បុរសអេស្ប៉ាញ Xavier Hernández Creus ដែលអ្នកគាំទ្រស្គាល់ថា Xavi ជាអ្នកចាត់ការទូទៅក្រុមបាល់ទាត់ Al Sadd នៅលីគកំពូលកាតារ បានសម្រេចចិត្តនាំយកខ្សែបម្រើសមាជិកក្នុងក្រុមជម្រើសជាតិហ្គាណា ធ្លាប់ប្រកបអាជីពនៅលីគកំពូលអង់គ្លេស មករួមក្រុមត្រៀមប្រកួតរដូវកាលថ្មី។
កីឡាកររូបនោះគឺ André Ayew វ័យ៣១ឆ្នាំធ្លាប់ឈ្នះពានរង្វាន់ជាច្រើនជាមួយក្រុមជម្រើសជាតិខ្លួនទាំងនៅទ្វីបអាហ្រ្វិក និងពានរង្វាន់កម្រិតអន្តរជាតិនានា។ កីឡាករឈុតយុវជនថ្នាល 1860 Munich , Nania និង Marseille បានចុះកិច្ចសន្យាអាជីពជាមួយក្លិប Marseille របស់លីគកំពូលបារាំង ចន្លោះឆ្នាំ២០០៧ ដល់២០១៥ ខណៈនៅឆ្នាំ២០១៥-១៦ រូបគេបានផ្ទេរទៅលីគអង់គ្លេស ដោយចូលរួមជាមួយក្រុម Swansea City ហើយចន្លោះឆ្នាំ២០១៦-២០១៨ បានចូលរួមក្រុម West Ham United និងចាប់ពីឆ្នាំ២០១៨ ដល់២០២១ ត្រឡប់ទៅកាន់Swansea City វិញ។
អត្ថបទពាក់ព័ន្ធ៖Xavi Hernandez បន្តកិច្ចសន្យាដឹកនាំក្លិបនៅកាតារដល់ឆ្នាំ២០២៣
Xavi បានដឹកនាំក្រុម Al Sadd មិនដែលចាញ់ទាល់តែសោះ ហើយក្លាយជាម្ចាស់ជើងឯកលីគកំពូលប្រទេសកាតារ លើទី១៥ ក្នុងរដូវកាលឆ្នាំ២០២១ ខណៈក្រុមនេះទើបតែធ្លាក់ចេញត្រឹមវគ្គជម្រុះតាមពូលនៃរង្វាន់ជើងឯកទ្វីបអាស៊ី 2021 AFC Champions League កាលពីពេលថ្មីៗ។
កីឡាករ André Ayew ជាកីឡាករបរទេសទី៥ហើយដែលក្លិបAl Sadd បានចុះបញ្ជីនៅរដូវកាលនេះបន្ទាប់ពីខ្សែបម្រើ Jung Woo-Young របស់កូរ៉េខាងត្បូង, ខ្សែប្រយុទ្ធ Baghdad Bounedjah របស់អាល់ហ្សេរី, ខ្សែបម្រើប្រេស៊ីល Guiherme និងខ្សែបម្រើអេស្ប៉ាញ Santi Cazorla៕