សិល្បៈជាតិ៖ ម្សិលមិញនេះ ( ថ្ងៃទី ២២ កញ្ញា ២០២៣ ) តារាកំប្លែង ម៉ាដូណា ចេញមក Live នៅលើហ្វេសប៊ុកយ៉ាងក្ដៅគគុកអំពីបញ្ហាអ្នកជំពាក់បំណុលរបស់ខ្លួន ដោយបោះសម្ដីធ្ងន់ៗយ៉ាងមិនសំចៃមាត់ រហូតផ្អើលព្រាតពេញហ្វេសប៊ុក និងចង្កោមអ្នកសិល្បៈ។ បើទោះការ Live នោះ ម៉ាដូណា ព្យាយាមមិនបញ្ចេញឈ្មោះបុគ្គលពិត ប៉ុន្តែអ្នកលេងបណ្ដាញសង្គមសន្និដ្ឋានថា គឺសំដៅដល់អ្នកខ្ញុង និងស្រីអយ ដែលជាកូនបំណុលគេចវេចលុយបំណុលជាង ៤ ម៉ឺនដុល្លារ។
ម៉ាដូណា បានរៀបរាប់រឿងហួសចិត្តជាច្រើនករណីអំពីកូនបំណុលរបស់ខ្លួន ដែលក្នុងនោះគេអាចយល់ខ្លះថា កូនបំណុលខ្លួនព្យាយាមគេចវេសមិនដោះស្រាយលុយរាប់ថ្ងៃរាប់ខែរាប់ឆ្នាំមកហើយ ដោយមានពាក្យដោះសារជាច្រើនហេតុផល និងមានពេលខ្លះទៀតភូតកុហកទំនុកចិត្តថា «ស្អែកសង» ហើយបាត់ស្រមោលរហូតដល់សព្វថ្ងៃនេះក៏គ្មានដំណោះស្រាយដែរ។ ម៉ាដូណា ថាខ្លួនអត់ទ្រាំនឹងការបង្វិលរបស់កូនបំណុលលែងបាន ខណៈខ្លួនជាម្ចាស់បំណុល ក៏ចាំបាច់ត្រូវការលុយមកវិញដែរ ទើបបានជាសម្រេចចិត្តប្រើផ្លូវច្បាប់មកដោះស្រាយ បើជ្រុលជាអស់លុយខាតនឹងបំណុលហើយ ខ្លួនសុខចិត្តអស់លុយថ្លៃមេធាវីម្ដងទៀត ដើម្បីចាត់ការកូនបំណុលឱ្យទាល់តែបាន។
យ៉ាងណាមិញ អ្នកនាង ខ្ញុង ដែលគេដឹងថាជាកូនបំណុលនោះ ក៏បានធ្វើការឆ្លើយតបវិញភ្លាមតាមរយៈការ Live ផង និងជាសំណេរនៅលើហ្វេសប៊ុកផង។ អ្នកនាង ខ្ញុង ថា រាល់ម្ចាស់បំណុលទាំងអស់ដែលបានបង្ហោះនិយាយអាក្រក់មកលើរូបអ្នកនាង អ្នកនាងក៏មិនខឹង និងមិនតបតអ្វីឡើយ ប៉ុន្តែអ្នកនាងសុំពេលដើម្បីដោះស្រាយជាដំណាក់កាល មានខ្លះក៏បង់ជូនមួយខែ ៥០០ ដុល្លារ ខ្លះ ២០០ ដុល្លារ ខ្លះ ១០០ ដុល្លារ។ ហោចណាស់អ្នកនាង សុំចិត្តកុំជេរប្រមាថអាយុជីវិតមកលើរូបនាងយ៉ាងធ្ងន់ធ្ងរពេក ព្រោះអ្នកនាងត្រូវការមានជីវិតមកដោះស្រាយបំណុលបន្តទៀត។ ខ្ញុង លើកឡើងទៀតថា បើចង់ជេរប្រមាថអ្វីនោះ គឺធ្វើដាក់អ្នកនាងម្នាក់បានហើយ ព្រោះបំណុលទាំងអស់ គឺអ្នកនាងជាអ្នកសាងឡើង ដោយមិនពាក់ព័ន្ធស្វាមី និងកូនរបស់ខ្លួននោះឡើយ។
