សិល្បៈជាតិ៖ ជឿថាហ្វេនទាំងអស់គ្នានៅចាំអំពីខ្សែពេជ្របន្តោងលលាដ៍ក្បាលខ្មោចរបស់ វណ្ណដា មានតែមួយគត់លើលោក ត្រូវបានច្នៃម៉ូដដោយហាងពេជ្រល្បីឈ្មោះ «សោមា-Soma Fine Jewelry» ដែលថ្មីៗនេះស្រាប់តែទទួលដំណឹងចុងក្រោយថា ហាងនេះបានបិទទ្វាររត់បាត់ស្រមោល ទាក់ទងលែងបានអស់ហើយ។
តាមការលើកឡើងរបស់ជនរងគ្រោះមានគណនីហ្វេសប៊ុកឈ្មោះ Rose Fiya បានបង្ហោះឱ្យដឹងថា៖ «ហាងពេជ្រសោមា សោមា-Soma Fine Jewelry កំពុងតែបោកប្រាស់គេ ហើយកំពុងរុះរើផ្លាកចេញរត់បាត់ហើយ ឆាតក៏មិនតបបងប្អូនជួរសែរផង ឥលូវជួបខ្លួនឯងហើយ ស្ដាយលុយណាស់ ឈប់ហើយពេជ្រទិញដូចទិញគ្រឿងកាឡៃ យកលក់ហាងផ្សេងគេអត់ទិញទេ កុំទុកចិត្តហាងល្បីបោកមួយទៀតហើយ»។ ជនរងគ្រោះខាងលើ ក៏បានបង្ហាញចំនួនទឹកប្រាក់ដែលបានទិញពីហាងបោកប្រាស់នេះ គឺមានតម្លៃសរុបជិត ៤០០០ ដុល្លារ នេះមិនទាន់គិតតម្លៃទាំងខ្សែទៀតផង។
ប្រភពមួយទៀត Le Rose Nail Bar បានលើកឡើងដែរថា ៖ «នេះរូបម្ចាស់ហាងរកស៊ីបោកគេមកយូរហើយ លឺថាកំពុងបើកហាងថ្មីដាក់ឈ្មោះថ្មីបោកគេបន្តទៀត ជូនទៅដាក់ពាក្យបណ្តឹងបន្តិចមិត្ត ព្រោះលឺថា សោមា-Soma Fine Jewelry បើហាងថ្មីបោកគេទៀត កុំឱ្យចាញ់បោកវាបងប្អូន ក្មេងទេតែថោកទាបចេះរកស៊ីបោកគេតាំងពីក្មេង ស៊ែរឱ្យគ្រួសារថោកទាបបានឃើញផង»។
ក្រៅពីនោះ ក៏មានប្រភពជាច្រើនបានបង្ហោះពីករណីនេះរហូតផ្អើលពេញបណ្ដាញសង្គមហ្វេសប៊ុក ថែមទាំងផ្អើលអស់ហ្វេនអ្នកគាំទ្រខ្លះ នាំគ្នាស៊ែរូបភាពចាស់របស់តារាចម្រៀងរ៉េប វណ្ណដា ដែលធ្លាប់ពាក់ខ្សែពេជ្របន្តោងលលាដ៍ក្បាលខ្មោច Skull 2 និងប្រម៉ូដផ្សព្វផ្សាយឱ្យហាងពេជ្រមួយនេះ។
គួររំលឹកដែរថា ម៉ូដខ្សែពេជ្រលលាដ៍ក្បាលខ្មោចនេះ ត្រូវបានអ្នកគាំទ្រមើលឃើញថាគឺ តំណាងឱ្យបទចម្រៀងក្នុងអាល់ប៊ុម «Skull» គឺត្រូវបានច្នៃម៉ូដដោយហាងពេជ្រ សោមា ដែលកំពុងផ្អើលឆោឡោថាបិទទ្វាររត់បាត់ស្រមោល៕
