សិល្បៈជាតិ៖ បន្ទាប់ពីមានការប្រកែកវែកញែកគ្នានៅលើបណ្ដាញសង្គមពាក់ព័ន្ធជាមួយម្ចាស់ស្នាដៃបទចម្រៀង «ឱភ្នំពេញអើយ» ពេលនេះអស់មន្ទិលហើយ ដោយក្រសួងវប្បធម៌ និងវិចិត្រសិល្បៈបានសម្រេចរក្សាទុកម្ចាស់ស្នាដៃពិតបទចម្រៀងនេះនៅដដែល។
តាមសំណេររៀបរាប់របស់តារាចម្រៀង ខេលី ដែលជាចៅស្រីរបស់លោក កែវ ចិន្តា បានអះអាងថា ក្រសួងនៅតែរក្សាសិទ្ធជូនចំពោះលោក កែវ ចិន្តា ជាម្ចាស់ស្នាដៃនិពន្ធទំនុកច្រៀងបទចម្រៀងនេះដដែលដោយមិនមានការផ្លាស់ប្ដូរនោះឡើយ។
ក្នុងនោះ តារាចម្រៀងស្រីរូបនេះ បានបង្ហោះសារយ៉ាងដូច្នោះ៖ «ក្រុមគ្រួសារនាងខ្ញុំ សូមគោរពថ្លែងអំណរគុណយ៉ាងជ្រាលជ្រៅបំផុតដល់ក្រសួងវប្បធម៌ និងវិចិត្រសិល្ប: ដែលបានបំពេញតួនាទី ក្នងការរកដំណោះស្រាយបញ្ជាក់ភាពច្បាស់លាស់ចំពោះបទចម្រៀង« ឱ ! ភ្នំពេញអើយ » ដែលជាបទឆ្លុះបញ្ជាំងពីប្រវត្តិសាស្ត្រជាតិល្បីល្បាញយូរឆ្នាំមកហើយ ។ ជាលទ្ធផល ក្រសួងសម្រេចនៅតែរក្សាលំនាំដើមដដែលគឺ ៖ និពន្ធទំនុកច្រៀង : កែវ ចិន្តា សម្រួលបទភ្លេង : ជ័យ សោភា ច្រៀងដោយ : អ្នកស្រី សូ ចន្នី។ ដោយហេតុថា បទនេះគឺជាសមិទ្ធផលរបស់គណបក្សប្រជាជនកម្ពុជាតាំងពីឆ្នាំ១៩៧៩មក ។ ការសម្រេចនេះនេះខាងក្រុមគ្រួសារនាងខ្ញុំទទួលយកបានដោយរីករាយ ហើយក៏សង្ឃឹមថា ក្រសួងនឹងចេញលិខិតសម្រេចជាផ្លូវការឆាប់ៗនេះ ដើម្បីជាប្រយោជន៍ក្នុងការរក្សាកម្មសិទ្ធិបទនេះទុកជារបស់គណបក្សជារហូត»។
កន្លងមកមានការលើកឡើងពីសំណាក់ក្រុមគ្រួសារលោកគ្រូភ្លេង ម៉ម មិថុនា នោះគឺលោកឪពុក ម៉ម ធឿន និយាយទូរស័ព្ទឆ្លងឆ្លើយជាមួយជាងគំនូរកុកទិព្ធ បានរៀបរាប់ឱ្យដឹងថា បទចម្រៀងមួយនេះលោកបានដកស្រង់ពីបទភ្លេងមហោរី ២ បទគឺ បទ ឡាវឡឹក និងបទព្យាសុ ដោយលោកផ្ទាល់ជាអ្នកប្រគំឧបករណ៍ម៉ុងហ្គូលីន លោក ជ័យ សុភា ប្រគំហ្គីតាសាំ លោក អ៊ឹម ឈឿន ប្រគំទ្រសោ និងលោក ប៉ែន យ៉េន ប្រគំហ្គីតាបាស់ ទើបបង្កើតបានស្នាដៃបទភ្លេងនេះឡើង។ ហើយបទនេះដែរ ត្រូវបានលោក ម៉ម ធឿន អះអាងថា បានថតជាសំឡេងនៅអំឡុងឆ្នាំ ១៩៧៩ នៅប្រទេសវៀតណាម តាមរយៈកាសែតដោយប្រគល់ឱ្យលោកស្រី សូ ចន្នី ជាអ្នកបកស្រាយដំបូងគេបង្អស់។ ស្នាដៃរបស់លោកត្រូវបានថ្នាក់ដឹកនាំត្រូវការ ដើម្បីផ្សព្វផ្សាយអំពីចម្រៀងដែលប្រទេសជាតិបានរំដោះមានសុខសុន្តិភាព ដែលក្នុងពេលនោះលោក មានលោក កែវ ចិន្តា គឺជាថ្នាក់ដឹកនាំនៃក្រសួងឃោសនាការ។ អ្វីដែលគួរឱ្យចាប់អារម្មណ៍បំផុតគឺ លោក ម៉ម ធឿន មិនបាននិយាយបញ្ជាក់នៅក្នុងវីដេអូនោះថា លោកបាននិពន្ធទំនុកច្រៀងពិតប្រាកដនោះទេ ដោយលោកលើកឡើងតែការនិពន្ធបទភ្លេងតែប៉ុណ្ណោះ។
ចំពោះករណីនេះដែរ សារព័ត៌មានត្រយង ក៏បានសួរទៅភាគីគ្រូភ្លេង ម៉ម មិថុនា ដើម្បីបំភ្លឺពីបញ្ហានេះបន្ថែមដែរ ប៉ុន្តែលោកបានឆ្លើយតបថា លោកកំពុងតែដំណើរការណ៍រឿងនេះជាមួយខាងក្រសួងវប្បធម៌ និងវិចិត្រសិល្បៈ ដោយលោកសុំមិនបកស្រាយអ្វីទាំងអស់។
គួរដឹងថា ក្រោយពីមានការប្រជុំអន្តរក្រសួងរវាង ក្រសួងព័ត៌មាន និងក្រសួងវប្បធម៌ និងវិចិត្រសិល្បៈ ស្ដីអំពីកម្មសិទ្ធិបញ្ញានៃបទចម្រៀងនេះ សម្រេចថា បទ«ឱភ្នំពេញអើយ» ជាកម្មសិទ្ធរបស់ គណបក្សប្រជាជនកម្ពុជា ដោយមាន លោក កែវ ចិន្តា និពន្ធទំនុកច្រៀង លោក ជ័យ សោភា សម្រួលតន្ត្រី និងលោកស្រី សូ ចន្នី ជាអ្នកចម្រៀង៕
