មួយរយៈនេះនៅលើបណ្ដាញសង្គម Social Media អ្នកអត្ថាធិប្បាយព័ត៌មានដ៏លេចធ្លោមួយរូបគឺ លោក ទូច សុខៈ បានបង្ហាញសកម្មភាពច្រើនទៅលើកសិដ្ឋានចិញ្ចឹមមាន់និងត្រី ដែលធ្វើឱ្យមហាជនផ្ដើមមានការសង្ស័យថាលោកថាអាចនឹងដើរចេញពីទ្រនំចាស់ឈប់ផ្សាយព័ត៌មានលើកញ្ចក់ទូរទស្សន៍ជាបន្តទៀត។
តាមការសង្កេតពីមជ្ឈដ្ឋានមហាជនដែលភាគច្រើនជាអ្នកគាំទ្រការអត្ថាធិប្បាយរបស់ លោក ទូច សុខៈ ឃើញថាមួយរយៈនេះបុរសដែលមានភាពលេចធ្លោខ្លាំងលើការអត្ថាធិប្បាយព័ត៌មាននិងពន្យល់បញ្ហាច្បាប់បានយ៉ាងក្បោះក្បាយ រូបនេះហាក់មិនមានសកម្មភាពនៅលើកញ្ចក់ទូរទស្សន៍ដូចសព្វមួយដងនោះឡើយ ប៉ុន្តែបែរជាឃើញលោកមានវត្តមានច្រើននៅឯកសិដ្ឋានចិញ្ចឹមមាន់និងចិញ្ចឹមត្រីរបស់លោកឯណោះវិញ។
យ៉ាងណាមិញការមន្ទិលសង្ស័យរបស់មហាជន កាន់តែច្បាស់ថែមទៀតនៅពេលដែលអ្នកអត្ថាធិប្បាយរូបនេះលោកបានចេញមកផុសសំណេរ តាមរយៈគណនីហ្វេសប៊ុករបស់លោកកាលពីថ្ងៃទី២២ ខែកក្កដា ឆ្នាំ២០២១ កន្លងទៅដែលក្នុងអត្ថន័យនៃសំណេរនោះលោកបានបង្ហាញផ្លូវដល់អ្នកគាំទ្រថា លោកអាចនឹងលៃរកពេលវេលាសមស្របណាមួយដើម្បី Live ផ្ដល់ឱកាសដល់បងប្អូនដែលមានចម្ងល់ពាក់ព័ន្ធនឹងបញ្ហាច្បាប់៖
«ផ្ញេីជូនបងប្អូនដែលតែងផ្ញេីសារសួរនាំករណីផ្លូវច្បាប់! នាពេលខាងមុខនេះ ប្រហែលខ្ញុំអាចលៃពេល ដេីម្បី Live ទាំងតាម Page,YouTube…ចែករំលែកចំណេះដឹងផ្លូវច្បាប់តាមករណីជាក់ស្ដែងរបស់បងប្អូន។ នៅពេលច្បាស់ការ ខ្ញុំនឹងជម្រាបជូនបន្ត។ សូមអរគុណចំពោះការគាំទ្រខ្ញុំ!»
ប្រសិនបើការសង្ស័យខាងលើគឺជាការពិត លោក ទូច សុខៈ ពិតជាចាកចេញឈប់ផ្សាយព័ត៌មានមែននោះ គឺជារឿងមួយគួរឱ្យស្ដាយជាទីបំផុតសម្រាប់វិស័យព័ត៌មាន ព្រោះលោកគឺជាអ្នកអត្ថាធិប្បាយមួយរូបដែលមានវិជ្ជាជីវៈ ជាពិសេសលោកមានចំណុចខ្លាំងនិងធ្វើឱ្យមហាជនស្គាល់ ហើយពេញនិយមខ្លាំងលើការអត្ថាធិប្បាយរបស់លោកព្រោះតែលោក តែងតែព្យាយាមបញ្ជ្រាបពាក់ព័ន្ធនឹងបង្ហាញផ្លូវច្បាប់ទៅតាមអង្គហេតុនិងសាច់រឿងនីមួយៗ ធ្វើឱ្យប្រជាពលរដ្ឋទូទៅបានយល់ដឹងច្រើនទៅលើផ្លូវច្បាប់ រហូតដល់អាជ្ញាធរក៏ដូចជាសមត្ថកិច្ចមួយចំនួនថែមទៀតផង។
ជាការកត់សម្គាល់អ្នកអត្ថាធិប្បាយរូបនេះទទួលបានស្រលាញ់និងគាំទ្រច្រើនខ្លាំងពីមហាជនដែលទស្សនារូបលោកតាមកញ្ចក់ទូរទស្សន៍ ព្រោះជាទូទៅលោកតែងតែឆ្លើយតបចំពោះចម្ងល់មហាជនដែលមានជាសំនួរមកកាន់លោក ដែលនេះគឺជាការចែករំលែកចំណេះដឹងនិងផ្ដល់នូវអត្ថប្រយោជន៍ខ្លាំងចំពោះសាធារណជនទូទៅយកមកពិនិត្យនិងសិក្សា។
ថ្វីត្បិតតែមានការសង្ស័យពីមហាជនចំពោះការដើរចេញឈប់ផ្សាយព័ត៌មានរបស់លោក ទូច សុខៈ ក៏ដូចជាការបង្ហោះពីសាមីខ្លួនពាក់ព័ន្ធនឹងការចែករំលែកចំណេះដឹង ក៏ដូចសំនួរពាក់ព័ន្ធនឹងបញ្ហាផ្លូវច្បាប់ ប៉ុន្តែរឿងពិតយ៉ាងណានោះនៅមិនអាចសន្និដ្ឋានបាននៅឡើយទេ លុះត្រាតែមានការអះអាងណាមួយពីលោក ទូច សុខៈ ដោយផ្ទាល់។
តាមដឹង លោក ទូច សុខៈ បានចាប់ផ្ដើមអាជីពជាអ្នកសារព័ត៌មានដំបូងនៅមជ្ឈមណ្ឌលព័ត៌មានស្ត្រីកម្ពុជា WMC បន្ទាប់មកទៀតលោកបានចូលបំរើការងារ ជានិពន្ធនាយករងនៅក្រុមហ៊ុន Sabay Digital ក្រោយពីឈប់ពីក្រុមហ៊ុន Sabay លោកក៏បានចូលបំរើការងារនៅក្នុងស្ថានីយទូរទស្សន៍ហង្សមាស ជាអ្នកអត្ថាធិប្បាយព័ត៌មានចាប់តាំងពីឆ្នាំ ២០១២ មកម្ល៉េះ៕
ទស្សនាវីដេអូព័ត៌មាន លោក ទូច សុខៈ ខាងក្រោមនេះ៖