់ដើម្បីត្រៀម។ ពិធីបើកនឹងចាប់ផ្ដើមឡើងពីម៉ោង៤រសៀល (ម៉ោងនៅកម្ពុជា) តទៅ។
សូមបញ្ជាក់ថាកម្ពុជា បញ្ជូនអត្តពលិក៣រូបទៅចូលរួមប្រកួត រួមមាន កីឡាការិនីហែលទឹក ឃឿន ប៊ុនពេជ្រមរកត ហែលក្នុងវិញ្ញាសាហែលទឹក៥០ម៉ែត្រសេរីនារី។ កីឡាករហែលទឹក ហែម ប៉ុច ក្នុងវិញ្ញាសាហែលទឹក៥០ម៉ែត្រសេរីបុរស។ កីឡាករអត្តពលកម្ម ប៉ែន សុគង់ នឹងរត់ល្បឿនចម្ងាយ១០០ម៉ែត្របុរស។
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ ការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕
