សិល្បៈជាតិ៖ ភាពយន្តចិនថ្មីមួយដែលមានចំណងជើងថា No More Bets ត្រូវបានលាតត្រដាងពី ការប្រព្រឹត្តិល្បែងស៊ីសងនៅលើអនឡាញន៍ ដោយមានគ្រប់រូបភាពដូចជា ការបោកប្រាស់តាមប្រព័ន្ធអនឡាញ ការជួញដូរមនុស្ស និង ការចាប់ជំរិត ជាដើម។ រហូតធ្វើឱ្យអ្នកលេងបញ្ដាញសង្គមយល់ឃើញថា ភាយន្តចិននេះកំពុងធ្វើឱ្យកេរ្តិ៍ឈ្មោះកម្ពុជាកាន់តែយ៉ាប់យឺនឡើង។
ដោយឡែក ការផ្សព្វផ្សាយភាពយន្តនេះត្រូវបានធ្វើឡើងយ៉ាងទូលំទូលាយនៅលើបណ្ដញសង្គមនានា និងរោងកុនមួយចំនួន ដែលភាពយន្តនេះបានធ្វើដំណើរទៅចាក់បញ្ចាំងនៅបណ្ដាប្រទេសជាច្រើននៅភូមិភាគអាស៊ីអាគ្នេយ៍ ។
មួយវិញទៀត ការផ្សព្វផ្សាយភាពយន្តនេះដោយបង្ហាញពីព្យញ្ជនៈភាសាខ្មែរ ដែលបានឃើញនៅលើអាវរបស់តួសម្ដែងមួយក្រុមដែលចូលទៅប្រតិបត្តិការលេងល្បែងដោយមានការភ្នាល់ដល់ជីវិតក៏មាន។ ប៉ុន្តែអ្វីដែលគួរឱ្យចាប់អារម្មណ៍ខ្លាំងជាងនោះគឺ ភាគច្រើនជនជាតិចិនដែលចូលមករកស៊ីនៅក្នុងប្រទេសកម្ពុជា ពួកគេមិនចេះភាសាខ្មែរនោះទេ ពួកគេអាចនឹងប្រើប្រាស់ការបកប្រែពីសំណេរភាសាចិន មកជាភាសាខ្មែរតាមរយៈ Google Translate ដែលពាក្យពេចន៍ភាសាខ្មែរនៅលើអាវរបស់តួសម្ដែងនោះ ទំនងជាមានអត្ថន័យថា «រោងចក្រពន្លត់អគ្គីភ័យ» តែប៉ុណ្ណោះ។ តើចេតនារបស់ភាពយន្តនេះ អាចនឹងធ្វើឱ្យអ្នកទស្សនាមានការភ័ន្តច្រឡំ និងខ្លាចរអាប្រទេសកម្ពុជាឬយ៉ាងណា? ហើយភាពយន្តនេះអាចនឹងធ្វើឱ្យអ្នកទស្សនាយល់ខុសថា តើប្រទេសជាតិរបស់យើងគឺជាចំណុចស្នូលមួយដែលមានឧក្រិដ្ឋកម្មអស់ទាំងនោះ?
ហ្វេសប៊ុកផេកមួយដែលមានអ្នកគាំទ្រច្រើនឈ្មោះថា បុរាណាចារ្យ បានលើកឡើងថា ៖ «មោទនភាពជាតិខ្មែរអក្សរខ្មែរបានស្ថិតលើឆុតឆាកភាពយន្តដ៏ល្បីល្បាញរបស់ចិន ភាពយន្តខ្នាតធំ 孤注一掷 ឬ No More Bets ជាភាពយន្តខ្នាតធំ និង ល្បីល្បាញបំផុតរបស់ចិននាវេលានេះ។ ភាពយន្តនេះផងដែរ បាននិយាយពី online scammers ការបោកប្រាស់តាមប្រព័ន្ធអនឡាញ ការជួញដូរមនុស្ស និង ការចាប់ជំរិត ដែលជនជាតិចិន រងគ្រោះ នៅប្រទេសនានានៅអាស៊ីអាគ្នេយ៍ ។ គេរំពឹងផងដែរថា បន្ទាប់ពីបញ្ជាំងភាពយន្តនេះហើយ ជនជាតិចិនជាច្រើនខ្លាចរអាមិនហ៊ាន ធ្វើដំណើរទៅកាន់ប្រទេសអាស៊ីអាគ្នេយ៍ ជាពិសេស ប្រទេសមីយ៉ាន់ម៉ា និង ប្រទេស….ស្អី១នោះ ដែលជាចំនុចកណ្តាល online scam នៅអាស៊ានយើងនេះ។ មតិប្រជាជនមីយ៉ាន់ម៉ាជាច្រើន បានប្រតិកម្មចំពោះភាពយន្ត ព្រោះ online scam គឺ ត្រូវបាននាំចូលមកដោយជនជាតិចិនសោះ តែចុងក្រោយប្រទេសមីយ៉ាន់ម៉ាទាំងមូលក្លាយជាផ្ទាំងស៊ីបតែឯកឯង។ ចំណែកប្រជាជនកម្ពុជាវិញ មិនទាន់បានដឹងឮឬមានយោបល់អ្វីទេ។»
