សិល្បៈជាតិ៖ តាមក្រសួងវប្បធម៌និងវិចិត្រសិល្បៈបានឱ្យដឹងថា ក្រុមយុវជនល្ខោនខោលកម្ពុជា ត្រូវបានទទួលការអញ្ជើញឱ្យចូលរួមសម្ដែងនៅក្នុងកម្មវិធី International Mask Festival ដែលគ្រោងរៀបចំពីថ្ងៃទី១៧-១៨ ខែវិច្ឆិកា ឆ្នាំ២០២៣ នៅទីក្រុងសូឡូ ប្រទេសឥណ្ឌូណេស៊ី។
ក្នុងនោះដែរ ក្រសួងយល់ឃើញថា ធនធានមនុស្សនៃក្រុមសិល្បៈយុវជនល្ខោនខោលកម្ពុជា គឺពិតជាសក្តិសមនឹងអាចចូលរួមកម្មវិធីខាងលើតំណាងឱ្យកម្ពុជា ស្របតាមវត្ថុបំណងនៃកម្មវិធីនេះ។ ហើយភាគីអញ្ជើញនឹងរ៉ាប់រងលើការស្នាក់នៅ ការហូបចុក និងការធ្វើដំណើរក្នុងស្រុកផងដែរ។
ជាមួយគ្នានោះ ក្រុមយុវជនល្ខោនខោលកម្ពុជា បានបង្ហោះសាររៀបរាប់ពីក្ដីរំភើបថា ៖
វត្តមាន ល្ខោនខោល លើឆាកអន្តរជាតិ យុវជនល្ខោនខោល ក្នុងកម្មវិធី International Mask Festival ទីក្រុងសូឡូ ទេសឥណ្ឌូណេស៊ី នាខែវិច្ឆិកា ខាងមុខនេះ ។ យើងខ្ញុំសូមគោរពថ្លែងអំណរគុណ ក្រសួងវប្បធម៌ និងវិចិត្រសិល្បៈ ដែលបានផ្តល់ឱកាសដ៏វិសេសវិសាលនេះឱ្យ យុវជនល្ខោនខោលកម្ពុជា បានបញ្ចេញស្នាដៃលើឆាកអន្តរជាតិ ដើម្បីបង្ហាញពីសិល្បៈល្ខោនខោលដ៏អស្ចារ្យរបស់កម្ពុជា។ សូមគោរពថ្លែងអំណរគុណចំពោះ លោកជំទាវបណ្ឌិសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និង ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានឧបត្ថម្ភការធ្វើដំណើរពី ភ្នំពេញ-សូឡូ-ភ្នំពេញ។ សូមគោរពថ្លែងអំណរគុណចំពោះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងដែនដី នគរូបនីយកម្ម និងសំណង់ ដែលបាន ឧបត្ថម្ភផ្នែកសម្លៀកបំពាក់ និងថតភ្លេង នូវទឹកប្រាក់ចំនួន ១.២០០.០០០រៀល ។ សូមគោរពថ្លែងអំណរគុណ ឯកឧត្តម សរ សុពុត្រា ប្រធានកិត្តិយសយុវជនល្ខោនខោលកម្ពុជា ដែលបានឧបត្ថម្ភសិល្បករចំនួន ៦រូប ក្នុងម្នាក់ចំនួន ៤០០.០០០រៀល។ យើងខ្ញុំប្តេជ្ញា នឹងធ្វើឱ្យបានល្អអស់ពីសមត្ថភាពដើម្បីបង្ហាញអន្តរជាតិថា ល្ខោនខោលខ្មែរអស្ចារ្យ និងជាពិសេសគឺយុវជនរបស់កម្ពុជា មានសមត្ថភាព និងស្មើមុខស្មើមាត់លើឆាកអន្តរជាតិ ក្នុងកិច្ចថែរក្សា ការពារ និងផ្សព្វផ្សាយសិល្បៈវប្បធម៌ជាតិ។ យុវជនល្ខោនខោលកម្ពុជា។
