សិល្បៈជាតិ៖ ធ្វើដំណើរជិតដល់វគ្គប្រកួតផ្ដាច់ព្រ័ត្រមែនទែនហើយសម្រាប់កម្មវិធីប្រកួតសម្រស់ Miss Grand International 2023 ដែលមានបេក្ខភាពតំណាងប្រទេសកម្ពុជា កញ្ញា ភឹម ស្រីនោ ជាមេទ័ពកំពុងប្រយុទ្ធយ៉ាងស្វិតស្វាញលើសមរភូមិដ៏ក្ដៅគគុកនេះ។ យ៉ាងណាមិញបើងាកមកចាប់អារម្មណ៍រឿងដែលជាមោទនភាពបំផុតសម្រាប់ជាតិនោះគឺ «នារីស៊ីក្លូកម្ពុជា» ដែលជាឈុតតំណាងជាតិរបស់កម្ពុជានៅតែឈានមុខគេផ្នែកប្រជាប្រិយភាពលើបណ្ដាញសង្គម។
ចាប់តាំងពីថ្ងៃប្រកួតឈុតតំណាងជាតិ «National Costume» កាលពីថ្ងៃសុក្រទី២០ ខែតុលា ឆ្នាំ២០២៣ ហើយមានការបង្ហោះចែករំលែកឈុតតំណាងជាតិប្រទេសនីមួយៗមក សង្កេតឃើញថាឈុតតំណាងជាតិរបស់កម្ពុជាដែលគ្រងនិងដើរបង្ហាញយ៉ាងអង់អាចដោយកញ្ញា ភឹម ស្រីនោ (ហៅ Nano) កំពុងតែឈានមុខឬនាំមុខគេលើផ្នែក Like Share និង Comment លើបណ្ដាញសង្គមហ្វេសប៊ុក ដោយគិតត្រឹមព្រឹកថ្ងៃទី២៣ ខែតុលានេះ រូបភាពឈុតនារីស៊ីក្លូកម្ពុជា មានចំនួន Like=130K ចំនួន Share=1.2M និងចំនួន Comment=57K។
សូមជំរាបជូនថាឈុតនារីស៊ីក្លូ «Cyclo Cambodia» គឺមានអត្ថន័យចង់លើកកម្ពស់និងអភិរក្សយានជំនិះបុរាណដែលជាមធ្យោបាយធ្វើដំណើររបស់ប្រជាពលរដ្ឋចាប់តាំងពីឆ្នាំ១៩៣៦ ប៉ុន្តែដោយសារតែបច្ចេកវិទ្យាទំនើប រថយន្តកាន់តែទំនើប សំណង់អគារកាន់តែរីកសុះសាយ មនុស្សចាប់ផ្ដើមប្រើប្រាស់យានយន្តផ្សេងៗហើយយានជំនិះមួយនេះកំពុងត្រូវបានប្រជាពលរដ្ឋបំភ្លេចចោល។ ការតម្លើងឈុតនេះឡើងគឺមានគោលបំណងឱ្យមនុស្សងាកមកចាប់អារម្មណ៍ពីមធ្យោបាយធ្វើដំណើរដ៏ចំណាស់មួយនេះ ជាពិសេសគឺចង់ឱ្យក្មេងជំនាន់ក្រោយបានដឹងពីសារៈប្រយោជន៍និងចង់ចាំថាស៊ីក្លូ គឺជាជម្រើសដ៏ឆ្លាតវៃសម្រាប់ធ្វើដំណើរទស្សនាទីក្រុងភ្នំពេញ។ បន្ថែមលើសពីនេះ ឈុតនេះគឺចង់បង្ហាញពីពណ៌ទង់ជាតិប្រទេសកម្ពុជាដោយបូកបញ្ចូលនូវក្បាច់ខ្មែរបុរាណ ហើយលាយបញ្ចូលសិល្បៈសហសម័យ ដែលធ្វើឱ្យឈុតនេះកាន់តែរស់រវើកនិងអស្ចារ្យខ្លាំងឡើង៕
