សិល្បៈជាតិ៖ ថ្ងៃនេះកាលពី ៨៤ឆ្នាំមុន គឺជាថ្ងៃចាប់កំណើតរបស់អ្នកកវីម្ចាស់ដងស្ទឹងសង្កែ គង្គ ប៊ុនឈឿន គឺនៅថ្ងៃទី ១៨ តុលា ១៩៣៩ ហើយមរណនៅថ្ងៃទី១៧ ខែមេសា ២០១៦។
អ្នកកវីម្ចាស់ស្ទឹងសង្កែ គង្គ ប៊ុនឈឿន មានស្រុកកំណើតនៅភូមិចំការសំរោង ឃុំចំការសំរោង ស្រុក បាត់ដំបង ខេត្តបាត់ដំបង ។ ឪពុកឈ្មោះ គង្គ ឈិន ស្រុកកំណើតនៅ ខេត្តតាកែវ ម្តាយឈ្មោះ ម៉រ ភឹង ស្រុកកំណើតនៅខេត្តបាត់ដំបង។ លោកបានចូលប្រឡូកក្នុងវិស័យតែងនិពន្ធ ចាប់តាំងពីកំឡុងឆ្នាំ ១៩៥៥ មក រហូតបានប្រលងជាប់លេខមួយ ជាលើកដំបូង នៅក្នុងឱកាសមហោស្រពអក្សរសិល្ប៍មួយ នៅក្នុងខេត្តបាត់ដំបងក្នុងឆ្នាំ១៩៥៧ ក្នុងស្នាដៃឈ្មោះ«ស្នេហាលុះអវសាន»។
លោកក៏ជាអ្នកសរសេរកាសែត អ្នកនិពន្ធ ប្រលោមលោកពាក្យរាយ ប្រលោមលោកពាក្យកាព្យ កំណាព្យ ចម្រៀង សេណារីយ៉ូភាពយន្ត ជាអ្នកដឹកនាំសម្ដែង ជាអ្នកនិពន្ធបទភ្លេង ដ៏ល្បីឈ្មោះម្នាក់។ ក្រៅពីនេះ លោកក៏ជាអ្នកគូរ គំនូរអប់រំផងដែរ។ នៅឆ្នាំ ២០០០ លោកជាអ្នកនិពន្ធជនជាតិខ្មែរ ទី ២ បន្ទាប់ពី ឯកឧត្តម ពេជ្រ ទុំក្រវិល ដែលបានទទួលជ័យលាភី ស្នាដៃតែងនិពន្ធក្របខ័ណ្ឌអាស៊ាន ។
លោកត្រូវបាន អ្នកនិពន្ធខ្មែរទាំងឡាយចាត់ទុកជា អ្នកនិពន្ធដ៏ឆ្នើមម្នាក់របស់កម្ពុជា ដែលបានបន្សល់ទុក នូវស្នាដៃផ្នែកតែងនិពន្ធ យ៉ាងច្រើនសន្ធឹកសន្ធាប់ មានប្រលោមលោក និង ចម្រៀងសម័យដើម ដែលមាន អធិរាជសំឡេងមាស ស៊ិន ស៊ីសាមុត អ៊ឹង ណារី រស់ សេរីសុទ្ឋា ប៉ែន រ៉ន និងអ្នកចម្រៀងល្បីៗ ជាច្រើនរូបទៀត បានបកស្រាយ ហើយស្នាដៃទាំងអស់នោះ នៅតែ ស្ថិតក្នងមនោសញ្ចេតនា អ្នកអាន និងអ្នកស្តាប់រហូតមកដល់សព្វថ្ងៃនេះ ។លោកគឺជាកវីនិពន្ធល្បីឈ្មោះមួយរូបតាំងពីទសវត្សរ៍ទី៥០ រហូតមក។ លោកមានជំនាញទាំងផ្នែកបទចម្រៀង ភាពយន្ត និងសិល្បៈមួយចំនួនទៀត។
លោក គង្គ ប៊ុនឈឿន បានទទួលមរណភាពក្នុងវ័យ ៧៧ឆ្នាំនៅប្រទេសន័រវេសន៍ ដោយជំងឺមហារីក។ លោកបានបន្សល់ទុកស្នាដៃនិពន្ធជាច្រើនសម្រាប់ឱ្យកូនខ្មែរសិក្សាស្វែងយល់ ហើយមហាជនក៏តែងស្ងើចសរសើរមិនដាច់ពីមាត់ថា លោកជាកវីនិពន្ធជើងចាស់ដ៏ឆ្នើម ដែលច្រើនសរសេរបង្ហាញអំពីតថភាពពិតនៅក្នុងសង្គមជាតិ រហូតដល់លោកបានរត់គេចពីការតាមចាប់ខ្លួនពីរដ្ឋាភិបាលទៅនៅក្រៅប្រទេសរហូតដល់ថ្ងៃទទួលមរណភាព។
កូនខ្មែរគ្រប់រូបសូមឧទ្ទិសបួងសួងឱ្យវិញ្ញាណក្ខន្ធរបស់អ្នកកវីម្ចាស់ដងស្ទឹងសង្កែ គង្គ ប៊ុនឈឿន មកចាប់កំណើតជាខ្មែរ ដើម្បីបន្តនូវទឹកខ្មៅសម្រាប់បំពេនូវដួងចិត្តរបស់ប្រជាជនខ្មែរគ្រប់ស្រទាប់វណ្ណៈតទៅថ្ងៃមុខទៀត៕
