សិល្បៈជាតិ៖ តារាសម្ដែង អូន បូរមី ដែលធ្លាប់បានបង្ហាញមុខក្នុងខ្សែភាពយន្តខ្មែរបែបកំប្លែង និងធ្លាប់បង្ហាញមុខចូលរួមកម្មវិធីទូរទស្សន៍នានាដើម្បីបង្កភាពសប្បាយរីករាយជូនមហាជននោះ ថ្មីៗនេះ សារព័ត៌មានត្រយងទទួលដំណឹងមកថា កញ្ញាកំពុងតែសម្រាកព្យាបាលជំងឺសន្លាក់ធ្ងន់ធ្ងរ និងប្រេះឆ្អឹង គួរឱ្យព្រួយបារម្ភខ្លាំង។
កញ្ញា អូន បូរមី បានប្រាប់មហាជនអ្នកគាំទ្រឱ្យដឹងតាមហ្វេសប៊ុកថា គ្រូពេទ្យបានប្រាប់កញ្ញាថាខ្លួនមានជំងឺពិស ក៏ប៉ុន្តែដោយសារតែភាពធ្វេសប្រហែសខ្លួនមួយពេល ទើបកញ្ញាមិនចាប់អារម្មណ៍ព្យាបាលជំងឺនេះឱ្យជាសះស្បើយទាន់ពេលវេលា ហើយថែមទាំងបណ្ដែតបណ្ដោយរហូតជំងឺកាចសាហាវនេះបានធ្វើឱ្យកញ្ញាកើតជំងឺរលាកសន្លាក់ជង្គង់ធ្ងន់ធ្ងរ និងក្រោយនេះវាវិវឌ្ឍន៍ទៅរកសភាពប្រេះឆ្អឹង ដែលជាហេតុធ្វើឱ្យក្បាលជង្គង់របស់កញ្ញាមានសភាពហើមខ្លាំង មើលទៅដូចជាមានទឹកដក់នៅក្នុងស្បែកអីចឹង។
កញ្ញា អូន បូរមី បានសម្រក់ទឹកភ្នែករៀបរាប់ប្រាប់មហាជននៅក្នុងការ Live របស់ខ្លួនថា នេះត្រឹមតែមួយប៉ប្រិចភ្នែកសោះ ជីវិតកញ្ញាត្រូវប្រែប្រួលអស់រលីង ត្រូវបង់រូបបង់ឆោម សូម្បីតែក្រោកដើរក៏ពិបាក ហើយមិនអាចត្រឡប់មកធ្វើការងារសម្ដែងសិល្បៈបានដូចមុនឡើយ និងត្រូវចំណាយលុយជាប្រចាំថ្ងៃ ដើម្បីដេកសម្រាកព្យាបាលជំងឺដែលនៅមួយកន្លែងនៅលើគ្រែថែមទៀត។ យ៉ាងណាមិញ កញ្ញា អូន បូរមី ក៏បានដង្ហើបប្រាប់ទៅអ្នកដែលជំពាក់បំណុលខ្លួនដែរថា ពេលនេះកញ្ញាក៏ត្រូវការលុយសម្រាប់ព្យាបាលខ្លួនផងដែរ។
មហាជនអ្នកគាំទ្រពិតជាបារម្ភខ្លាំងចំពោះសភាពសុខភាពរបស់តារាសម្ដែងស្រីរូបនេះនាពេលសព្វថ្ងៃ ព្រោះមើលទៅកញ្ញា អូន បូរមី គឺមានសម្ពាធផ្លូវចិត្តរាល់ថ្ងៃ ដោយសារតែកញ្ញាពិបាកចិត្តខ្លាំងពេក ហើយពិបាកទទួលយកស្ថានភាពនាពេលនេះបាន។ កញ្ញា អូន បូរមី បានក្រើនរំលឹកទៅកាន់មហាជនថា ការយកចិត្តទុកដាក់ចំពោះសុខភាពគឺជារឿងសំខាន់បំផុតដែលមិនអាចមើលរំលង និងធ្វេសប្រហែលបានឡើយ ព្រោះកញ្ញាមិនចង់ឱ្យគ្រប់គ្នាជួបបញ្ហាដូចកញ្ញាដូចនាពេលនេះអីចឹង៕