សម្រាប់ម្ចាស់បំណុលគឺលោក ម៉ាដូណា បានចាត់ទុកការយំយែកបកស្រាយគ្រប់សព្វបែបយ៉ាងរបស់អ្នកនាង ខ្ញុង គឺជារឿង Drama នៅលើបណ្ដាញសង្គមសុំក្ដីអាណិតពីមហាជនតែប៉ុណ្ណោះ ដោយលោកប្រាប់អ្នកដែលកាន់ជើងកូនបំណុលវិញថា បើពួកគេជាម្ចាស់បំណុលដូចរូបលោក ទើបយល់អារម្មណ៍ច្បាស់ពីការទន្ទឹងចាំលុយគេសងមកវិញ។ លោកបញ្ជាក់ថា ព្រោះបញ្ហាបំណុលតុងទីននេះ លោកបានលក់របស់ទ្រព្យខ្លួនជាច្រើនដូចជា រថយន្តផ្ទាល់ខ្លួនផង និងរថយន្តម្ដាយខ្លួនផង ដើម្បីដោះស្រាយលុយតុងទីនជំនួសកូនបំណុល។ លោក ម៉ាដូណា ថា ខ្លួនត្រូវបានកូនបំណុលបោកប្រាស់ទំនុកចិត្តច្រើនដងរួចមកហើយ បើទោះបីជាលោកព្យាយាមទម្លាក់ការងារទៅឱ្យកូនបំណុលដើម្បីបានចំណូលខ្លះកាត់បំណុលនោះយ៉ាងណា ក៏ចុងក្រោយរូបលោកនៅតែត្រូវរងនូវការបោកប្រាស់កុហកដដែលជាដដែល។
តែដោយឡែក សារចុងក្រោយដែលអ្នក ខ្ញុង បានបង្ហោះគឺសរសររៀបរាប់ថា ៖ «ខ្ញុំរឹងមាំតាំងពីដើមមកហើយបងប្អូន មិនអីទេអរគុណណាស់ខ្ញុំអាចបន្តទៀតបាន ជំពាក់លុយសងលុយដោះស្រាយតាមផ្លូវច្បាប់ក៏ខ្ញុំអាចទៅបានមិនបញ្ហាទេ។ តែការជេរប្រមាថមើលងាយខ្ញុំ ប្រមាថអាយុជីវិតប្ដីខ្ញុំ ខ្ញុំឈឺ»។
សម្រាប់ករណីខាងលើនេះ មានអ្នកលេងបណ្ដាញសង្គមខ្លះមានមតិគាំទ្រចំពោះចំណាត់ការរបស់ ម៉ាដូណា ហើយក៏មានខ្លះទៀត យល់ពីភាពលំបាកវេទនារបស់អ្នកនាង ខ្ញុង ដែលកំពុងទាល់ច្រកជាមួយបំណុលគ្រប់ច្រកល្ហក។ ប៉ុន្តែគ្រប់គ្នានៅរង់ចាំមើលទៀតថា តើអ្នកនាង ខ្ញុង នឹងមានដំណោះស្រាយបញ្ហាបំណុលតុងទីនជាមួយលោក ម៉ាដូណា បែបណាបន្តទៀត? ហើយលោក ម៉ាដូណា នឹងបន្តនីតិវិធីច្បាប់ជាមួយក្រុមមេធាវីរបស់ខ្លួនយ៉ាងណាទៀត? សារព័ត៌មានត្រយងនឹងជម្រាបជូនប្រិយមិត្ត នៅពេលខាងមុខបន្តទៀត៕
