សិល្បៈជាតិ៖ ព្រឹត្តិការណ៍ដ៏អស្ចារ្យប្រចាំឆ្នាំ២០២៣ «បុណ្យវប្បធម៌» នឹងបង្ហាញជូននូវពិព័រណ៍អំពីវប្បធម៌កម្ពុជា ក្នុងគោលបំណងលើកតម្កើងវប្បធម៌ និងអរិយធម៌ខ្មែរ ឱ្យទូលំទូលាយ រួមទាំងផ្សព្វផ្សាយពីភាពអស្ចារ្យដែលខ្មែរមាន ទៅកាន់ពិភពលោក។ ជាពិសេសចង់ឱ្យអ្នកចូលរួមទទួលបាននូវបទពិសោធន៍ ទាក់ទងទៅនឹងវប្បធម៌ចម្រុះរបស់ខ្មែរ។ តើ បុណ្យវប្បធម៌ មានអ្វីប្លែកខ្លះ?
«បុណ្យវប្បធម៌» គឺជាព្រឹត្តិការណ៍ដែលប្រមូលផ្ដុំទៅដោយវប្បធម៌ខ្មែរ ដែលនឹងនាំប្អូនៗនិស្សិត ភ្ញៀវជាតិ និងអន្តរជាតិ ឱ្យទទួលបាននូវបទពិសោធន៍ប្លែកៗ និងមានឱកាសសិក្សាឈ្វេងយល់នូវសិល្បៈវប្បធម៌ របស់ប្រទេសកម្ពុជាឱ្យកាន់តែស៊ីជម្រៅ។ ក្នុងនោះរួមមានការបង្ហាញរបាំក្បាច់បុរាណ របាំប្រពៃណី ល្ខោនបុរាណចម្រុះ គុនល្បុក្កតោ ការដើរបង្ហាញនូវសម្លៀកបំពាក់ ការតាំងបង្ហាញពីស្នាដៃសិល្បករសិល្បការិនីខ្មែរ ឧបករណ៍ភ្លេងបុរាណ និងការលេងល្បែងកម្សាន្តផ្សេង។ មិនត្រឹមតែប៉ុណ្ណោះ ក៏មានការចូលរួមសម្តែងពីសិល្បករសម័យផងដែរ។ លើសពីនេះទៅទៀត ព្រឹត្តិការណ៍បុណ្យវប្បធម៌ ក៏មានការប្រគំតន្ត្រីបែបសម័យសប្បាយៗ និងមានលក់ម្ហូបអាហារ ភេសជ្ជៈ និងបង្អែមយ៉ាងសម្បូរបែប រួមទាំងមានការតាំងពិព័រណ៍ផលិតផលផ្សេងៗ ពីបណ្តាអាជីវករនៅក្នុងប្រទេសកម្ពុជាផងដែរ។
សូមជម្រាបថា ព្រឹត្តិការណ៍ដ៏អស្ចារ្យ «បុណ្យវប្បធម៌» ត្រូវបានរៀបចំឡើងដោយសមាជិកសភាយុវជនកម្ពុជា (Youth Assembly) និងគាំទ្រដោយ ស.ស.យ.ក. ខេត្តស្វាយរៀង នឹងប្រព្រឹត្តទៅរយៈពេលពីរថ្ងៃ គឺចាប់ពីម៉ោង ៩៖០០នាទីព្រឹក ដល់ម៉ោង ២១៖០០នាទីយប់ នៅថ្ងៃទី២៨-២៩ ខែតុលា ឆ្នាំ២០២៣ ដែលពិធីបុណ្យនេះប្រារព្ធឡើងនៅទីតាំង Friend Future Factory (F3) និងមានការបើកឱ្យមហាជនចូលរួមទស្សនាដោយសេរី៕
