រថភ្លើងដឹកទំនិញរវាងចិន-អឺរ៉ុប ដែលធ្វើដំណើរចេញពីទីក្រុង Zhengzhou តំបន់ភាគកណ្តាលប្រទេសចិននោះ បានចាប់ផ្តើមប្រតិបត្តិការឡើងវិញហើយ បន្ទាប់ពីទីក្រុងមួយនេះ ទទួលរងការវាយប្រហារយ៉ាងខ្លាំង ពីគ្រោះទឹកជំនន់ ដែលបង្កឡើងដោយភ្លៀងធ្លាក់ខ្លាំង។ នេះបើយោងតាមសារព័ត៌មាន Global Time ចេញផ្សាយនាយប់ថ្ងៃទី២៦ ខែកក្កដា ឆ្នាំ២០២១នេះ។
នៅថ្ងៃអង្គារនេះ រថភ្លើងដឹកទំនិញមួយខ្សែ ផ្ទុកដោយគ្រឿងអេឡិចត្រូនិក, គ្រឿងបន្លាស់រថយន្ត និងទំនិញផ្សេងទៀត បានចាកចេញពីទីក្រុង Zhengzhou ឆ្ពោះទៅកាន់ទីក្រុង Liege របស់ប៊ែលហ្ស៊ិក។ ចាប់តាំងពីឆ្នាំ ២០១១មក រថភ្លើងដឹកទំនិញនេះ ធ្លាប់បានដឹកជញ្ជូនទំនិញទៅដល់ទីក្រុងចំនួន ១៦៨ ក្នុងប្រទេសចំនួន ២៣ នៅតំបន់អ៊ឺរ៉ុប។ ហើយរយៈពេល៦ខែនៅឆ្នាំ ២០២១នេះ អត្រាដឹកទំនិញមានការកើនឡើង ៥២ភាគរយបើប្រៀបធៀបនឹងឆ្នាំកន្លងទៅ។
ប៉ុន្ដែសេវាកម្មនេះ បានជួបនិងហានិភ័យដោយសារទឹកជំនន់វាយប្រហារខេត្ត Henan ដែលធ្វើឲ្យសេវាកម្មដឹកទំនិញមានការខកខានមួយរយៈព្រោះផ្លូវដែកត្រូវបានកាត់ផ្ដាច់ដោយទឹកជំនន់យ៉ាងគំហុក។
គួរជម្រាបថា ទីក្រុង Zhengzhou ខេត្ត Henan គឺជាមជ្ឈមណ្ឌលដ៏សំខាន់មួយសម្រាប់ឲ្យរថភ្លើដឹកទំនិញបើកឆ្លងកាត់ ដើម្បីពង្រឹងការតភ្ជាប់ផ្នែកដឹកជញ្ជូនជាមួយបណ្ដាប្រទេសអ៊ឺរ៉ុប ហើយទីក្រុងនេះបានសាងសង់កំពង់ផែទឹកសាបដើម្បីដោះស្រាយការដឹកជញ្ជូនទំនិញចិន-អ៊ឺរ៉ុបផងដែរ។
ប្រែសម្រួលដោយ៖ ជុំ ពេជ្រវណ្ណារ៉ា