សិល្បៈជាតិ ៖ សារព័ត៌មានត្រយងទទួលដំណឹងមកថា នៅព្រឹកថ្ងៃទី ២៣ កញ្ញា ២០២៣ នេះ តារាសម្ដែងឯកប្រុស ខាត់ វ៉ៃហាំង បានធ្វើដំណើរចាកចេញពីប្រទេសកម្ពុជា ឆ្ពោះទៅប្រទេសចិន ដើម្បីចូលរួមជាតារាកិត្តិយសនៅក្នុងមហោស្រពភាពយន្តអន្តរជាតិ Silk Road លើកទី ១០។
លោក ខាត់ វ៉ៃហាំង ត្រូវបានទទួលតំណែងជាតារាសម្ដែងឯកប្រុសជម្រើសទី១ លើឆាកអន្តរជាតិ ក្នុងការអញ្ជើញចូលរួមក្នុងកម្មវិធី Silk Road International Film Festival លើកទី ១០ ដែលតំណាងឱ្យសិល្បករកម្ពុជា ចូលរួមជាមួយសិល្បករជាង៣០ប្រទេសផ្សេងទៀត។
តាមលិខិតអញ្ជើញពីមហោស្រពភាពយន្តអន្តរជាតិដ៏ធំមួយនេះបានឱ្យដឹងថា លោក ខាត់ វ៉ៃហាំង នឹងត្រូវបានបង្ហាញខ្លួននៅថ្ងៃបើកមហោស្រព ថ្ងៃទី ២៧ ខែកញ្ញា ខាងមុខនេះ ដែលធ្វើឡើងនៅក្នុងទីក្រុង Fuzhou ប្រទេសចិន។ សកម្មភាពចូលរួមរបស់លោក ខាត់ វ៉ៃហាំង ក្នុងមហោស្រពភាពយន្តអន្តរជាតិនៅប្រទេសចិនជាលើកដំបូងនេះ ក៏ត្រូវបានគេសម្លឹងឃើញថា គឺជាការបង្ហាញពីការរឹតចំណងមេត្រីភាពយ៉ាងល្អរវាងសិល្បករកម្ពុជាជាមួយចិន រួមទាំងបណ្ដាប្រទេសដទៃផ្សេងទៀតផងដែរ។
សូមជម្រាបថា តារាសម្តែង ខាត់ វ៉ៃហាំង គឺជាតារាសម្ដែងឯកប្រុសកម្ពុជា ដែលមានកេរ្តិ៍ឈ្មោះល្បីខ្ចរខ្ចាយដល់ក្រៅប្រទេស ដោយលោកតែងតែទទួលបានឱកាសពីផលិតករបរទេសដូចជា ផលិតករថៃ និងផលិតករចិន ដែលជ្រើសឱ្យរូបលោកចូលរួមសម្តែងក្នុងតំណែងជាតួសំខាន់នៅក្នុងខ្សែភាពយន្តខ្នាតធំលំដាប់អន្តរជាតិមករហូត។ ជាក់ស្ដែង នៅឆ្នាំ ២០២១ លោកបានចូលរួមជាមួយផលិតករចិនសម្ដែងក្នុងភាពយន្តមួយចំណងជើងថា «ឈោងចាប់ក្តីស្រមៃ»។ ហើយឆ្នាំ ២០២៣ នេះ លោកក៏មានចំណងដៃភាពយន្តលំដាប់អន្តរជាតិមួយរឿងទៀត ដែលមានចំណងជើងថា «ប្រុសលក់ខ្លួន/ Rent Boy» ត្រៀមបញ្ចាំងទាំងក្នុងស្រុក និងក្រៅស្រុក៕
