សិល្បៈជាតិ៖ កាលពីព្រឹកថ្ងៃទី១៩ ខែតុលា ឆ្នាំ២០២៣ ម្ចាស់មកុដនៃកម្មវិធី Miss Supranational ឆ្នាំ២០២៣ ពិភពលោក កញ្ញា Andrea Aguilera បានមកដល់ទឹកដីកម្ពុជា។ ទស្សនកិច្ចរបស់ស្រ្តីស្អាតលំដាប់លេខ១ពិភពលោកនេះ នឹងធ្វើឱ្យពិភពលោក ពិសេសអ្នកគាំទ្រកញ្ញា ចាប់អារម្មណ៍មកលើប្រទេសកម្ពុជាកាន់តែខ្លាំង។
ឆ្នាំ២០២៣ ម្ចាស់មកុដប្រចាំប្រទេសកម្ពុជា កញ្ញា លីវ ជីលី បានទៅទទួលស្វាគមន៍ម្ចាស់មកុដពិភពលោកដល់អាកាសយានដ្ឋានអន្តរជាតិភ្នំពេញក្នុងនាមជាម្ចាស់ផ្ទះ។ ការមកដល់ទឹកដីអច្ឆរិយៈលើកនេះកញ្ញាដ៏ស្រស់ស្អាតបានតុបតែងឈុតបុរាណប្រពៃណីខ្មែរ និងថតរូបនៅព្រះបរមរាជវាំង និងវត្តភ្នំ ទីកន្លែងដំបូងនៃការកកើតទីក្រុងភ្នំពេញរាជធានីជាបេះដូងនៃព្រះរាជាណាចក្រកម្ពុជា។
រូបថតប៉ុន្មានសន្លឹករបស់ Miss Supranational 2023 គឺជាសារសំខាន់បង្ហាញទៅកាន់ពិភពលោកថា កម្ពុជាមានសុខសន្តិភាព និង សុវត្ថិភាព ជាពិសេសជាទឹកដីដែលមានអរិយធម៌និងវប្បធម៌ចាស់ទុំគួរជាទីចាប់អារម្មណ៍។ មួយវិញទៀតដំណើរទស្សនកិច្ចលើកទី១ របស់បវរកញ្ញាម្ចាស់ជ័យលាភី នៃកម្មវិធីកម្រិតពិភពលោកដ៏ធំនៅកម្ពុជាលើកនេះ គឺជាផ្នែកមួយដ៏សំខាន់ក្នុងការផ្សព្វផ្សាយបន្ថែមពីប្រទេសកម្ពុជាទៅកាន់ពិភពលោកថាកម្ពុជាមានទីតាំងស្អាតៗ រង់ចាំស្វាគមន៍ភ្ញៀវទេសចរណ៍គ្រប់ជាតិសាសន៍ដោយមិនប្រកាន់ពូជសាសន៍អ្វីទាំងអស់។
ខណៈដែលអាកាសយានដ្ឋានអន្តរជាតិសៀមរាបអង្គរ បានចាប់ផ្ដើមបើកដំណើរស្វាគមន៍ភ្ញៀវទេចរណ៍អន្តរជាតិ ជាផ្លូវការហើយនោះ ដូច្នេះទស្សនកិច្ចរបស់ស្រីស្អាតលំដាប់ពិភពលោករូបនេះគឺអាចចាត់ទុកបានថាគឺទាន់ពេលវេលាមួយល្អជាទីបំផុត ជាពិសេសនៅពេលដែលស្រីស្អាតរូបនេះ ធ្វើដំណើរទៅដល់ទឹកដីអច្ឆរិយៈនិងថតរូបផ្សព្វផ្សាយពីប្រាសាទបុរាណដ៏ល្អឯក អមដោយសម្រស់ទេសភាពធម្មជាតិដ៏ស្រស់ត្រកាលនៃទឹកដីអង្គររបស់ប្រទេសកម្ពុជា នឹងកាន់តែជួយជំរុញឱ្យភ្ញៀវទេសចរណ៍ចង់ធ្វើដំណើរកម្សាន្តមកកាន់ប្រទេសកម្ពុជាថែមមួយកម្រិតទៀត។
គួរដឹងថាកញ្ញា Andrea Aguilera ឬ Andrea Victoria Aguilera Paredes កើតនៅថ្ងៃទី២៧ ខែមេសា ឆ្នាំ២០០១ គឺជាតារាម៉ូដែលជនជាតិអេក្វាដ័រ ដែលយកជ័យជំនះលើបេក្ខភាពមកពីបណ្ដាប្រទេសផ្សេងៗក្លាយជាម្ចាស់មកុដ Miss Supranational 2023 កាលពីថ្ងៃទី១៤ ខែកក្កដា ឆ្នាំ២០២៣។ កញ្ញាគឺជាយុវនារីទីមួយដែលបានសាងប្រវត្តិសាស្ត្រឈ្នះមកុដទីមួយពីកម្មវិធី Miss Supranational សម្រាប់ប្រទេសអេក្វាឌ័រ៕