យ៉ាងណាមិញ នៅមានហ្វេសប៊ុកផេកមួយទៀតបានចូលរួមជាមតិត្រិះរិះពិចារណាដែរថា៖ «មូលហេតុផ្សេងៗ ដែលទេសចរខ្លាចរអាមិនហ៊ានមកស្រុកយើង! សម្រាប់ប្រជាពលរដ្នរំដួល ដែលតែងក្រអើតក្រទម គិតថាយើងមានប្រាសាទ យើងមានឆ្នេរស្អាតបំផុត យើងមានធម្មជាតិដ៏ល្អ តែមិនសូវអានព័ត៌មានបរទេស តើប្រទេសដទៃគេស្គាល់យើងកំរិតណា? មិនបាច់ប្រទេសឆ្ងាយៗទេ ត្រឹម Singapore Malaysia គេខ្លាចខ្មែរ គេថាអត់ហ៊ានមកទេ ស្រុកខ្មែរ ចាប់ជំរិត ចាប់វះក្រលៀនលក់ជាដើម ត្រឹមមិត្តរួមថ្នាក់អេតមីនជនជាតិSingapore មានBusiness Trip មកខ្មែរ ឆាតមកសួរ ស្រុកខ្មែរ សុវត្តិភាពទេ? ព្រមទាំងផ្ញើរLink ព័ត៌មានពីស្រុកគេមក ឯងនេះធ្លាក់ថ្លើម គេថាបើគេមកត្រូវមានទំនាក់ទំនងជាមួយម្ចាស់ស្រុកណាមួយ បើគេបាត់ខ្លួនដោយប្រការណាមួយ បងប្អូនគេដឹងថាទាក់ទងអ្នកណា……»។
ប្រភពដដែលនេះ បានលើកឡើជាច្រើនទៀតថា ភាពយន្ត No more Bets របស់ចិននេះ មិនដឹងគេនិយាយមិនល្អពីអាស៊ីអាគ្នេយ៍យ៉ាងណាខ្លះទេ ជាពិសេសខ្មែរតែម្តង គឺប្រទេសកម្ពុជាគឺគ្មានសុវត្តិភាព និងធ្វើឱ្យទេសចរណ៍ញញើតមិនហ៊ានចូលមកកម្ពុជា។
ដោយឡែក អ្នកលេងបណ្ដាញសង្គម ដែលនិយមចូលចិត្តវិភាគក៏បានលើកជាមតិយោបល់គួរត្រិះរិះពិចារណាដែរថា ក្រសួងទេសចរណ៍ គួរគិតគូរផងដែរពីការផ្សព្វផ្សាយ ធានាឲ្យពួកគេមានជំនឿចំពោះសុខសុវត្ថិភាព ក្នុងការធ្វើដំណើរមកលេងប្រទេសកម្ពុជាឲ្យកាន់តែខ្លាំងថែមទៀត ឱ្យសមនឹងអ្វីដែលកំពូលតារាសម្ដែង លំដាប់ហូលីវូដ Angelina Jolie ក្ដី តារាសម្ដែងមីយ៉ាន់ម៉ា Paing Takhon ក្ដី បានលើកឡើងពីសន្តិសុខ និង សុវត្ថិភាព ពេញបរិបូរណ៍ នៅក្នុងប្រទេសយើង។ ប្រសិនបើមិនមានការឆ្លើយតបណាមួយទេ នោះ អ្នកទស្សនា ភាពយន្តនេះ ទាំងសាសន៍ចិន ដែលជាអ្នកផលិត និង សាសន៍ ដទៃ ប្រាកដជាយល់ឃើញថាកម្ពុជា មិនមែនជាកន្លែងមានសុវត្ថិភាព ដោយសារគេគិតថាមុននឹងផលិត មាតិកា ឬភាពយន្ត ផ្នែកសិក្សាស្រាវជ្រាវនៃផលិតម្មច្បាស់ជាប្រមូលផ្ដុំទិន្នន័យច្បាស់ណាស់ ទើបហ៊ានផលិតចេញ។
យ៉ាងណាក៏ដោយ អ្នកលេងបណ្ដាញសង្គមនៅរង់ចាំមើលពីចំណាត់ការរបស់ក្រសួងពាក់ព័ន្ធទាំងអស់ ថាតើនឹងមានដំណោះស្រាយដូចម្តេចខ្លះចំពោះបញ្ហាខាងលើនេះ ដើម្បីស្ដាឱ្យវិស័យទេសចរណ៍នៅប្រទេសកម្ពុជាអាចក្រោកឡើងវិញបានយ៉ាងល្អប្រសើរ៕
